រាជធានីភ្នំពេញ ៖ ថ្នាក់ដឹកនាំគ្រឹះស្ថានហិរញ្ញវត្ថុនានាបានអះអាងថា ស្ថាប័នរបស់ខ្លួននឹងបង្កើនការប្រុងប្រយ័ត្ន និងបង្កើនសន្តិសុខនៅតាមគ្រឹះស្ថានរបស់ខ្លួន បន្ទាប់ពីមានករណីប្លន់ធនាគារ RHB Indochina ទាំងកណ្ដាលថ្ងៃ ត្រង់…
រាជធានីភ្នំពេញ ៖ ថ្នាក់ដឹកនាំគ្រឹះស្ថានហិរញ្ញវត្ថុនានាបានអះអាងថា ស្ថាប័នរបស់ខ្លួននឹងបង្កើនការប្រុងប្រយ័ត្ន និងបង្កើនសន្តិសុខនៅតាមគ្រឹះស្ថានរបស់ខ្លួន បន្ទាប់ពីមានករណីប្លន់ធនាគារ RHB Indochina ទាំងកណ្ដាលថ្ងៃ ត្រង់ កាលពីថ្ងៃទី២៣ សីហា នោះមក ។
អគ្គនាយកគ្រឹះស្ថានមីក្រូហិរញ្ញវត្ថុអម្រឹតលោក ជា ផល្លារិន បានមានប្រសាសន៍នាព្រឹកថ្ងៃទី២៤ សីហា ថា ករណីប្លន់ធនាគារ ដែលបានកើតឡើងកាលពីថ្ងៃទី២៣ ខែសីហា កន្លងមកនេះ ពុំមានអ្វីប៉ះពាល់ដល់វិស័យធនាគារ ឬបង្កក្ដីព្រួយបារម្ភដល់ប្រជាជនកម្ពុជានោះទេ ។
ទោះយ៉ាងណា លោកមានការសោកស្ដាយ ចំពោះហេតុការណ៍ប្លន់ធនាគារដែលបានកើតឡើងនៅរាជធានីភ្នំពេញទាំងកណ្តាលថ្ងៃត្រង់បែបនេះ ។ ទោះបីជាដូច្នេះក្ដី លោកបានបញ្ជាក់ប្រាប់ថា ហេតុការណ៍នេះគ្រាន់តែជារឿងដាច់ដោយឡែកមួយ ពុំមានអ្វីជះឥទ្ធិពលអាក្រក់ដល់វិស័យធនាគារ ឬមីក្រូហិរញ្ញវត្ថុនៅកម្ពុជានោះទេ ។
លោកបញ្ជាក់ថា ៖« ករណីប្លន់នេះមានការបាត់បង់ទឹកប្រាក់ក្នុងទំហំមួយតូចប៉ុណ្ណោះ បើធៀបនឹងទ្រព្យសកម្មរបស់ធនាគារ លើសពីនេះធនាគារនីមួយៗសុទ្ធតែមានការធានារ៉ាប់រងចំពោះគ្រោះហានិភ័យណាមួយ »។
លោក ជា ផល្លារិន ក៏បានអំពាវនាវដល់ពលរដ្ឋកម្ពុជា កុំមានការព្រួយបារម្ភចំពោះការបាត់បង់ថវិការបស់ខ្លួន ដែលបានដាក់តម្កល់នៅធនាគារនោះទេ ព្រោះគ្រប់ធនាគារសុទ្ធតែបានពង្រឹងនូវនិតិវិធីធ្វើការប្រចាំថ្ងៃរបស់ខ្លួន ទាំងផ្នែកកាមេរ៉ាសុវត្ថិភាព ការពង្រឹងសមត្ថភាពកងសន្តិសុខ ក៏ដូចជាការសហការយ៉ាងល្អជាមួយអាជ្ញាធរមានសមត្ថកិច្ច ។
ស្របពេលជាមួយគ្នានេះដែរ លោកបណ្ឌិត អុីន ចាន់នី ប្រធាននាយកប្រតិបត្តិធនាគារអេស៊ីលីដា បានមានប្រសាសន៍ថា ធនាគារអេស៊ីលីដា បានវិនិយោគលើប្រព័ន្ធសុវត្ថិភាពនេះរួចហើយ ដោយបានវិនិយោគច្រើនទាំងផ្នែកធនធានមនុស្ស និងសម្ភារបរិក្ខារនានា ។
