អាមេរិក ៖ តាមប្រភពព័ត៌មាន Oddity Central បានឲ្យដឹងថា បុរសម្នាក់មកពីប្រទេសហុងឌូរ៉ា ទៅធ្វើការនៅអាមេរិក បានធ្វើពុតជាស្លាប់ ដើម្បីកុំឲ្យប្រពន្ធមកទារលុយជារៀងរាល់សប្តាហ៍ពេក។…
អាមេរិក ៖ តាមប្រភពព័ត៌មាន Oddity Central បានឲ្យដឹងថា បុរសម្នាក់មកពីប្រទេសហុងឌូរ៉ា ទៅធ្វើការនៅអាមេរិក បានធ្វើពុតជាស្លាប់ ដើម្បីកុំឲ្យប្រពន្ធមកទារលុយជារៀងរាល់សប្តាហ៍ពេក។
Danny Gonzalez អាយុ២៧ឆ្នាំ បានប្រាប់អ្នកសារព័ត៌មានថា ប្រពន្ធរបស់លោកដែលរៀបការជាមួយគ្នាកាលពី២ឆ្នាំមុន និងកំពុងតែនៅប្រទេសកំណើត ចេះតែមកទារលុយលោកជារៀងរាល់សប្តាហ៍មិនចេះដាច់។ បើទោះបីជាលោកឲ្យលុយច្រើនយ៉ាងណាក៏ដោយ ក៏នៅតែមិនចេះចប់មិនចេះហើយ។ នាងតែងតែប្រាប់ថា ទូរស័ព្ទរបស់នាងត្រូវបានចោរលួចបាត់។ បើគិតតាំងពីដើមមក Gonzalez បានឲ្យទូរស័ព្ទទៅនាងអស់៨គ្រឿងហើយ។
ដោយសារតែទ្រាំមិនបាន ប្តីនៅអាមេរិករូបនេះ ក៏សម្រេចចិត្តធ្វើពុតជាស្លាប់ ដោយថតរូបរបស់ខ្លួនមានសំឡីសញាត់ចូលក្នុងរន្ធច្រមុះ ខណៈដែលកំពុងដេកលើគ្រែគ្រប់ក្រណាត់ស។ ក្រោយពីបានថតហើយ លោកក៏ផ្ញើរូបនោះទៅកាន់ប្រពន្ធរបស់ខ្លួន ធ្វើដូចជាស្លាប់មែនទែន។
នាងជាប្រពន្ធបានយករូបនោះទៅឲ្យខាងទូរទស្សន៍ក្នុងស្រុកបង្ហោះផ្សាយឲ្យញាតិ មិត្តប្រុសស្រីដឹងជាព័ត៌មាន។ មានមនុស្សជាច្រើនបានសង្កេតឃើញថា បុរសនោះធ្វើពុតជាស្លាប់ ដោយសារតែមុខនៅប្រឹង និងក្រណាត់សតាមពិត គឺជាភួយលើគ្រែ។
មិនយូរប៉ុន្មាន Gonzalez ក៏ចេញមុខបកស្រាយពីមូលហេតុដែលធ្វើបែបនេះ។ បើទោះបីជាមានអ្នកខ្លះយល់អារម្មណ៍របស់ប្តីកំពូលល្បិចម្នាក់នេះក៏ដោយ ក៏មានមនុស្សភាគច្រើនហួសចិត្តនឹងទង្វើបែបនេះ។ សាច់ញាតិរបស់ Gonzalez ចាត់ទុកថា វាជាទង្វើអកត្តញ្ញូមួយ ដែលមិនគិតពីអារម្មណ៍ម្តាយ៕
ចែករំលែកព័តមាននេះ