រាជធានីភ្នំពេញ ៖ អាជីវកម្មនានាដែលកំពុងអាស្រ័យផលនៅតាមមាត់ទន្លេ ចាប់ពីស្ពានជ្រោយចង្វា រហូតដល់ផ្សាររាត្រី នឹងតម្រូវឲ្យផ្លាស់ទីតាំងឆាប់ៗខាងមុខ ខណៈដីទីតាំងនេះ ត្រូវបានជួលឲ្យវិនិយោគិនចិនដើម្បីអភិវឌ្ឍន៍ជាមជ្ឈមណ្ឌលពាណិជ្ជកម្មចម្រុះ ។
បច្ចុប្បន្ន អាជីវកម្មដែលកំពុងរកស៊ីនៅតំបន់នោះរួមមាន ចំណតទូកទេសចរណ៍ ការិយាល័យក្រុមហ៊ុន និងភោជនីយដ្ឋានជាដើម ។
បើតាមម្ចាស់ទូកទេសចរណ៍ជាច្រើនដែលចតដឹកភ្ញៀវទេសចរនៅខាងមុខក្រុមប្រឹក្សាអភិវឌ្ឍន៍កម្ពុជា បានឲ្យដឹងថា ពួកគាត់កំពុងព្រួយបារម្ភពីការបាត់បង់ឱកាសរកស៊ី បើសិនជាត្រូវអាជ្ញាឲ្យចាកចេញ ។
លោក ឌឿន រ៉ាវី ម្ចាស់ទូកទេចរណ៍ រ៉ាវី បានឲ្យដឹងថា រហូតមកដល់ពេលនេះ អាជ្ញាធរមិនទាន់មានចំណាត់ការណាមួយនៅឡើយទេពាក់ព័ន្ធនឹងការជួលដីនេះឲ្យទៅវិនិយោគិនចិន ខណៈចំណតទូករបស់ពួកលោកបច្ចុប្បន្នក៏នៅលើទីតាំងដែលត្រូវអភិវឌ្ឍន៍នោះដែរ។ យ៉ាងនេះក្ដី លោកទទួលដំណឹងថា អាជ្ញាធរត្រៀមនឹងយកទូកទេសចរណ៍ទាំងអស់ដែលកំពុងចតនៅចំណតបច្ចុប្បន្ននេះទៅទីតាំងថ្មីដែលនៅឆ្ងាយពីទីតាំងចាស់ ។ លោក ឌឿន រ៉ាវី និយាយថា ៖« តាមខ្ញុំលឺតៗគ្នាថា អាជ្ញាធរត្រៀមយកទូកទេសចរណ៍ទាំងអស់ទៅដាក់នៅចំណតផែរបស់រដ្ឋ គឺនៅគីឡូម៉ែត្រលេខ៦ ដែលឆ្ងាយពីទីតាំងចាស់ ហើយបើសិនជាបែបនោះមែន ពួកយើងពិតជាប្រឈមនឹងបញ្ហាខ្លាំងណាស់ ព្រោះទីតាំងថ្មីនោះ នៅឆ្ងាយពីរាជធានី ហើយក៏មិនមានភ្ញៀវឯណាទៅជិះដែរ » ។ លោកបន្តថា គ្រាន់តែធ្វើដំណើរពីភ្នំពេញទៅទីតាំងថ្មីនោះ ភ្ញៀវអស់អារម្មណ៍ជិះទៅហើយ ដោយសារស្ទះផង ឆ្ងាយផង ហើយម្យ៉ាងទៀតក្រុមហ៊ុនភ្នាក់ងារទេសចរណ៍ ក៏មិនចង់រៀបចំភ្ញៀវជូនពួកលោកដែរ ដោយសារតែវានៅឆ្ងាយពេក ។
យ៉ាងណាក៏ដោយ លោកថា ៖« ពួកយើងនឹងសំណូមពរអាជ្ញាធររៀបចំកំពង់ផែ ឬចំណតថ្មីដែលនៅជិតនឹងកំពង់ផែចាស់ ដូចជានៅមុខផ្សាររាត្រីមាត់ទន្លេ ហើយសង់ចំណត់ទូកនៅត្រើយម្ខាង ដើម្បីផ្ដល់ភាពងាយស្រួលដល់ភ្ញៀវទេសចរជិះទូកកម្សាន្ដ និងទស្សនាទីក្រុងភ្នំពេញ »។
