សកម្មជនដីធ្លី៤នាក់ ត្រូវបានតុលាការដោះលែងពីពន្ធនាគារ
- ភ្នំពេញ
រាជធានីភ្នំពេញ ៖ សកម្មជនដីធ្លីបឹងកក់៤នាក់ ដែលក្នុងនោះមានអ្នកស្រី ទេព វន្នី ផង ត្រូវបានដោះលែងចេញពីពន្ធនាគារហើយ នៅយប់ថ្ងៃទី២០ សីហា…
រាជធានីភ្នំពេញ ៖ សកម្មជនដីធ្លីបឹងកក់៤នាក់ ដែលក្នុងនោះមានអ្នកស្រី ទេព វន្នី ផង ត្រូវបានដោះលែងចេញពីពន្ធនាគារហើយ នៅយប់ថ្ងៃទី២០ សីហា ២០១៨ នេះ។ យោងតាមព្រះរាជក្រឹត្យរបស់ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា លើកលែងទោសអ្នកស្រី ទេព វន្នី អ្នកស្រី ហេង មុំ អ្នកស្រី បូ ឆវី និង អ្នកស្រី ហេង ចន្ថា ដែលសុទ្ធសឹងជាសកម្មជនដីធ្លីបឹងកក់ និងតាមសំណើរបស់សម្តេចតេជោនាយករដ្ឋមន្ត្រី ផងនោះ។
នៅម៉ោងប្រមាណជិត៨យប់ថ្ងៃទី២០ សីហា នេះដែរ លោក គុជ គឹមឡុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចេញដីកាសម្រេចធ្វើការដោះលែង សកម្មជនដីធ្លីបឹងកក់ទាំង៤នាក់នោះហើយ ។ គួររំលឹកផងដែរថាអ្នកស្រី ទេព វន្នី ត្រូវបានចាប់ឃុំខ្លួន កាលពីថ្ងៃទី១៥ ខែសីហា ឆ្នាំ២០១៦ ពាក់ព័ន្ធនឹងបទចោទប្រកាន់ប្រមាថអ្នករាជការសាធារណៈដោយមានស្ថានទម្ងន់ទោស និងបទហិង្សាដោយចេតនាមានស្ថានទម្ងន់ទោស។
ក្នុងបទប្រមាថអ្នករាជការសាធារណៈ និងបទប្រឆាំងអ្នករាជការសាធារណៈដោយមានស្ថានទម្ងន់ទោស អ្នកស្រី ទេព វន្នី ត្រូវបានផ្តន្ទាទោសកំណត់ចំនួន០៦ខែ តាមអំណាចសាលដីកាលេខ៣៩៤ ចុះថ្ងៃទី០៨ ខែធ្នូ ឆ្នាំ២០១៧ របស់តុលាការកំពូល។ ជាមួយគ្នានោះ អ្នកស្រី ទេព វន្នី ត្រូវបានផ្តន្ទាទោសដាក់ពន្ធនាគារ២ឆ្នាំ៦ខែ ពីបទហិង្សាដោយចេតនាមានស្ថានទម្ងន់ទោស តាមអំណាចសាលដីកាលេខ៥១ ចុះថ្ងៃទី០៧ ខែកុម្ភៈ ឆ្នាំ២០១៨ របស់តុលាការកំពូល។
ស្ត្រីបឹងកក់៣នាក់ទៀត គឺអ្នកស្រី ហេង មុំ អ្នកស្រី បូឆវី និងអ្នកស្រី គង់ ចន្ថា ក៏ត្រូវបានផ្តន្ទាទោសក្នុងសំណុំរឿងប្រមាថអ្នករាជការសាធារណៈ និងបទប្រឆាំងអ្នករាជការសាធារណៈដោយមានស្ថានទម្ងន់ទោស ហើយត្រូវតុលាការផ្តន្ទាទោសដាក់ពន្ធនាគារ៦ខែ តែស្ត្រីសកម្មជនដីធ្លីបឹងកក់ទាំង៣នាក់នេះ មិនត្រូវបានចាប់ឃុំខ្លួននៅពន្ធនាគារទេ។
សកម្មជនដីធ្លីបឹងកក់គឺអ្នកស្រី ទេព វន្នី បានជាប់ឃុំឃាំងអស់រយៈពេល២ឆ្នាំ៥ថ្ងៃ គិតចាប់ពីថ្ងៃចាប់ឃុំខ្លួនថ្ងៃទី១៥ ខែសីហា ឆ្នាំ២០១៦ ។ ក្រុមសកម្មជនដីធ្លីបឹងកក់ ធ្វើដំណើរទាំងយប់ទៅទទួលអ្នកស្រី ទេព វន្នី នៅពន្ធនាគារព្រៃសទាំងយប់ ដើម្បីទទួលអ្នកស្រី ទេព វន្នី៕
ចែករំលែកព័តមាននេះ