លោកបណ្ឌិតថ្លែងថា ៖« យើងមិនរង់ចាំដល់ហេតុការណ៍កើតឡើង ទើបចាប់ផ្តើមការពារនោះទេ ។ ការវិនិយោគលើប្រព័ន្ធសុវត្ថិភាពជារឿងចាំបាច់មួយ ហើយយើងបានគិតគូរពីបញ្ហានេះជាប់ជាប្រចាំ ព្រោះសុវត្ថិភាពជាផ្នែកដ៏សំខាន់មួយនៃប្រព័ន្ធគ្រប់គ្រងរបស់យើង »។
លោកបន្តថា ៖« ហេតុការណ៍បែបនេះមិនមានអ្វីចម្លែកនោះទេ វាកើតមាននៅតាមបណ្តាប្រទេសនានានៅលើពិភពលោក ហេតុនេះអ្វីសំខាន់គឺយើងត្រូវត្រៀមបង្ការការពារជាមុន ដើម្បីការពារហានិភ័យណាមួយកើតឡើង »។លោកបន្ថែមថា ៖« អ្វីដែលកើតឡើងគឺយើងបានត្រៀមបង្ការវារួចហើយ យើងបានប្រុងប្រយ័ត្នជាមុនរួចហើយ »។
យោងតាមធនាគារជាតិនៃកម្ពុជា បច្ចុប្បន្នទ្រព្យសកម្មវិស័យធនាគារមានចំនួន១២៥ទ្រីលានរៀល ស្មើនឹង៣១ប៊ីលានដុល្លារ កើនឡើង៧៣ដង បើធៀបនឹងឆ្នាំ១៩៩៨ ។ ក្នុងនោះ ឥណទានសរុបដែលបានផ្តល់ទៅគ្រប់វិស័យមានចំនួន៧១ទ្រីលានរៀល ស្មើនឹង១៧ប៊ីលានដុល្លារ ខណៈប្រាក់បញ្ញើសរុបបានកើនឡើង៧៧ទ្រីលានរៀល ស្មើនឹង១៩ប៊ីលានដុល្លារ ។
ដោយឡែក វិស័យមីក្រូហិរញ្ញវត្ថុ បានទទួលប្រាក់បញ្ញើសរុបប្រមាណ៩,១ទ្រីលានរៀល ស្មើនឹងជាង២ពាន់លានដុល្លារ កើនឡើងប្រមាណ២៤,៧% និងបានផ្តល់ឥណទានប្រមាណ១៩,៦ទ្រីលានរៀល ស្មើនឹងប្រមាណជិត៥ពាន់លានដុល្លារ កើនឡើង៣៤,២%។
ធនាគារជាតិនៃកម្ពុជាក៏បានឲ្យដឹងទៀតថា គិតត្រឹមឆមាសទី១ឆ្នាំនេះ កម្ពុជាមានធនាគារពាណិជ្ជចំនួន៣៩ (សាខាធនាគារបរទេសមាន១២, ធនាគារក្នុងស្រុក១២ និងបុត្តសម្ព័ន្ធធនាគារមាន១៥) និងធនាគារឯកទេសចំនួន១៥ ក្នុងនោះធនាគាររដ្ឋ១ ។ ចំណែកគ្រឹះស្ថានមីក្រូហិរញ្ញវត្ថុសរុបមានចំនួន៧៧ ក្នុងនោះគ្រឹះស្ថានមីក្រូហិរញ្ញវត្ថុទទួលប្រាក់បញ្ញើមាន៧ និងគ្រឹះស្ថានឥណទានជនបទ ដែលទទួលបានវិញ្ញាបនបត្រពីធនាគារជាតិនៃកម្ពុជាមាន៣០២ ។
គួររំលឹកថា កាលពីថ្ងៃទី២៣ សីហា កន្លងមក មានករណីប្លន់ធនាគារ អ អេច ប៊ី ឥណ្តូឆៃណា សាខាម៉ៅសេទុង ទាំងកណ្តាលថ្ងៃត្រង់ ដែលមានទីតាំងនៅក្បែរសាលាវ៉ាន់ដា តាមបណ្តោយផ្លូវម៉ៅសេទុង ក្នុងសង្កាត់ទំនប់ទឹក ខណ្ឌចំការមន បង្កឱ្យមានការភ្ញើលផ្អើលយ៉ាងខ្លាំងនៅក្នុងរាជធានីភ្នំពេញ ។ ករណីប្លន់នេះ ក្រុមមានគ្នាប្រមាណពី៤ទៅ៥នាក់ ចូលទៅធ្វើសកម្មភាពភ្ជង់ប្លន់ បានប្រាក់រហូតទៅដល់ជាង១០ម៉ឺនដុល្លារ ៕
ចែករំលែកព័តមាននេះ