រាជធានីភ្នំពេញ ៖ ធ្លាប់តែវាយបំបាក់កីឡាករជើងខ្លាំងកម្ពុជារាប់មិនអស់នាពេលមកបង្ហាញខ្លួននៅកម្ពុជាម្ដងៗ សម្រាប់ការប្រកួតអន្តរជាតិនៅលើសង្វៀនទូរទស្សន៍អាស៊ីអាគ្នេយ៍ កាលពីយប់ថ្ងៃទី២៥ សីហា មុននេះ គេកត់សម្គាល់ថា ជើងខ្លាំងថៃ Sayber Fath ដែលធ្លាប់ទទួលជ័យជម្នះលើកីឡាករកម្ពុជាខ្លាំងៗរាប់មិនអស់ បែរជារងការបរាជ័យស្ទើរមិនគួរឱ្យជឿដោយត្រូវកីឡាករកម្ពុជាវាយឡើងហូរឈាមដល់ថ្នាក់គ្រូបង្វឹករបស់ថៃស្នើសុំបញ្ឈប់។
វ៉ែន សុវណ្ណ ដែលជាកីឡាករថ្មីទើបឡើងកូដនិងមានឈ្មោះដូចកីឡាករ វ៉ែន សុវណ្ណ ដែលបាត់មុខយូរ បានអះអាងថា លោកពិតជាមានអារម្មណ៍សប្បាយចិត្តណាស់ដែលក្នុងពេលប៉ះគ្នាជាមួយកីឡាករជើងខ្លាំងមកពីប្រទេសថៃ Sayber Fath ជាលើកដំបូង ស្រាប់តែខ្លួនអាចដណ្ដើមបានជ័យជម្នះ ដែលលោកមិននឹកស្មានដល់ ។
ការប្រកួតទាំងមូលលោករំពឹងត្រឹមតែអាចឈ្នះពិន្ទុ ដែលមានន័យថា អាចសងសឹកជូនមិត្តភក្តិក្នុងពិភពប្រដាល់ប៉ុណ្ណោះ ប៉ុន្តែដល់ពេលប៉ះគ្នានៅលើសង្វៀន SEA-TV ស្រាប់តែលោកអាចវាយកីឡាករថៃបែករយះដល់ថ្នាក់ហូរឈាមឡើងលោកក៏ស្រឡាំងកាំងដែរ ក្នុងពេលវាយត្រូវចំណុចខ្ទាតឈាមម្ដងៗ ។ លោកចាត់ទុកជ័យជម្នះលើកនេះ មួយចំណែកបានពីសំណាង តែក៏កើតឡើងពីការប្រឹងប្រែងផ្លាស់ប្ដូរបច្ចេកទេសក្នុងពេលប្រកួតប្រជែងផងដែរ។
លោកថា ខ្លួនត្រូវការពេលវេលាប្រឹងប្រែងហ្វឹកហាត់ឱ្យច្រើនថែមទៀត ដើម្បីអាចការពារជ័យជម្នះឱ្យបានសម្រាប់ការប្រកួតលើកក្រោយ ដោយសារតែលោកយល់ថា កីឡាករថៃ ក្រោយចាញ់យ៉ាងអាម៉ាស់ក្រោមដៃរបស់លោក គឺពិតជាប្រកាសសងសឹកក្នុងពេលណាមួយ។
លោក ថៃ អ៊ូ អ្នកដឹកនាំកីឡាករថៃឱ្យមកប្រកួតនៅទូរទស្សន៍អាស៊ីអាគ្នេយ៍ បានថ្លែងប្រាប់ថា លោកក៏មិននឹកស្មានដែរដែលការប្រកួតមួយនេះ ស្រាប់តែកីឡាកររបស់លោកទទួលបរាជ័យដល់ម្លឹង ។ លោកបញ្ជាក់ថា បើឱ្យលោកទាយ គឺលោកជឿថា វ៉ែន សុវណ្ណ នឹងមិនអាចឈ្នះដោយល្អយ៉ាងហ្នឹងឡើយ ។ ម្យ៉ាងដោយសារតែមុនឡើងប្រកួត កីឡាករថៃក៏បានហ្វឹកហាត់ច្រើនថ្ងៃ និងមិនមែនជាកីឡាករដែលមិនធ្លាប់មកកាន់កម្ពុជា និងមិនស៊ាំរបបអាហារ ក៏ដូចជាបរិយាកាសនៅកម្ពុជាផង ទើបលោករឹតតែយល់ច្បាស់ថា នោះមិនមែនជាបញ្ហាណាមួយដែលធ្វើឱ្យកីឡាកររបស់លោកចាញ់ប្រៀបកីឡាករម្ចាស់ផ្ទះនោះទេ ។
