ខេត្តពោធិ៍សាត់ ៖ មានការភ្ញាក់ផ្អើលមួយបានកើតឡើងកាលពីវេលាម៉ោង១៦និង៥០នាទីរសៀលថ្ងៃទី២៥ ខែសីហា ឆ្នាំ២០១៨ ដោយសារមានបុរសម្នាក់ស្រវឹងស្រាជោគជាំ បើករថយន្ដធ្លាក់ទឹកស្ទឹង នៅភូមិកណ្ដៀង ឃុំកណ្ដៀង ស្រុកកណ្ដៀង…
ខេត្តពោធិ៍សាត់ ៖ មានការភ្ញាក់ផ្អើលមួយបានកើតឡើងកាលពីវេលាម៉ោង១៦និង៥០នាទីរសៀលថ្ងៃទី២៥ ខែសីហា ឆ្នាំ២០១៨ ដោយសារមានបុរសម្នាក់ស្រវឹងស្រាជោគជាំ បើករថយន្ដធ្លាក់ទឹកស្ទឹង នៅភូមិកណ្ដៀង ឃុំកណ្ដៀង ស្រុកកណ្ដៀង បណ្ដាលឲ្យលង់ស្លាប់នៅនឹងកន្លែងកើតហេតុ ។
សមត្ថកិច្ចមូលដ្ឋានឲ្យដឹងថា ជនរងគ្រោះឈ្មោះ ប៉ូច សោភា ភេទប្រុស អាយុ៣១ឆ្នាំ រស់នៅភូមិបឹងក្រាញ់ ឃុំស្វាយលួង ស្រុកកណ្ដៀង ។ នៅល្ងាចនោះគេឃើញជនរងគ្រោះបើករថយន្ដម៉ាកកាមរី ពណ៌ប្រផេះ ពាក់ស្លាកលេខភ្នំពេញ 2N – 8401 ក្នុងទិសដៅពីកើតទៅលិចលើផ្លូវគ្រួសក្រហមមួយខ្សែ ក្នុងភូមិកណ្ដៀង ឃុំកណ្ដៀង ។
គេឃើញជនរងគ្រោះបើករថយន្ដក្នុងល្បឿនលឿនរ៉េចង្កូតម្ដងទៅឆ្វេងម្ដងទៅស្ដាំ លុះទៅដល់ចំណុចកើតហេតុ ស្រាប់តែធ្លាក់ចូលក្នុងស្ទឹងលិចបាត់តែម្ដង ។ អ្នកស្រុកនៅទីនោះឃើញហេតុការណ៍នេះភ័យឆោឡោស្រែកហៅ អ្នកស្រុកអ្នកភូមិឲ្យមកជួយ ប៉ុន្តែទម្រាំមានអ្នកមកជួយលើករថយន្ដគាស់យកមនុស្សចេញហួសពេលទៅហើយ ។
សមត្ថកិច្ចឲ្យដឹងថា ស្ទឹងកណ្ដៀង គឺជាស្ទឹងតូចមានជម្រៅប្រមាណជិត០២ម៉ែត្រ ហើយមិនហូរខ្លាំង ដូចស្ទឹងពោធិ៍សាត់ទេ បើធ្លាក់ចូលស្ទឹងពោធិ៍សាត់វិញប្រហែលជារកមិនទាន់ឃើញភ្លាមទេព្រោះទឹកជ្រៅ និងហូរខ្លាំង ។ សំណាងដែរដែលក្នុងរថយន្ដមានតែម្នាក់ បើមាន៤ឬ៥នាក់ គឺត្រូវស្លាប់ទាំងអស់ជាមិនខាន ៕
ចែករំលែកព័តមាននេះ