អភិបាលរាជធានីបញ្ជាឱ្យប៉ូលិសគ្រប់ប៉ុស្តិ៍ប្រចាំការបម្រើពលរដ្ឋ២៤ម៉ោងលើ២៤ម៉ោង

ថ្ងៃទី ២៨ ខែ សីហា ឆ្នាំ ២០១៨

ម៉ោង ១៤:៤៧

រាជធានីភ្នំពេញ៖ ក្នុងសន្និបាតបូកសរុប ការងារបោះឆ្នោតជ្រើសរើសតំណាងរាស្ត្រ នីតិកាលទី៦ ឆ្នាំ២០១៨ របស់គណៈកម្មការរៀបចំ ការបោះឆ្នោតរាជធានីភ្នំពេញ កាលពីថ្ងៃទី២៧សីហា នៅរដ្ឋបាលរាជធានីភ្នំពេញកន្លងមកនេះ លោក ឃួង ស្រេង អភិបាលរាជធានីភ្នំពេញ បានបញ្ជាឲ្យប៉ូលីសប៉ុស្តិ៍រដ្ឋបាលសង្កាត់ទាំង១០៥ និងអធិការខណ្ឌទាំង១២ ត្រូវមានអ្នកប្រចាំការ២៤ម៉ោងលើ២៤ម៉ោង ដូចសាលាសង្កាត់តែម្តង ដើម្បីរង់ចាំទទួលពាក្យបណ្តឹង និងអន្តរាគមន៏បានទាន់ពេល ជុំវិញបញ្ហាសន្តិសុខ និងបំរើការងារជូនប្រជាពលរដ្ឋ នៅពេលពួកគាត់ត្រូវការបន្ទាន់ ។

លោកបន្តថា ជុំវិញបញ្ហាប្រជាពលរដ្ឋ មកប៉ុស្តិ៍ដាក់ពាក្យបណ្តឹង ប៉ូលិសឆ្លើយថា រឿងតូចតាចមិនចាំបាច់ប្តឹងនោះឡើយ ដែលបញ្ហានេះបានធ្វើឲ្យប្រជាពលរដ្ឋមិនពេញចិត្ត ។ ដូច្នេះ ដើម្បីបញ្ជៀសការថ្នាំងថ្នាក់ពីប្រជាពលរដ្ឋបន្តទៀតនោះ ប៉ូលិសប៉ុស្តិ៍រដ្ឋបាល អធិការខណ្ឌ ត្រូវតែដាក់វេនប្រចាំការឲ្យបានជាប់ជាប្រចាំ សម្រាប់ទទួលបណ្តឹង និងអន្តរាគមន៍បានទាន់ពេល ជូនពួកគាត់។

លោក ឃួង ស្រេង បានមានប្រសាសន៏ទៀតថា ការដាក់បទបញ្ជានេះ ប៉ូលិសប៉ុស្តិ៍រដ្ឋបាលសង្កាត់ទាំង១០៥ និងអធិការខណ្ឌទាំង១២ ត្រូវបើកយុទ្ធនាការ តម្រូវឲ្យមានអ្នកប្រចាំការ ទាំងមន្ត្រីសង្កាត់ ក៏ដូចប៉ូលិសសង្កាត់ ពិសេសចៅសង្កាត់ជាមេរបស់ប៉ូលិស ដែលមានភារៈកិច្ចត្រួតពិនិត្យលើបញ្ហានេះត្រូវត្រួតពិនិត្យមើលថាតើប៉ូលិសប៉ុស្តិ៍អនុវត្តតាមបទបញ្ជាបានដែរឬទេ ជាពិសេសប៉ុស្តិ៍នគរបាល និងចៅសង្កាត់ត្រូវតែសហការគ្នា ដើម្បីបំរើប្រជាពលរដ្ឋ ដោយមិនគិតពីផលប្រយោជន៏ជាធំ ។

លោក ឃួង ស្រេង បានបញ្ជាក់ថា ចំពោះការងារបំរើប្រជាពលរដ្ឋនេះ ដោយមានការប្រឡងប្រណាំង គ្រប់បណ្តាសង្កាត់ទាំង១០៥ ដែលលេចធ្លោក្នុងបញ្ហាបំរើការងារ ការបំពេញសេវាសាធារណៈ និងការពារសន្តិសុខជូនប្រជាពលរដ្ឋបានល្អជាងគេ ។ គួររំលឹកថា បច្ចុប្បន្ន រាជធានីភ្នំពេញ មានខណ្ឌចំនួន១២ សង្កាត់ចំនួន១០៥ និងភូមិចំនួន៩៥៣ផងដែរ ៕