រាជធានីភ្នំពេញ ៖ គម្រោងមជ្ឈមណ្ឌលពាណិជ្ជកម្មចម្រុះ ដែលមានទីតាំងនៅតាមមាត់ទន្លេសាប លាតសន្ធឹងចាប់ពីស្ពានជ្រោយចង្វារហូតដល់ផ្សាររាត្រី ត្រូវបានគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា(CDC) បានសម្រេចចេញវិញ្ញាបនបត្រចុះបញ្ជីជាស្ថាពរតាមការស្នើសុំហើយ ។ យោងតាមសេចក្តីប្រកាសព័ត៌មានរបស់CDC កាលព្រឹកថ្ងៃទី២៩…
រាជធានីភ្នំពេញ ៖ គម្រោងមជ្ឈមណ្ឌលពាណិជ្ជកម្មចម្រុះ ដែលមានទីតាំងនៅតាមមាត់ទន្លេសាប លាតសន្ធឹងចាប់ពីស្ពានជ្រោយចង្វារហូតដល់ផ្សាររាត្រី ត្រូវបានគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា(CDC) បានសម្រេចចេញវិញ្ញាបនបត្រចុះបញ្ជីជាស្ថាពរតាមការស្នើសុំហើយ ។
យោងតាមសេចក្តីប្រកាសព័ត៌មានរបស់CDC កាលព្រឹកថ្ងៃទី២៩ សីហា បានបង្ហាញថា ៖« តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរជូនក្រុមហ៊ុន ដើម្បីអភិវឌ្ឍន៍គម្រោងនេះឡើង ដោយមានទុនវិនិយោគប្រមាណ៥៣១,៦លានដុល្លារអាមេរិក ហើយក្រោយសាងសង់រួច នឹងអាចបង្កើតការងារបាន២១.៦៨៤កន្លែង ។
សេចក្តីប្រកាសព័ត៌មានដដែលបានបន្តថា ៖« គម្រោងអភិវឌ្ឍន៍មជ្ឈមណ្ឌលពាណិជ្ជកម្មចម្រុះនេះ ជាការវិនិយោគដោយក្រុមហ៊ុន CHEAN CHHOENG THAI GROUP CO.,LTD. មានទីតាំងវិនិយោគស្ថិតនៅកំពង់ផែស្វយ័តក្រុងភ្នំពេញ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ »។
គម្រោងដ៏ធំមិនធ្លាប់មាននេះ ត្រូវបានដាក់ឈ្មោះថា Phnom Penh Harbour ដែលនឹងអភិវឌ្ឍន៍ទៅជាតំបន់ទេសចរណ៍ធំជាងគេ រួមមានទីកន្លែងកម្សាន្ដ, ផ្សារទំនើបខ្នាតអន្តរជាតិ, ផ្សាររាត្រី, ហាងលក់ទំនិញ, កន្ត្រកវិលលើទឹក សាលពិព័រណ៍លើទឹក, សួនច្បារសិល្បៈនិងវប្បធម៌, អគារការិយាល័យSOHOចំនួនពីរ, អគារការិយាល័យភ្លោះខ្ពស់ជាងគេ, មជ្ឈមណ្ឌលផ្លាស់ប្តូរវប្បធម៌ចិន, អគារពាណិជ្ជកម្ម និងសណ្ឋាគារចំនួន៤, សណ្ឋាគារលំដាប់ផ្កាយ៥ខ្នាតអន្តរជាតិ Swan Bay, ខុនដូនិងលំនៅឋានប្រណីតចំនួន៨អគារ និងកំពង់ផែសម្រាប់អ្នកដំណើរ ។
ដីទីតាំងនេះ ត្រូវបានជួលទៅឲ្យក្រុមហ៊ុនខាងលើរយៈពេល៥០ឆ្នាំ ដោយគិតចាប់ពីថ្ងៃទី២៩ ខែមិថុនា ឆ្នាំ២០១៨ រហូតដល់ថ្ងៃទី២៨ ខែមិថុនា ឆ្នាំ២០៦៨ ដែលមានកំណត់ក្នុងអនុក្រឹត្យលេខ៣២ អនក្រ.បក ចុះថ្ងៃទី៩ ខែមីនា ឆ្នាំ២០១៨ ស្ដីពីការធ្វើអនុបយោគទីតាំងដីនៅបណ្ដោយទន្លេសាប ពីស្ពានជ្រោយចង្វា មកដល់ផ្សាររាត្រី ។
