រាជធានីភ្នំពេញ ៖ បុរសម្នាក់ជិះម៉ូតូបត់ឆ្វេងឆ្លងផ្លូវខ្វះការប្រុងប្រយ័ត្នត្រូវរថយន្តឡិចស៊ិស RX-300 មួយគ្រឿងបានបើកបុកយ៉ាងពេញទំហឹងបណ្តាលអោយបុរសរូបនោះបោកក្បាលហូរឈាមស្លាប់នៅនឹងកន្លែងយ៉ាងអាណោចអាធ័ម ។ ហេតុការណ៍នេះដែរបានកើតឡើងនៅវេលាម៉ោង១១និង១៥នាទីយប់ ថ្ងៃទី១៦ ខែសីហា ឆ្នាំ២០១៨ ភូមិដំណាក់៣ សង្កាត់ស្ទឹងមានជ័យ៣ ខណ្ឌមានជ័យ ។
សពជនរងគ្រោះមានឈ្មោះ ញ៉ែម តុល ភេទប្រុស អាយុ២៣ឆ្នាំ មុខរបរកម្មករោងចក្រស្នាក់នៅផ្ទះជួលម្តុំរោងចក្រដំបូលខៀវ សង្កាត់ចោមចៅ ខណ្ឌពោធ៍សែនជ័យ មានស្រុកកំណើតនៅភូមិក្របៅ ឃុំក្របៅ ស្រុកកំចាយមារ ខេត្តព្រៃវែង ជិះម៉ូតូម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ព្រៃវែង 1L-5502 ។
តាមប្រភព័ត៌មានពីកន្លែងកើតហេតុបានអោយដឹងថា មុនពេលកើតហេតុគេបានឃើញបុរសខាងលើមិនដឹងថា គោលបំណងទៅណានោះទេគឺបានជិះម៉ូតូម៉ាកហុងដាឌ្រីមបានធ្វើដំណើរតាមផ្លូវវ៉េងស្រេងក្នុងទិសដៅពីកើតទៅលិច ខណៈមកដល់ចំណុចកើតហេតុក៏បត់ឆ្វេងឆ្លងផផ្លូវចូលទៅផ្លូវបេតុងដីថ្មី តែពេលនោះម៉ូតូឆ្លងដល់ពាក់កណ្តាលផ្លូវក៏ស្រាប់តែមានរថយន្តឡិចស៊ិស RX-300 មិនចាំស្លាកលេខមួយគ្រឿង បានធ្វើដំណើរតាមផ្លូវវ៉េងស្រេងក្នុងទិសដៅពីលិចទៅកើតបញ្ច្រាសទិសគ្នា ហើយល្បឿនលឿនផងនោះបានជ្រុលទៅបុកនឹងម៉ូតូចំពាក់កណ្តាលពេញបណ្តាលអោយបុរសជាអ្នកបើកម៉ូតូហោះផ្លោងបោកក្បាលទៅនឹងផ្លូវហូរឈាមស្លាប់មួយរំពិចតែម្តង ។
ដោយឡែករថយន្តវិញនៅពេលបង្កគ្រោះថ្នាក់រួចហើយគឺមិនបានឈប់ដោះស្រាយនោះទេគឺព្យាយាមបើករថយន្តរត់គេចខ្លួនបាត់ស្រមោលតែម្តង ។ ក្រោយពេលកើតហេតុសមត្ថកិច្ចមូលដ្ឋានបានចុះទៅកន្លែងកើតហេតុរួចហើយបានទំនាក់ទំនងហៅខាងជំនាញ់ចរាចរណ៍ក្រុងអោយមកធ្វើលិខិតប្រគល់សពជនរងគ្រោះអោយទៅក្រុមគ្រួសារយកទៅធ្វើបុណ្យនៅស្រុកកំណើតខេត្តព្រៃវែង ។
ចំណែកម៉ូតូវិញត្រូវបានសមត្ថកិច្ចយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ។ រីឯបងប្អូនជនរងគ្រោះសូមអោយសមត្ថកិច្ចជំនាញពាក់ព័ន្ធជួយឆែកកាមេរ៉ា
សុវត្ថិភាពមើលដើម្បីស្វែងរករថយន្តបង្កចូលខ្លួនទៅធ្វើការដោះស្រាយតាមច្បាប់ ៕
ចែករំលែកព័តមាននេះ