ខេត្តត្បូងឃ្មុំ ៖ រថយន្តស៊េរីទំនើប១គ្រឿងម៉ាកកាមរីហាយប្រ៊ីត ពណ៌ទឹកមាស ពាក់ស្លាកលេខ ភ្នំពេញ 2W-2191 បានប្រើប្រាស់ល្បឿនលឿនក្នុងទិសដៅពីលិចទៅកើតហើយបានជ្រុលទៅបុកស្លាកគណៈបក្សខ្មែររួបរួមជាតិនៅជាប់ផ្លូវជាតិលេខ៧ដូចរន្ទះ ។ ហេតុការណ៏នោះកើតឡើងនៅវេលាម៉ោង៩និង៤៥នាទីយប់ថ្ងៃទី១៨…
ខេត្តត្បូងឃ្មុំ ៖ រថយន្តស៊េរីទំនើប១គ្រឿងម៉ាកកាមរីហាយប្រ៊ីត ពណ៌ទឹកមាស ពាក់ស្លាកលេខ ភ្នំពេញ 2W-2191 បានប្រើប្រាស់ល្បឿនលឿនក្នុងទិសដៅពីលិចទៅកើតហើយបានជ្រុលទៅបុកស្លាកគណៈបក្សខ្មែររួបរួមជាតិនៅជាប់ផ្លូវជាតិលេខ៧ដូចរន្ទះ ។ ហេតុការណ៏នោះកើតឡើងនៅវេលាម៉ោង៩និង៤៥នាទីយប់ថ្ងៃទី១៨ សីហា ២០១៨ ក្នុងភូមិទន្លេបិតលើ ឃុំទន្លេបិទ ស្រុកត្បូងឃ្មុំ បណ្តាលឲ្យស្លាប់ម្នាក់ និងរបួសធ្ងន់ ចំណែករថយន្តបានរងការខូចខាតជាដំណំផងដែរ ។
នគរបាលចរាចរណ៏នៃអធិការដ្ឋាននគរបាលស្រុកត្បូងឃ្មុំប្រាប់ឲ្យដឹងថា រថយន្តខាងលើបើកបរដោយឈ្មោះ កែវ សីហា ភេទប្រុស អាយុ២៧ឆ្នាំ នៅភូមិជើងខាល ឃុំមង់រៀវ ស្រុកត្បូងឃ្មុំ (របួសធ្ងន់)និងអ្នករួមដំណើរឈ្មោះ លី សំណាង ភេទប្រុស អាយុ៣៦ឆ្នាំ នៅភូមិច្រាំងចំរេះ១ សង្កាត់ច្រាំងចំរេះ១ខណ្ឌឫស្សីកែវ រាជធានីភ្នំពេញ បានស្លាប់ពេលបញ្ជូនទៅសង្គ្រោះនៅមន្ទីរពេទ្យខេត្តកំពង់ចាម ។
នគរបាលចរាចរណ៏ប្រាប់បន្តថា នៅពេលមុនកើតហេតុរថយន្តទំនើបនេះបានបើកបរក្នុងទិសដៅ
ពីលិចមកកើតដោយបានប្រើប្រាស់ល្បឿនលឿន ស្របពេលដែលបើកមកដល់ត្រង់ចំណុចគីឡូលេខ១២២-១២៣ ស្រាប់តែបែកកង់ហើយបានរ៉េចង្កូតទៅបុកស្លាកគណៈបក្សខ្មែររួបរួមជាតិពេញទំហឹងបណ្តាលឲ្យរថយន្តបានរងការខូចខាតជាដំណំ ភ្លាមៗនោះបណ្តាលឲ្យស្លាប់អ្នកនៅអង្គុយអែបអ្នកបើកបរ និងអ្នកបើកបររថយន្តរងរបួសធ្ងន់ ។
ក្រោយកើតហេតុកម្លាំងនគរបាលប៉ុស្តិ៍រដ្ឋបាលទន្លេបិទបានចុះទៅដល់ និងបានហៅជំនាញមកពិនិត្យ ជនរងគ្រោះត្រូវបានប្រញាប់ដឹកទៅសង្គ្រោះនៅមន្ទីរពេទ្យខេត្តកំពង់ចាម ។ មូលហេតុដែលបណ្តាលឲ្យគ្រោះថ្នាក់នេះដោយសារតែកត្តាយានយន្ត ហើយនាយប់ថ្ងៃដដែលរថយន្តត្រូវបានស្ទូចយកទៅរក្សាទុកនៅអធិការដ្ឋាននគរបាលស្រុកត្បូងឃ្មុំដើម្បីដោះស្រាយតាមច្បាប់ ៕
ចែករំលែកព័តមាននេះ