រាជធានីភ្នំពេញ ៖ ចៅក្រមសើុបសួរសាលាដំបូងរាជធានីភ្នំពេញ លោក ធាម ច័ន្ទពិសិដ្ឋ កាលពីល្ងាចថ្ងៃទី១៦ ខែសីហា បានសម្រេចឃុំខ្លួនស្ត្រីជនជាតិចិនម្នាក់ ដែលបើករថយន្តបំបុកចោរឆក់ទូរស័ព្ទដៃបណ្តាលឱ្យស្លាប់…
រាជធានីភ្នំពេញ ៖ ចៅក្រមសើុបសួរសាលាដំបូងរាជធានីភ្នំពេញ លោក ធាម ច័ន្ទពិសិដ្ឋ កាលពីល្ងាចថ្ងៃទី១៦ ខែសីហា បានសម្រេចឃុំខ្លួនស្ត្រីជនជាតិចិនម្នាក់ ដែលបើករថយន្តបំបុកចោរឆក់ទូរស័ព្ទដៃបណ្តាលឱ្យស្លាប់ និងរបួស ដាក់ពន្ធនាគារប៉េហ្សុីជាបណ្តោះអាសន្ន ។ ស្ត្រីជនជាតិចិនរូបនេះឈ្មោះ ថាង យៀន អាយុ២៦ឆ្នាំ មុខរបរលក់ដូរ ស្នាក់នៅផ្ទះជួលគ្មានលេខ ផ្លូវលំ សង្កាត់ទឹកថ្លា ខណ្ឌសែនសុខ បានត្រូវកញ្ញា វ៉ា សក្តា ព្រះរាជអាជ្ញារងអមសាលាដំបូងរាជធានីភ្នំពេញចោទប្រកាន់ចំនួន៣បទល្មើស ៖
១-បទហិង្សាដោយចេតនាមានស្ថានទម្ងន់ទោស តាមមាត្រា២១៨ ២-បទហិង្សាដោយចេតនាមានស្ថានទម្ងន់ទោស ដោយសារមរណភាពនៃជនរងគ្រោះ តាមមាត្រា២២៤នៃក្រមព្រហ្មទណ្ឌ និង ៣-បទបើកបរដោយគ្មានប័ណ្ណអនុញ្ញាត តាមមាត្រា៧៥នៃច្បាប់ស្តីពីចរាចរណ៍ផ្លូវគោក។
គួររំឭកថា កាលពីរសៀលថ្ងៃទី១៥ ខែសីហាកន្លងទៅ នគរបាលខណ្ឌចំការមនបានបញ្ជូនស្ត្រីជនជាតិចិនម្នាក់នេះ ពាក់ព័ន្ធនឹងករណីបើក រថយន្តដេញបំបុកជនសង្ស័យ២នាក់ដែលបានធ្វើសកម្មភាពឆក់ទូរស័ព្ទដៃ បណ្តាលឲ្យម្នាក់ស្លាប់ និងម្នាក់រងរបួសធ្ងន់ ទៅកាន់សាលាដំបូងរាជធានីភ្នំពេញ ។
សកម្មភាពឆក់ទូរស័ព្ទនេះ បានកើតឡើងកាលពីវេលាម៉ោង១២និង១០នាទីយប់រំលងអធ្រាត្រឈានចូលថ្ងៃទី១២ ខែសីហា នៅចំណុចកែងរវាងផ្លូវលេខ១២៣និងផ្លូវលេខ៤៥៦ មុខផ្ទះលេខ៥៤ ភូមិ៤ សង្កាត់ទួលទំពូងទី១ ខណ្ឌចំការមន ។ បន្ទាប់ពីកើតហេតុ នគរបាលខណ្ឌចំការមន ក៏បានឃាត់ខ្លួនស្ត្រីជនជាតិចិនម្នាក់ខាងលើពីបទប្រព្រឹត្តមនុស្សឃាតដោយអចេតនា ។