ចំណែកប្រាក់ឈ្នួលលើការជួលដីនេះ គឺជាការបង់ប្រាក់ឈ្នួលផ្ដាច់តែម្ដងក្នុងចំនួន១៦,៥លានដុល្លារអាមេរិកសម្រាប់រយៈពេល៥០ឆ្នាំ រួមបញ្ចូលទាំងអាករលើតម្លៃបន្ថែម(VAT)ចំនួន១០% ។ នេះបើយោងតាមសេចក្តីប្រកាសរបស់កំពង់ផែស្វយ័តក្រុងភ្នំពេញ។ អ្នកជំនាញផ្នែកអចលនទ្រព្យលំដាប់អន្តរជាតិ បានសម្តែងនូវសុទិដ្ឋិនិយមពីគម្រោងអភិវឌ្ឍន៍ធំៗទាំងនេះនៅរាជធានីភ្នំពេញ ។
អ្នកនាង Grace Rachny Fong នាយិកាក្រុមហ៊ុន Century21 Cambodia បានថ្លែងថា អ្នកវិនិយោគចិនមានយុទ្ធសាស្ដ្រ ឈ្នះ-ឈ្នះ ដោយគេលក់គម្រោងនៅប្រទេសចិន រួចផ្តល់ខុនដូនៅស្រុកខ្មែរមួយដោយមិនគិតថ្លៃ ប៉ុន្តែតាមពិត ពួកគេបានដាក់តម្លៃបញ្ចូលក្នុងអចលនទ្រព្យនោះរួចទៅហើយ ហេតុនេះ ទើបយើងឃើញគម្រោងចិននៅកម្ពុជាទទួលបានជោគជ័យ ។
អ្នកនាងបន្តថា ទោះជាគម្រោងនេះមានច្រើន និងជាអគារកប់ពពកក្តី ប៉ុន្តែពួកគេសាងសង់តាមដំណាក់កាល មិនមែនសង់ទុកកប់ចោលនោះទេ ។ អ្នកនាងបន្តថា ៖« អ្នកវិនិយោគចិនមានបទពិសោធន៍ច្រើនលើគម្រោងអភិវឌ្ឍន៍របស់ ពួកគេ ហេតុនេះ ពួកគេសិក្សាពីទីផ្សារ និងដំណាក់កាលត្រូវសាងសង់ច្បាស់លាស់ណាស់ ដើម្បីធ្វើឲ្យប្រាកដថា គម្រោងពួកគេទទួលបានជោគជ័យ » ។
អ្នកនាងបន្តថា ៖« បច្ចុប្បន្ន ៨០%នៃអ្នកទិញខុនដូជាជនបរទេស និង២០%ជនជាតិខ្មែរ ប៉ុន្តែនៅរយៈពេល៥ទៅ១០ឆ្នាំខាងមុខ ជនជាតិខ្មែរនឹងនៅខុនដូ៨០% ហើយជនបរទេសនឹងនៅតែ២០% វិញ » ។
អ្នកនាង Grace Rachny Fong បានបន្តថា បែបផែនជីវិត (Life Style) របស់ប្រជាពលរដ្ឋនឹងផ្លាស់ប្តូរនៅពេលមានការកកស្ទះចរាចរណ៍ក្នុងទីក្រុងកាន់តែកើនឡើងខ្លាំង ហើយរបៀបនៃការគិតរបស់មនុស្សសម័យថ្មី ពិសេសយុវជនធ្លាប់ចេញទៅសិក្សានៅបរទេស ពេលពួកគេត្រឡប់មកវិញ ពួកគេនឹងផ្លាស់ប្តូររស់នៅតាមខុនដូជំនួសវិញ ។
អ្នកនាងបន្តថា បើសួរថា ហេតុអីចិនសាងសង់ខុនដូនាពេលនេះ គឺដោយសារតម្លៃដីបច្ចុប្បន្នមានភាពធូរថ្លៃខ្លាំង ធៀបនឹងដីនៅប្រទេសចិន ហេតុនេះ ការវិនិយោគនាពេលនេះពួកគេរកឱកាសចំណេញបានច្រើន ។
លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា បានថ្លែងថា កំណើនវិនិយោគរបស់ចិននៅកម្ពុជា មិនមែនជារឿងកើតឡើងដោយឯកឯងនោះទេ ប៉ុន្តែទំនាក់ទំនងដ៏ល្អរវាងប្រមុខរដ្ឋាភិបាលនៃប្រទេសទាំងពីរ គោលនយោបាយ «ខ្សែក្រវាត់មួយ ផ្លូវមួយ » របស់ចិន ព្រមទាំងកម្ពុជារក្សាបាននូវសន្តិភាព ស្ថិរភាពនយោបាយ និងកំណើនសេដ្ឋកិច្ចរឹងមាំ ក៏ជាផ្នែកសំខាន់ទាក់ទាញការវិនិយោគរបស់ចិនផងដែរ ៕
ចែករំលែកព័តមាននេះ