ខេត្តព្រះសីហនុ ៖ ព័ត៌មានបឋមក្រោមបទបញ្ជាពីសំណាក់លោកឧត្តមសេនីយ៍ទោ ជួន ណារិន្ធ ស្នងការនគរបាលខេត្តព្រះសីហនុកម្លាំងសមត្ថកិច្ចចម្រុះបានចុះបង្ក្រាបករណីជួញដូរ និង ប្រើប្រាស់គ្រឿងញៀននៅក្នុងក្លឹបស្កាយឡាញ កាលពីវេលាម៉ោង២ឈានចូលថ្ងៃទី១៦ ឧសភា…
ខេត្តព្រះសីហនុ ៖ ព័ត៌មានបឋមក្រោមបទបញ្ជាពីសំណាក់លោកឧត្តមសេនីយ៍ទោ ជួន ណារិន្ធ ស្នងការនគរបាលខេត្តព្រះសីហនុកម្លាំងសមត្ថកិច្ចចម្រុះបានចុះបង្ក្រាបករណីជួញដូរ និង ប្រើប្រាស់គ្រឿងញៀននៅក្នុងក្លឹបស្កាយឡាញ កាលពីវេលាម៉ោង២ឈានចូលថ្ងៃទី១៦ ឧសភា ២០១៨ ។
កិច្ចប្រតិបត្តិការនោះដឹកនាំផ្ទាល់ដោយ លោក លឹម ប៊ុនហេង ព្រះរាជអាជ្ញារងអម សាលាដំបូងខេត្តព្រះសីហនុដែលមានការិយាល័យប្រឆាំងគ្រឿងជាម្ចាស់ករណីបានធ្វើការបង្ក្រាបជាក់ស្តែងនៅក្នុងក្លឹបស្កាយឡាញ ស្ថិតនៅសង្កាត់៤ ក្រុងខេត្តព្រះសីហនុនេះ ។
ជាលទ្ធផលបានធ្វើការឃាត់បណ្តោះអាសន្នជនសង្ស័យចំនួន៥៣នាក់ ស្រី៧នាក់ ក្នុងនោះ ជនជាតិចិន១០នាក់ ឥណ្ឌូនេស៊ី១៧នាក់ កូរ៉េ២នាក់ និងជនជាតិខ្មែរចំនួន២៤នាក់ ព្រមទាំងដកហូតបានថ្នាំញៀន និងសម្ភារសម្រាប់ប្រើប្រាស់គ្រឿងញៀនមួយចំនួន ។
តាមសម្តីសមត្ថកិច្ចនគរបាលការិយាល័យប្រឆាំងគ្រឿងញៀនខេត្តព្រះសីហនុបានឲ្យដឹងថា នេះជាយុទ្ធនាការឆ្មក់បង្ក្រាបទីតាំងចែកចាយ និងប្រើប្រាស់ថ្នាំញៀនទ្រង់ទ្រាយដ៏ធំមួយដែលមិនធ្លាប់មានក្នុងរង្គសាលស្កាយឡាញ (បាឌីស្កូ) នាក្រុងព្រះសីហនុ ។ ការឃាត់ខ្លូនមនុស្ស៥៣នាក់នោះភាគច្រើនជាបុគ្គលិកបម្រើការងារក្នុងកាស៊ីណូ ព្រមទាំងពលរដ្ឋខ្មែរចំនួន២៤នាក់ដែលចូលទៅលេង ។ វត្ថុតាងចាប់យកថ្នាំញៀនខេតាមីន និងអិចស្តាស៊ីចំនួន២៦កញ្ចប់ ដបថ្នាំញៀនសម្រាប់លាយជាមួយទឹក៤ដប ។
ក្រោយពេលឃាត់មនុស្សរាប់សិបនាក់ខាងលើនេះសមត្ថកិច្ចនគរបាលជំនាញបានធ្វើតេស្ដ មនុស្សទាំងអស់សុទ្ធតែមានផ្ទុកសារធាតុថ្នាំញៀន ។ ក្នុងនោះដែរមានមនុស្សមួយចំនួនដែលបានកំពុងប្រើប្រាស់ ហើយត្រូវបានកម្លាំងសមត្ថកិច្ចចាប់ជាក់ស្តែងតែម្តង ។ បុរសម្នាក់ក្នុងចំណោមមនុស្ស៥៣នាក់បានរាយការណ៍ប្រាប់សមត្ថកិច្ចថា ថ្នាំញៀនទាំងអស់ដែលពួកគេបានយកមកប្រើប្រាស់នេះ គឺទិញនៅក្នុងរង្គសាលនោះតែម្តង ។ មនុស្សទាំង៥៣នាក់នោះសមត្ថកិច្ចកំពុងធ្វើការសាកសួរ ដើម្បីរកបទល្មើសពាក់ព័ន្ធគ្រឿងញៀនសម្រាប់កសាងសំណុំរឿងបញ្ជូនទៅកាន់សាលាដំបូងខេត្តតាមនីតិវិធី ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុបាននិងកំពុងបញ្ជាកម្លាំងជំនាញគ្រប់ផ្នែក គ្រប់ការិយាល័យឲ្យចុះស្រាវជ្រាវ និងសហការណ៍ជាមួយព្រះរាជអាជ្ញានៃអយ្យការអមសាលាដំបូងខេត្តចេញបង្ក្រាបដូចភ្លៀងរលឹម មិនលើកលែងជាដាច់ខាត ចំពោះជនណា បុគ្គលណាប្រព្រឹត្តបទល្មើសផ្ទុយ និងច្បាប់នៅព្រះរាជាណាចក្រកម្ពុជានោះឡើយ ៕
ចែករំលែកព័តមាននេះ