រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួក២នាក់ ត្រូវប្រជាពលរដ្ឋវាយបែកក្បាលឈាមហូរស្រោចខ្លួន បន្ទាប់ពីចេញពីប្រឡងបាក់ឌុបបែកគំនិតនាំគ្នាឆក់ទូរស័ព្ទដៃពីបុរសម្នាក់បានសម្រេចនៅត្រង់ចំណុចមុខផ្សារTK តាមបណ្តោយផ្លូវ៥១៦ ក្នុងសង្កាត់បឹងកក់១ ខណ្ឌទួលគោក។ បានជិះម៉ូតូរត់គេចត្រូវម្ចាស់គេជិះដេញតាមនិងចាប់បានមកវិញនៅត្រង់ចំណុចក្បែរវិទ្យាល័យឥន្ទ្រទេវី តាមបណ្តោយផ្លូវ៥៩៤…
រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួក២នាក់ ត្រូវប្រជាពលរដ្ឋវាយបែកក្បាលឈាមហូរស្រោចខ្លួន បន្ទាប់ពីចេញពីប្រឡងបាក់ឌុបបែកគំនិតនាំគ្នាឆក់ទូរស័ព្ទដៃពីបុរសម្នាក់បានសម្រេចនៅត្រង់ចំណុចមុខផ្សារTK តាមបណ្តោយផ្លូវ៥១៦ ក្នុងសង្កាត់បឹងកក់១ ខណ្ឌទួលគោក។ បានជិះម៉ូតូរត់គេចត្រូវម្ចាស់គេជិះដេញតាមនិងចាប់បានមកវិញនៅត្រង់ចំណុចក្បែរវិទ្យាល័យឥន្ទ្រទេវី តាមបណ្តោយផ្លូវ៥៩៤ កែងនិងផ្លូវ៣១៧ ស្ថិតក្នុងសង្កាត់បឹងកក់ទី២ ខណ្ឌទួលគោក កាលពីវេលាម៉ោង៨យប់ថ្ងៃទី២១ ខែសីហា ឆ្នាំ២០១៨។
ជនសង្ស័យខាងលើឈ្មោះ គឹម ប្រុសពៅ ភេទប្រុស អាយុ១៦ឆ្នាំ មុខរបរសិស្ស ទើបចេញពីប្រឡងបាក់ឌុប ស្នាក់នៅសង្កាត់ផ្សារដេប៉ូ២ ខណ្ឌទួលគោក មានស្រុកកំណើតនៅ ខេត្តស្វាយរៀង និងបក្សពួកម្នាក់ទៀតរត់គេចខ្លួនបាត់ ជិះម៉ូតូមួយគ្រឿងម៉ាកហុងដាឌ្រីម ស៊េរី០១៨ ពណ៌ប្រផេះ ពាក់ស្លាកលេខ ភ្នំពេញ1HC-2448 ចំណែកជនរងគ្រោះឈ្មោះ ប៊ុន សុខហេង អាយុ១៧ឆ្នាំ ជាសិស្ស ទើបប្រឡងបាក់ឌុបហើយ ស្នាក់នៅសង្កាត់ទួលសង្កែ ខណ្ឌឬស្សីកែវ។
បើតាមសម្តីជនរងគ្រោះប្រាប់ឲ្យដឹងថា មុនកើតហេតុ រូបគាត់និងប្អូនស្រីបានជិះម៉ូតូមួយគ្រឿងម៉ាកស៊ុយស័រគីនិច ពណ៌ខ្មៅ ដោយឲ្យប្អូនស្រីជាអ្នកបើក ចំណែករូបគេអង្គុយពីក្រោយ ហើយធ្វើដំណើរតាមបណ្តោយផ្លូវ៥១៦ ពីកើតទៅលិច ។ លុះដល់ចំណុចកើតហេតុ រូបគាត់មានអ្នកទូរស័ព្ទមក ក៏ដកទូរស័ព្ទដៃម៉ាក អាយហ្វូនសឺវេនផ្លើស ពីក្នុងហោប៉ៅយកមកនិយាយ ខណៈពេលឈប់និយាយរកដាក់ទូរស័ព្ទដៃចូលក្នុងហោប៉ៅខោវិញ ស្រាប់តែលេចមុខសង្ស័យ រួមទាំងកប្សពួកម្នាក់ទៀតជិះម៉ូតូមកពីក្រោយ ហើយឆក់ទូរសព្ទដៃបានសម្រេចតែម្តង។
ជនរងគ្រោះបន្តថា ភ្លាមៗនោះជនសង្ស័យបានព្យាយាមជិះរត់គេចខ្លួន ខណៈជនរងគ្រោះក៏បានទាញប្អូនស្រីឲ្យចុះពីលើម៉ូតូ ហើយរូបគេឡើងបើកម៉ូតូជិះដេញតាមបណ្តើរហើយស្រែកថា «ចោរ»បណ្តើរ រហូតដល់ចំណុចកើតហេតុ ដោយជនរងសង្ស័យភ័យក៏ជិះម៉ូតូទៅបុកធុងទឹកកករបស់ប្រជាពលរដ្ឋដែលដាក់លក់នៅលើចិញ្ចើមផ្លូវ បណ្តាលឱ្យដួល រួចក៏ត្រូវប្រជាពលរដ្ឋនៅក្បែរនោះជួយចាប់ជនសង្ស័យបានម្នាក់ដែលឆក់ និងស្វាគមន៍ម្នាក់១ដៃមួ១ជើង បណ្តាលឲ្យបែកក្បាល ចំណែកឯបក្សពួកម្នាក់ទៀតជាអ្នកបើកម៉ូតូបានងើបរត់គេចខ្លួនបាត់ស្រមោលតែម្តង ។
នៅចំពោះមុខសមត្ថកិច្ចជនសង្ស័យខាងលើបានឆ្លើយសារភាពថា រូបគេពិតជាបានធ្វើសកម្មភាពឆក់ពិតប្រាកដមែន ហើយដំបូងឡើយរូបគេ គឺទើបតែចេញពីប្រឡងបាក់ឌុប រួចក៏បានមកជួបនឹងបក្សពួកដែលរត់គេចនោះ ហើយក៏បែកគំនិតនាំគ្នាចេញឆក់តែម្តង។
បច្ចុប្បន្នជនសង្ស័យ និងវត្ថុតាងត្រូវបានសមត្ថកិច្ចនាំខ្លួនមកសួរនាំនៅប៉ុស្តិ៍នគរបាលរដ្ឋបាលសង្កាត់បឹងកក់១ ដើម្បីកសាងសំណុំរឿងបញ្ជូនទៅអធិការដ្ឋាននគរបាលខណ្ឌទួលគោក រង់ចាំបញ្ជូនទៅតុលាការ ដើម្បីចាត់ការទៅតាមនីតិវិធី ៕
ចែករំលែកព័តមាននេះ