ខេត្តមណ្ឌលគិរី ៖ កសិដ្ឋានចិញ្ចឹមជ្រូកជនជាតិ ឬជ្រូកកណ្តុរលើកដំបូងនៅខេត្តមណ្ឌលគិរីត្រូវបានដាក់ជ្រូកពូជសាកល្បង ចំនួន៥៤ក្បាលហើយ កាលពីដើមខែសីហា ២០១៨ នៅតំបន់ដែនជម្រកសត្វព្រៃណាំលៀ ស្ថិតនៅស្រុកពេជ្រាដា ។…
ខេត្តមណ្ឌលគិរី ៖ កសិដ្ឋានចិញ្ចឹមជ្រូកជនជាតិ ឬជ្រូកកណ្តុរលើកដំបូងនៅខេត្តមណ្ឌលគិរីត្រូវបានដាក់ជ្រូកពូជសាកល្បង ចំនួន៥៤ក្បាលហើយ កាលពីដើមខែសីហា ២០១៨ នៅតំបន់ដែនជម្រកសត្វព្រៃណាំលៀ ស្ថិតនៅស្រុកពេជ្រាដា ។
លោក វុធ សារុំ នាយកដែនជម្រកសត្វព្រៃភ្នំណាមលៀបានឲ្យដឹងកាលពីថ្ងៃទី២៦ សីហា ២០១៨ បច្ចុប្បន្នក្រោយទទួលបានការណែនាំពីឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ដើម្បីបង្កាត់ពូជសត្វជ្រូកចិញ្ចឹមបែបធម្មជាតិ ផ្គត់ផ្គង់ដល់ប្រជាពលរដ្ឋ តាមមូលដ្ឋានដែលត្រូវការយកទៅចិញ្ចឹមលក់ជៀសវាងជ្រូកដែលចិញ្ចឹមដោយចំណីធ្វើឲ្យប៉ះពាល់ដល់សុខភាព ។ មន្ត្រីនៅដែនជម្រក ការពារសត្វព្រៃភ្នំណាមលៀរបានដំណើរការសាកល្បងកសិដ្ឋានចិញ្ចឹមជ្រូកធម្មជាតិមួយកន្លែង ដោយមាន ការថែទាំពីមន្ត្រីឧទ្យានុរក្ស ដើម្បីជួយលើកស្ទួយកម្រិតជីវភាពរស់នៅរបស់សហគមន៍តំបន់ការពារធម្មជាតិ ដែលមានការ ជួយជ្រោមជ្រែងពីក្រសួងបរិស្ថាន ។
នាយកដែនជម្រកសត្វព្រៃភ្នំណាមលៀបន្តថា ក្រៅពីការចិញ្ចឹមសាកល្បងពួជជ្រូកធម្មជាតិ ឯកឧត្តម ខៀវ បូរិន អគ្គនាយកនៃអគ្គនាយកដ្ឋានសហគមន៍មូលដ្ឋាន នៃក្រសួងបរិស្ថាន បានចុះសិក្សាលទ្ធភាពផ្តល់ពួជមាន់ស្រុក ក្នុងពេលឆាប់ៗខាងមុខនេះ ដល់សហគមន៍តំបន់ការពារធម្មជាតិណាមលៀ ដើម្បីលើកស្ទួយកម្រិតជីវភាពសហគមន៍ ជាជួយលើកស្ទួយកម្រិតជីវភាពមន្ត្រីនៃដែនជម្រកសត្វព្រៃភ្នំណាមលៀរផងដែរ។
លោកវុធ សារុំ បន្តថា ដែនជម្រកសត្វព្រៃភ្នំណាមលៀពិតជារីករាយចំពោះគម្រោងចិញ្ចឹមជ្រូកពូជនេះ ហើយមន្ដ្រីឧទ្យានុរក្សក៏បានប្តេជ្ញាចូលរួមអនុវត្តន៍គម្រោងនេះឱ្យបានជោគជ័យ សំដៅបង្កើនប្រាក់ចំណូលក្នុងគ្រួសារ និងជីវភាពប្រចាំថ្ងៃរបស់មន្ត្រីឧទ្យានុរក្ស ព្រមទាំងជួយលើកស្ទួយកម្រិតជីវភាពរបស់ប្រជាសហគមន៍រស់នៅក្នុងតំបន់នោះផងដែរ ។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីមានប្រសាសន៍ថា មន្ទីរបានឯកភាព និងគោលការណ៍របស់ឯកឧត្តមរដ្ឋមន្ត្រី ហើយមន្ទីរមានផែនការពង្រីកការចិញ្ចឹមជ្រូកសម្រាប់ដែនជម្រកសត្វព្រៃទាំងប្រាំក្នុងខេត្ត និងសហគមន៍ ។
លោកថា ការបង្កើតកសិដ្ឋានចិញ្ចឹមជ្រូកនេះនឹងជួយដល់ជីវភាពរបស់ប្រជាសហគមន៍ និងមន្ត្រីឧទ្យានុរក្សបានយ៉ាងប្រសើរ ហើយក៏បម្រើឲ្យវិស័យទេសចរណ៍ផងដែរ ដោយសារបច្ចុប្បន្ននេះទីផ្សារជ្រូកជនជាតិមានតម្រូវការ និងតម្លៃខ្ពស់នាពេលបច្ចុប្បន្ន ៕
ចែករំលែកព័តមាននេះ