រាជធានីភ្នំពេញ ៖ ប្រទេសថៃបាននិងកំពុងពង្រីកពាណិជ្ជកម្មរបស់ខ្លួនជាថ្មីទៀតតាមរយៈការរៀបចំព្រឹត្តិការណ៍លក់បញ្ចុះតម្លៃទាបបំផុតនៃផលិតផលខ្លួន ដែលធ្វើឲ្យអ្នកតំណាងផលិតកម្មរបស់កម្ពុជាសម្តែងការមិនសប្បាយចិត្ត ខណៈផលិតផលរបស់សហគ្រាសក្នុងស្រុកខ្វះការគាំទ្រ ។
បើតាមនាយកប្រតិបត្តិ Maga Sale លោកThanawat Maneekornjongsiri បានឲ្យដឹងកាលពីថ្ងៃទី២២ សីហា នៅក្នុងសន្និសីទសារព័ត៌មានស្តីពីព្រឹត្តិការណ៍តាំងពិព័រណ៍បញ្ចុះតម្លៃទាបបំផុតប្រចាំឆ្នាំថា ការរៀបចំពិព័រណ៍លក់ផលិតផលថៃដែលមានគុណភាពខ្ពស់ នឹងប្រព្រឹត្តទៅនៅថ្ងៃទី៣០ សីហា ដល់ថ្ងៃទី២ កញ្ញា ឆ្នាំ២០១៨ខាងមុខ ។ លោកបន្ដថា ៖« ព្រឹត្តិការណ៍នេះ គ្រោងរៀបចំជា៣ផ្នែក ក្នុងនោះផ្នែកទី១ មានផលិតផលថៃគ្រប់មុខ រួមមានស្បែកជើង ការបុបស្បែក សម្លៀកបំពាក់ របស់របរប្រើប្រាស់ក្នុង ផ្ទះ និងគ្រឿងអគ្គិសនី ។ ផ្នែកទី២ មានចំណីអាហារជាច្រើនមុខ និងច្រើនប្រភេទ តាមរសជាតិអាហារថៃ ដូចជា អាហារកំប៉ុង សាច់ជ្រូកអាំង សាច់ក្រក ប្រហិតសាច់ជ្រូក និងសាច់ត្រីជាដើម។ ចំណែកផ្នែកទី៣ នឹងដាក់តាំងផលិតផលគ្រឿងសំអាង ដោយមានគ្រឿងសំអាងម៉ាកល្បីៗជាច្រើនប្រភេទ ដើម្បីបំពេញតម្រូវការរបស់អតិថិជន »។
លោកបន្ថែមថា នេះជាលើកទី២ហើយ ក្នុងការពង្រីកធុរកិច្ចនៅកម្ពុជា ។ ជាពិសេសការពង្រីកទំនាក់ទំនងរវាងក្រុមអាជីករថៃ និងកម្ពុជា ដើម្បីផ្លាស់ប្តូរបទពិសោធន៍គ្នានៅក្នុងវិស័យពាណិជ្ជកម្ម ជាពិសេសការផ្តល់ទំនិញដែលមានគុណភាព ។ ទំហំពាណិជ្ជកម្មកម្ពុជា-ថៃកាលពីឆ្នាំមុនសម្រេចបានជាង៦ពាន់លានដុល្លារ ហើយប្រមុខថ្នាក់ដឹកនាំប្រទេសទាំងពីរ មានគោលដៅពង្រីកទំហំពាណិជ្ជកម្មឲ្យបាន១៥ពាន់លានដុល្លារនៅឆ្នាំ២០២០ ។ ទោះជាយ៉ាងនេះក្ដី មានអ្នកពេញចិត្ត និងអ្នកមិនពេញចិត្តចំពោះការវាយលុកទំនិញមកពីប្រទេសថៃនេះ ខណៈផលិតផលក្នុងស្រុកកំពុងខ្វះការគាំទ្រ ។
ប្រធានសម្ព័ន្ធសមាគមសហគ្រាសធុនតូច និងមធ្យម លោកឧកញ៉ា តែ តាំងប៉ បានមានប្រសាសន៍រិះគន់ក្រសួងពាណិជ្ជកម្ម ដែលបន្តអនុញ្ញាតឲ្យទំនិញថៃវាយលុកទីផ្សារកម្ពុជា ដោយលោកអះអាងថា ពាណិជ្ជករនៅតាមបណ្តាខេត្តបានព្រួយបារម្ភពីអាជីវកម្មរបស់ពួកគេ ដោយសារតែផលិតផលថៃ មិនត្រឹមតែវាយលុកនៅទីក្រុងទេ ប៉ុន្តែបានវាយលុកដល់ទីជនបទ តាមរយៈការដឹកជញ្ជូនទំនិញតាមរថយន្តទៅដល់បណ្តាស្រុកនៅទូទាំងប្រទេសតែម្ដង ។ លោកបន្តថា ៖« ទីផ្សារសេរី សមាហរណកម្មអាស៊ានយើងទទួលស្គាល់ ប៉ុន្តែយើងពិបាកនាំចេញទៅគេ តែគេវិញនាំចេញមកកម្ពុជាបានយ៉ាងងាយស្រួល »។ លោកថា ៖« គេដាក់ពន្ធទំនិញ និងរបាំងនានាដើម្បីទប់ស្កាត់ការនាំចូលពីកម្ពុជា ហេតុនេះយើងគួរមានរបាំងផងដែរ ដើម្បីធ្វើឲ្យទំហំពាណិជ្ជកម្មមានតុល្យភាពខ្លះ »។ ជាការពិត ទំហំពាណិជ្ជកម្មកម្ពុជាកាលពីឆ្នាំមុន ថៃបាននាំចូលកម្ពុជាជាង៥ពាន់លានដុល្លារ តែកម្ពុជានាំចូលប្រទេសថៃ មានទំហំទឹកប្រាក់ប្រមាណ៩០០លានដុល្លារអាមេរិកប៉ុណ្ណោះ ។
យ៉ាងណាក្ដី លោកបណ្ឌិត ម៉ី កល្យាណ ទីប្រឹក្សាឧត្តមក្រុមប្រឹក្សាសេដ្ឋកិច្ចជាតិ បានថ្លែងថា ស្ថិតក្នុងក្របខ័ណ្ឌនៃការធ្វើសមាហរណកម្មអាស៊ាន ការមានលំហូរផលិតផលឬទំនិញដោយសេរីជារឿងធម្មតាក្នុងសហគមន៍នេះ។ ហេតុនេះផលិតករក្នុងស្រុកគួរទទួលយកបញ្ហានេះ ហើយរិះគិតរកវិធីថ្មីៗដើម្បីបង្កើនការលក់ផលិតផលរបស់ខ្លួន ព្រោះនិន្នាការទីផ្សារមិននៅមួយកន្លែងទេ វាតែងតែមានការផ្លាស់ប្តូរ ។
លោកបន្តថា ៖« ការមានគំនិតច្នៃប្រឌិតថ្មី និងយុទ្ធសាស្ត្រទីផ្សារច្បាស់លាស់ជាងមុន និងបត់បែនតាមនិន្នាការសង្គម គួរតែប្រកាន់យកដោយសហគមន៍ផលិតក្នុងស្រុក »៕
ចែករំលែកព័តមាននេះ