លោកថា ការប្រកួតមួយនេះលោកសរសើរកីឡាករកម្ពុជា ដែលវាយបានល្អ និងអាចបំបាក់កីឡាកររបស់លោកឱ្យរងការអាម៉ាស់បានខុសពីការគ្រោងទុក ខណៈដែលទឹកទី៤ គឺជាទឹកដែលលោកយល់ថាបានធ្វើឱ្យកីឡាកររបស់លោករងការអាម៉ាស់ច្រើនមិនធម្មតាព្រោះតែអាចវាយឱ្យកីឡាករលោកបែករយះដល់ថ្នាក់ដូចគេវះ ប៉ុន្តែកីឡាកររបស់លោកនៅតែប្រកាសជំហរមិនព្រមឈប់ប្រកួត ហើយបន្តការប្រកួតដោយមិនចុះចាញ់។
លោកមិននឹកស្មានថា កីឡាករ វ៉ែន សុវណ្ណ អាចធ្វើឱ្យកីឡាករថៃរបស់លោកទទួលលទ្ធផលអវិជ្ជមាន ហើយឈានដល់ថ្នាក់គ្រូបង្វឹករបស់ថៃ រត់មកស្នើឱ្យបញ្ឈប់ការប្រកួត ដើម្បីសម្រេចចិត្តមិនឱ្យប្រកួតបន្តក្នុងទឹកទី៥ ដោយសារតែយល់ថា កីឡាករថៃមានរបួសធ្ងន់ ។ លោកថាកីឡាករខ្លួនភ្លាត់ស្នៀតក្នុងពេលប្រទាញប្រទង់គ្នាប៉ុណ្ណោះ ទើបនាំឱ្យបែករយះ ហើយបណ្ដាលមកពីសំណាងវាយត្រូវកន្លែងរបួសបន្ថែមទៀត ទើបធ្វើឱ្យកូនសិស្សរបស់លោកបែកឈាមដល់ថ្នាក់គ្រូបង្វឹកថៃមិនអាចឱ្យប្រកួតបន្ត ។
ទោះបីយ៉ាងណា លោកសរសើរSayber Fath ដែលបែករយះដល់ថ្នាក់ហូរឈាមដូចស្រោចពេញក្បាលទៅហើយប៉ុន្តែនៅតែមិនព្រមបោះបង់ ដោយមានតែប្រឹងស្ទុះចូលវាយខ្លាំងឡើង ធ្វើឱ្យកីឡាករកម្ពុជាចង់ទ័លទីម្ដងៗ។ លោកថា កីឡាករថៃមិនអស់ចិត្តទេ ហើយគេក៏ប្រកាសសុំសងសឹកដាច់ខាតនោះដែរ ដោយលោកនឹងរកពេលវេលាសមរម្យមួយ ដើម្បីឱ្យគេបានប៉ះជាមួយកីឡាករ វ៉ែន សុវណ្ណ រូបនេះម្ដងទៀត ។ លោកថា ខ្លួននឹងស្នើឱ្យទូរទស្សន៍អាស៊ីអាគ្នេយ៍រៀបចំការប្រកួតសងសឹកឆាប់ៗ ដោយសារតែលោកចង់ដឹងថាបើមានការប្រកួតជាថ្មី តើកីឡាករកម្ពុជានឹងឈ្នះម្ដងទៀត ឬកីឡាកររបស់លោកនឹងសងសឹកបាន។
លោក ញាណ សុធី អ្នករៀបចំការប្រកួតបានអះអាងថា លោកក៏ពេញចិត្តឱ្យកីឡាករទាំងពីរប៉ះគ្នាជាថ្មីផងដែរ បន្ទាប់ពីលោកក៏មើលឃើញថា ការប្រកួតរបស់ពួកគេកាលពីយប់នោះ ក៏ប្រកួតអស់ដៃ ហើយល្អមើលត្រូវចិត្តមហាជន ។ លោកមិនទាន់ច្បាស់ថានឹងជ្រើសយកថ្ងៃណា ពេលណា ដើម្បីឱ្យកីឡាករទាំងពីរបានសងសឹកគ្នានោះទេ ប៉ុន្តែមិនលើសពីមួយខែទេ គឺលោកនឹងរៀបចំការប្រកួតបំពេញបំណងកីឡាករថៃឱ្យបានក្ដៅៗ ដោយសារតែភាគីខាងលោកថៃ អ៊ូ បានអះអាងថា កីឡាករថៃមិនអស់ចិត្តនឹងការបរាជ័យក្រោមដៃរបស់កីឡាករ វ៉ែន សុវណ្ណ នោះទេ ដោយភាគីថៃបានទាំងចាត់ទុកថា អ្វីដែលគេទទួលបានគឺជារឿងភ្លាត់ស្នៀត។
លោកថា កីឡាករថៃបែករយះ៨ថ្នេរ ហើយរបួសស្នាមនោះ បើបណ្ដោយឱ្យវាយបន្តទៀត ក៏ពិតជាហូរឈាមច្រើន បណ្ដាលឱ្យកីឡាករថៃមានគ្រោះថ្នាក់ប៉ះពាល់ដល់សុខភាពបាន។
យ៉ាងណាមិញ លោកថាជំនួបប្រកួតរបស់ពួកគេនឹងលេចឡើងក្នុងពេលឆាប់ៗដើម្បី
បំពេញចិត្តអ្នកគាំទ្រដែលនិយមទស្សនាកីឡាប្រដាល់ ៕
ចែករំលែកព័តមាននេះ