លោកបានបញ្ជាក់ថា បើសិនជាអាជ្ញាធរយកទូកទាំងអស់ទៅចតនៅគីឡូម៉ែត្រលេខ៦ ឬសង់កំពង់ផែនៅទីនោះមែន ការបើកទូកក្រោមស្ពានជ្រោយចង្វា អាចប្រឈមនឹងហានិភ័យ ដោយសារតែនៅក្រោមស្ពានទឹកហូរខ្លាំង ។ លោកថា ៖« នៅពេលបើកក្រោមស្ពាន វាប្រឈមហានិភ័យគ្រោះថ្នាក់ខ្ពស់ណាស់ ព្រោះទឹកហូរនៅកន្លែងនោះបញ្ច្រាសគ្នា អីចឹងបើសិនជាទូកមានបញ្ហាបច្ចេកទេស ត្រូវរលត់ម៉ាស៊ីន វានឹងបោកផ្ទប់ជាមួយស្ពាន ហើយវានឹងបង្កគ្រោះថ្នាក់ធំដល់ភ្ញៀវទេសចរ » ។
ម្ចាស់ភោជនីយដ្ឋានទន្លេសាប ដែលមានទីតាំងនៅជាប់នឹងកំពង់ផែទូកទេសចរណ៍ផងដែរ នោះបានឲ្យដឹងថា ទីតាំងដែលលោកកំពុងធ្វើអាជីវកម្មនេះ គឺជាកម្មសិទ្ធិរបស់លោកផ្ទាល់ ហើយវិនិយោគិនចិនក៏បានមកមើលទីតាំងនេះរួចហើយដែរ តែលោកបានបញ្ជាក់ថា លោកនឹងចាកចេញ បើសិនជាត្រូវថ្លៃគ្នា ។
លោកថា ៖« ខ្ញុំកាត់ថ្លៃ៣លានដុល្លារចំពោះទីតាំងខ្ញុំ ហើយខ្ញុំនឹងរុះរើចេញ បើសិនជាយើងនិយាយត្រូវគ្នា ព្រោះដីធ្លីនេះជាដីកម្មសិទ្ធិរបស់ខ្ញុំផ្ទាល់ » ។
តាមសេចក្តីប្រកាសព័ត៌មានរបស់កំពង់ផែស្វយ័តក្រុងភ្នំពេញ បានឲ្យដឹងថា ដីនៅទីតាំងនោះត្រូវបានជួលឲ្យវិនិយោគិនចិន រយៈពេល៥០ឆ្នាំ ក្នុងតម្លៃទឹកប្រាក់ជាង១៦លានដុល្លារ ដោយគិតចាប់ពីថ្ងៃទី២៩ ខែមិថុនា ឆ្នាំ២០១៨ រហូតដល់ថ្ងៃទី២៨ ខែមិថុនា ឆ្នាំ២០៦៨ ដែលមានកំណត់ក្នុងអនុក្រឹត្យលេខ៣២ អនក្រ.បក ចុះថ្ងៃទី៩ ខែមីនា ឆ្នាំ២០១៨ ស្ដីពីការធ្វើអនុបយោគទីតាំងដីនៅបណ្ដោយទន្លេសាប ពីស្ពានជ្រោយចង្វា មកដល់ផ្សាររាត្រី ។
សេចក្ដីប្រកាសបានបញ្ជាក់ថា គម្រោង មជ្ឈមណ្ឌលពាណិជ្ជកម្មចម្រុះនេះ រួមមាន អគារបណ្ដុំការិយាល័យពាណិជ្ជកម្ម, មជ្ឈមណ្ឌលសិល្បៈ, ទីធ្លាសម្ដែងវប្បធម៌សិល្បៈ, ទីធ្លាសម្រាប់បាញ់ទឹក, របាំទឹក និងផ្សារអណ្ដែតទឹក, សួនកំពង់ផែ, ទីធ្លាកម្សាន្ដ និងសួនច្បារសាធារណៈ, មជ្ឈមណ្ឌលទេសចរណ៍, រាជធានីភ្នំពេញដ៏ឆ្លាតវៃ, ការិយាល័យបច្ចេកវិទ្យា, អគារស្នាក់នៅរួមបែបវប្បធម៌, អគារស្នាក់នៅរួមបែបច្នៃប្រឌិតទំនើប និងសណ្ឋាគារលំដាប់ផ្កាយប្រាំ, សាលតាំងពិព័រណ៍, មជ្ឈមណ្ឌល បេតិកភណ្ឌអរូបី និងសិប្បកម្ម, វិចិត្រសាលបែបវប្បធម៌ព្រះពុទ្ធសាសនា និងសកម្មភាពផ្សេងៗទៀត ។
បច្ចុប្បន្ននេះ គម្រោងអភិវឌ្ឍន៍មជ្ឈមណ្ឌលនេះ ក៏បាននិងកំពុងដំណើរការបណ្ដើរៗដែរ ក្នុងនោះគេសង្កេតឃើញមានការរៀបចំបិទបាំងរបង ដើម្បីត្រៀមបើកការដ្ឋានសាងសង់នាពេលខាងមុខ ៕
ចែករំលែកព័តមាននេះ