ខេត្តព្រះសីហនុ ៖ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុបានអោយដឹងថា កម្លាំងនគរបាលបានឃាត់ខ្លួនជនជាតិចិនចំនួន៣នាក់ពាក់ព័ន្ធបទល្មើសគ្រឿងញៀន២ករណីផ្សេងៗគ្នានៅក្នុងថ្ងៃតែមួយ ។ លោកឧត្តមសេនីយ៍ទោស្នងការបានបញ្ជាក់ថាករណីទី១-ការឃាត់ខ្លួនជនសង្ស័យជាជនជាតិចិនចំនួន២នាក់នៅវេលាម៉ោង៣ និង២០នាទីរសៀល…
ខេត្តព្រះសីហនុ ៖ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុបានអោយដឹងថា កម្លាំងនគរបាលបានឃាត់ខ្លួនជនជាតិចិនចំនួន៣នាក់ពាក់ព័ន្ធបទល្មើសគ្រឿងញៀន២ករណីផ្សេងៗគ្នានៅក្នុងថ្ងៃតែមួយ ។
លោកឧត្តមសេនីយ៍ទោស្នងការបានបញ្ជាក់ថាករណីទី១-ការឃាត់ខ្លួនជនសង្ស័យជាជនជាតិចិនចំនួន២នាក់នៅវេលាម៉ោង៣ និង២០នាទីរសៀល ថ្ងៃទី២៧ ខែសីហា ឆ្នាំ២០១៨ កន្លងមកនៅពេលកម្លាំងចម្រុះចុះត្រួតពិនិត្យឆែកឆេររកអាវុធជាតិផ្ទុះនៅតាមបណ្តោយវិថីឯករាជ្យ ស្ថិតនៅចំណុចទល់មុខមន្ទីរពេទ្យបង្អែកខេត្តព្រះសីហនុ ក្នុងសង្កាត់លេខ៤ ក្រុង-ខេត្តព្រះសីហនុ ឃាត់ខ្លួនជនសង្ស័យជាជនជាតិចិនដែលមានឈ្មោះ YANG REN CHEN ភេទប្រុស អាយុ៣២ឆ្នាំ ជនជាតិចិន ស្នាក់នៅសណ្ឋាគារខ្សាច់ស ជាអ្នកបើកបរ (ពុំមានលិខិតឆ្លងដែនជាប់នឹងខ្លួន) និងទី២-ឈ្មោះ JIANG LIU YAN ភេទស្រី អាយុ២៦ឆ្នាំ ជនជាតិចិន មុខរបរទេសចរណ៍ ជាអ្នករួមដំណើរ កាន់លិខិតឆ្លងដែនលេខ G61047083 ។
វត្ថុតាងដកហូតបានមានម្សៅក្រាមពណ៌សជាសារធាតុញៀនចំនួន៤៣កញ្ចប់(១កញ្ចប់ធំ និង៤២កញ្ចប់តូច), បំពង់សារ៉ាងមានពណ៌ក្រហមចំនួន១៤, ទូរស័ព្ទចំនួន១គ្រឿង និងរថយន្ត១គ្រឿងម៉ាក LEXUS RX-330 ។
ករណីទី២-នៅវេលាម៉ោងជាង៣និង០០នាទីរសៀលថ្ងៃដដែលសមត្ថកិច្ចឃាត់ខ្លួនជនជាតិចិន ម្នាក់ឈ្មោះ CUI YAN FEI ភេទប្រុស អាយុ៣៣ឆ្នាំ កាន់លិខិតឆ្លងដែនលេខ EB 5537894 មុខរបរអាជីវករ ហើយការឃាត់ខ្លួនជនជាតិចិនរូបនេះពេលដែលរូបគេបានទៅយករថយន្តនៅក្លិបខារ៉ាអូខេ ស៊ីងតុហ្វាង ស្ថិតនៅសង្កាត់៣ ក្រុងព្រះសីហនុ ដោយឆែកក្នុងរថយន្តនោះរកឃើញ ម្សៅក្រាមពណ៌សថ្លាជាសារធាតុញៀនចំនួន៤កញ្ចប់តូច, ជញ្ជីងថ្លឹងចំនួន១, ថង់សំរាប់វេចខ្ចប់គ្រឿងញៀនមួយចំនួន ។ ករណីទាំងពីរខាងលើនេះកម្លាំងជំនាញកំពុងកសាងសំណុំរឿងបញ្ជូនទៅសាលាដំបូងខេត្តព្រះសីហនុដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