ជនសង្ស័យឆក់ទូរស័ព្ទដៃទាំង២នាក់នេះម្នាក់ឈ្មោះ សារុន ពិសិដ្ឋ ភេទប្រុស អាយុ២៨ឆ្នាំ ស្នាក់នៅផ្ទះលេខ២៥០ ផ្លូវលេខ៤៦០ ភូមិ៤ សង្កាត់ទួលទំពូងទី១ ខណ្ឌចំការមន រងរបួសធ្ងន់ និងម្នាក់ឈ្មោះ បេ សុភាដេវីត ភេទប្រុស អាយុ២៤ឆ្នាំ ស្នាក់នៅផ្ទះលេខ៣២A ផ្លូវលេខ២៨០ ភូមិ៥ សង្កាត់បឹងកេងកងទី២ខណ្ឌចំការមន ស្លាប់នៅមន្ទីរពេទ្យ ។
សមត្ថកិច្ចឲ្យដឹងថា ជាមួយនឹងការឃាត់ខ្លួនស្ត្រីជនជាតិចិនរូបនេះ នគរបាលក៏បានដកហូតម៉ូតូ១គ្រឿងម៉ាកស្គូពី ពណ៌ស ពាក់ផ្លាកលេខ ភ្នំពេញ ១CL-៧២៤១ ជារបស់ជនសង្ស័យ រថយន្តឡិចសុីសRX-៣០០ ពណ៌ស ពាក់ផ្លាកលេខ ភ្នំពេញ ២AN-៩៧៤៥ ជារបស់ស្ត្រីជនជាតិចិន និងទូរស័ព្ទដៃ១គ្រឿងម៉ាកMeitu ពណ៌ខ្មៅលាយបៃតង (បែកអេក្រង់ខ្ទេច ) ។
គួរបញ្ជាក់ថា ជនសង្ស័យទាំង២នាក់ជិះម៉ូតូ១គ្រឿងឌុបគ្នា លុះមកដល់មុខផ្ទះលេខ៥៤ឃើញស្ត្រីជនជាតិចិន២នាក់ឈប់រថយន្តនិយាយទូរស័ព្ទ ដោយចំហកញ្ចក់ខាងមុខផ្នែកខាងឆ្វេង ក៏ធ្វើសកម្មភាពឆក់យកទូរស័ព្ទបានសម្រេច រួចបើកម៉ូតូគេចខ្លួន ។
ភ្លាមនោះ ស្ត្រីជនជាតិចិនឈ្មោះ ថាង យៀនដែលជាម្ចាស់ទូរស័ព្ទ បានបើករថយន្តដេញតាមបំបុកម៉ូតូពីក្រោយបណ្តាលឲ្យដួលខ្ទាតទៅផ្ទប់នឹងជញ្ជាំងរបងផ្ទះលេខ៣៩ ចំណុចកែងរវាងផ្លូវលេខ១២៣និងផ្លូវលេខ៤៥៦ បណ្តាលឲ្យរងរបួសធ្ងន់ និងត្រូវបានសមត្ថកិច្ចបញ្ជូនទៅមន្ទីរពេទ្យមិត្តភាពខ្មែរ-សូវៀត ។
លុះនៅវេលាម៉ោង២និង៥០នាទីរំលងអធ្រាត្រឈានចូលថ្ងៃទី១៣ ខែសីហា ជនសង្ស័យឈ្មោះ បេ សុភាដេវីត បានស្លាប់នៅមន្ទីពេទ្យ ហើយសពត្រូវបានតម្កល់ទុករង់ចាំក្រុមគ្រួសារមកទទួលយក ។ចំណែកជនម្នាក់ទៀតឈ្មោះ សារុន ពិសិដ្ឋ កំពុងស្ថិតនៅក្នុងការសង្គ្រោះនៅមន្ទីរពេទ្យ ៕
ចែករំលែកព័តមាននេះ