រាជធានីភ្នំពេញ ៖ ជនសង្ស័យ៣នាក់ ទើបចេញធ្វើសកម្មភាពឆក់កាបូប និងឆក់ទូរស័ព្ទដៃជនជាតិខ្មែរ និងជនបរទេសបានចំនួន២លើកជាប់អន្ទាក់សមត្ថកិច្ចនគរបាលព្រហ្មទណ្ឌកម្រិតស្រាល រាជធានីភ្នំពេញកាលពីថ្ងៃទី២៤ សីហា ២០១៨ ។
ជនសង្ស័យ៣នាក់ខាងលើមានទី១- ឈ្មោះ តឺយ ពៅ អាយុ២៨ឆ្នាំ មានទីលំនៅផ្ទះលេខ៣៧២ ផ្លូវម៉ុងរិទ្ធី សង្កាត់ភ្នំពេញថ្មី ខណ្ឌសែនសុខ មុខរបរ មិនពិតប្រាកដ (ចាប់តាមដីកាបង្គាប់ឲ្យចាប់ខ្លួនលេខ៤០០ដ.ច.ន ចុះថ្ងៃទី១៣ ខែមិថុនា ឆ្នាំ២០១៨ ចេញដោយលោក ថាន់ ឡេង ចៅក្រមស៊ើបសួរសាលាដំបូងរាជធានីភ្នំពេញ) ។ ទី២- ឈ្មោះ ហេង កុសល ហៅតឿ អាយុ២៦ឆ្នាំ មុខរបរជាងជួសជុលទូរស័ព្ទ ស្នាក់នៅផ្ទះលេខ២៤ ផ្លូវលេខ២៨៩ សង្កាត់បឹងកក់ទី២ ខណ្ឌទួលគោក ។ និងទី៣- ឈ្មោះ ទៀវ បញ្ញា ហៅបញ្ញា អាយុ២០ឆ្នាំ មុខរបរជាងបាញ់ថ្នាំរថយន្ត ផ្លូវលេខ៥៩៨ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាល រាជធានីភ្នំពេញបានឲ្យដឹងថា ការឃាត់ខ្លួនជនសង្ស័យទាំង៣នាក់ គឺធ្វើឡើងតាមរយៈកម្លាំងសមត្ថកិច្ចជំនាញដែលបានស៊ើបអង្កេត និងស្រាវជ្រាវអស់ពេលជាច្រើនថ្ងៃ ទើបឈានដល់ការឃាត់ខ្លួន ហើយការឃាត់ខ្លួនពួកគេនោះបានធ្វើឡើងជាបន្តបន្ទាប់នៅចំណុចផ្ទះសំណាក់លេខ៦៩ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ ក្រោយពីពួកគេបានប្រព្រឹត្តបទល្មើស លួចមានស្ថានទម្ងន់ទោស (ឆក់ទ្រព្យសម្បត្តិ) ប្រជាពលរដ្ឋចំនួន២លើក ។
លោក ប៊ុន សត្យា បន្តថា ការចាប់ខ្លួនជនសង្ស័យសមត្ថកិច្ចបានដកហូតវត្ថុតាងដែលជាមធ្យោបាយជិះធ្វើសកម្មភាពរួមមាន ម៉ូតូម៉ាកហុងដាឌ្រីមសេ១២៥ ពណ៌ខ្មៅ ផលិតឆ្នាំ២០១៨ មួយគ្រឿង ពាក់ស្លាកលេខ ភ្នំពេញ ១GZ- ២៥០៦ ចាប់យកពីជនសង្ស័យឈ្មោះ ទៀវ បញ្ញា ហៅច្រមុះ ។
ក្រោយពីឃាត់ខ្លួនជនសង្ស័យទាំង៣នាក់ឆ្លើយសារភាពប្រាប់សមត្ថកិច្ចប្រហាក់ប្រហែលគ្នាថា ពួកគេពិតជាបានចេញធ្វើសកម្មភាពចំនួន២លើកមកហើយមែន ជាក់ស្តែងលើកទី១- ឆក់កាបូបយួរដៃ ពណ៌ប្រផេះ ពីជនបរទេសម្នាក់ នៅចំណុចមុខផ្ទះលេខ៧ មហាវិថីសុធារស់ ភូមិទី៣ សង្កាត់ទន្លេបាសាក់ ខណ្ឌចំការមន កាលពីថ្ងៃទី១៣ មេសា ២០១៨ វេលាម៉ោង៤និង៤៥ នាទីរសៀល ។
ជនរងគ្រោះឈ្មោះ CHAO ZHANG ភេទប្រុស អាយុ៣២ឆ្នាំ ជាជនជាតិចិន កាន់លិខិតឆ្លងដែនលេខ E២៤០៣៩០៥៨ ចុះថ្ងៃទី២៦ ខែកក្កដា ឆ្នាំ២០១៣ មុខរបរជាភ្ញៀវទេសចរ មកស្នាក់នៅ សង្កាត់ចតុមុខ ខណ្ឌដូនពេញ ដែលសម្ភារបាត់បង់កាបូបយួរដៃ ពណ៌ប្រផេះ ១លិខិតឆ្លងដែន មួយក្បាល អត្តសញ្ញាណប័ណ្ណសញ្ជាតិចិនលេខ៣៣០៦៨២១៩៨៦១០០៣០០៥៦ មួយ ប្រាក់ហុងកុងចំនួន៣៦,០០០ ប្រាក់ចិនចំនួន១០,០០០ ប្រាក់តៃវ៉ាន់ចំនួន៤,០០០ កាត ATM ចំនួន១៥ប្រាក់ដុល្លារអាមេរិកមួយចំនួន ទូរសព្ទ័ដៃម៉ាក IPhoneX ពណ៌ខ្មៅ១គ្រឿង ។
លើកទី២- ឆក់វ៉ាលីដាក់សំលៀកបំពាក់ ពណ៌ស្ករ មិនបានសម្រេច នៅចំណុចមុខយានដ្ឋានហេង វណ្ណៈ ផ្លូវលេខ២៧៣ សង្កាត់ ទួលសង្កែ១ ខណ្ឌឫស្សីកែវ រាជធានីភ្នំពេញ កាលពីថ្ងៃទី ២២ សីហា ២០១៨ វេលាម៉ោង១០និង៣០នាទីយប់ ។ សម្ភារចាប់ដកហូតបានម៉ូតូម៉ាកហុងដាឌ្រីម សេ១២៥ ពណ៌ខ្មៅ ផលិតឆ្នាំ២០១៨ ដែលមានពាក់ស្លាកលេខភ្នំពេញ១HB-២៥២៨ ទូរសព្ទ័ដៃ២គ្រឿង ម៉ាកអាយហ្វូន៥S ពណ៌ទឹកមាស មួយគ្រឿង និងទូរស័ព្ទដៃម៉ាកអាយហ្វូន៥ ពណ៌ទឹកប្រាក់១គ្រឿង គឺចាប់យកពីឈ្មោះ ហេង កុសល ហៅ តឿ ។
យោងទៅលើចម្លើយជនសង្ស័យទាំង៣នាក់ពាក់ពន្ធបទល្មើសដូចបានរៀបរាប់ខាងលើនេះ និងភាពស៊ីសង្វាក់លើពាក្យបណ្តឹងរបស់ជនរងគ្រោះសមត្ថកិច្ចបានកសាងសំណុំរឿងបញ្ជូនជនសង្ស័យទៅសាលាដំបូងរាជធានីភ្នំពេញតាមនីតិវិធី ៕
ចែករំលែកព័តមាននេះ