អតីតមេបក្សអំណាចខ្មែរ ៖ មានសេរីភាពមិនមែនដោយសារអន្តរជាតិទេ

ថ្ងៃទី ៣១ ខែ សីហា ឆ្នាំ ២០១៨
ម៉ោង ១៥:២៦
អ៊ាង ប៊ុនរិទ្ធ

រាជធានីភ្នំពេញ ៖ អតីតប្រធានគណបក្សអំណាចលោក សួន សេរីរដ្ឋា បានអះអាងការមានសេរីភាពពីពន្ធនាគារវិញនេះ ដោយសារដំណោះស្រាយនយោបាយ និងអំណាចតុលាការមិនជាប់ពាក់ព័ន្ធ និងអង្គការជាតិ អន្តរជាតិ ឬរដ្ឋាភិបាលអន្តរជាតិនោះទេ ។

ការលើកឡើងនេះ បន្ទាប់ពីអតីតមេបក្សរូបនេះត្រូវបានព្រះមហាក្សក្រព្រះទានលើកលែងទោស កាលពីពេលថ្មីៗកន្លងមកនេះ ហើយបន្ទាប់ពីលោកឃើញថា អ្នកពន្ធនាគារមួយចំនួនពិសេសនោះអតីតក្រុមសកម្មជនគណបក្សសង្គ្រោះជាតិត្រូវបានអង្គការជាតិ និងអន្តរជាតិ មួយចំនួនចូលសួរសុខទុក្ខ ពេលកំពុងជាប់ពន្ធនាគារ ប៉ុន្តែចំពោះលោកវិញគ្មាន ។

លោក សួន សេរីរដ្ឋា អតីតប្រធានគណបក្សអំណាចខ្មែរបានឲ្យដឹងនៅថ្ងៃទី៣១ សីហានេះបានបញ្ជាក់ថា «រយៈពេល១ឆ្នាំ១០ថ្ងៃ ដែលខ្ញុំជាប់ឃុំឃាំងគ្មានអង្គការសិទ្ធិមនុស្សជាតិ និងអន្តរជាតិណាមួយរវីរវល់មកសួរសុខទុក្ខ សួរនាំលើកទឹកចិត្តខ្ញុំទេ ។ សូម្បីអង្គការ Licado ដែលចូលទៅក្នុងពន្ធនាគារៀងរាល់អាទិត្យយកថ្នាំពេទ្យ ទៅចែក និងដុកទ័រទៅជួយពិនិត្យសុខ ភាពនោះក៏មិនដែលហៅខ្ញុំមកជួបសួរជួយពិនិត្យសុខភាព ឬឲ្យថ្នាំពេទ្យបានមួយគ្រាប់ដែរ» ។

យ៉ាងណាក្តីលោក សួន សេរីរដ្ឋា បានឲ្យដឹងមានមានតែស្ថានទូតអាមេរិក (ទៅជួប៣ដង) កាកបាទក្រហមអន្តរជាតិ (ទៅជួប២ដង) ក្រុមដុកទ័រពីស្ថានទូតថៃ (បានជួយពិនិត្យសុខភាពឲ្យលោកម្តង) និងក្រៅពីនោះមានតែប្រពន្ធកូនគ្រួសារខ្ញុំ (ទៅជួបស្ទើររាល់ថ្ងៃ) ព្រមទាំងមិត្តភក្តិអ្នកគាំទ្ររបស់ខ្ញុំប៉ុណ្ណោះ ដែលបានចូលទៅជួបសួរសុខទុក្ខខ្ញុំដល់ពន្ធនាគា ។

លោកបញ្ជាក់ថា«ខ្ញុំចង់ប្រាប់សាធារណៈជនថា ការលើកលែងទោសឲ្យខ្ញុំទទួលបានសេរីភាព វាគ្មានទាក់ទងនឹងពួកអង្គការសិទ្ធិមនុស្សណា ឬរដ្ឋាភិបាលអន្តរជាតិណាទេ ក្រៅពីក្រុមការងារ និងក្រុមគ្រួសាររបស់ខ្ញុំដែលព្យាយាមតាមលទ្ធភាពជាក់ស្តែងតាមផ្លូវតុលាការ និងតាមផ្លូវដំណោះស្រាយនយោបាយក្នុងស្មារតីខ្មែរជាតិសាសន៍តែមួយ ។ ដូច្នោះសូមសាធារណៈកុំយល់ច្រឡំ» ។

សូមរឮកទៀតថា ការដោះលែងឲ្យមានសេរីភាពរបស់អតីតគណបក្សអំណាចខ្មែរនេះ បន្ទាប់ពីលោកបានសរសេរលិខិតមួយច្បាប់សុំទោសសម្តេចតេជោ ហ៊ុន សែន នាយករដ្ឋមន្ត្រីជាផ្លូវ ការ ដើម្បីស្នើសុំដោះលែងរូបលោក កាលពីថ្ងៃទី២២ សីហាកន្លងមកនេះ ៕