រាជធានីភ្នំពេញ ៖ នៅរសៀលថ្ងៃទី១៥ សីហា កម្លាំងសមត្ថកិច្ចនគរបាលខណ្ឌចំការមនបានបញ្ជូនខ្លួនស្ត្រីជនជាតិចិនម្នាក់ ដែលពាក់ព័ន្ធនឹងករណីបើករថយន្តដេញបំបុកជនសង្ស័យ២នាក់ថាបានធ្វើសកម្មភាពឆក់ទូរស័ព្ទដៃ បណ្តាលឲ្យម្នាក់ស្លាប់ និងម្នាក់រងរបួសធ្ងន់ ទៅកាន់សាលាដំបូងរាជធានីភ្នំពេញ ។
ស្ត្រីដែលបានក្លាយជាសង្ស័យហើយត្រូវសមត្ថកិច្ចឃាត់ខ្លួនឈ្មោះ YUAN TANG ( ថាង យៀន ) អាយុ២៦ឆ្នាំ ជាជនជាតិចិន មុខរបរលក់ដូរ ស្នាក់នៅផ្ទះជួលគ្មានលេខ ផ្លូវលំ សង្កាត់ទឹកថ្លា ខណ្ឌសែនសុខ រាជធានីភ្នំពេញ (ជាអ្នកបើករថយន្ត) ។
គួរបញ្ជាក់ថា កាលពីវេលាម៉ោង១២និង១០នាទីយប់ឈានចូលថ្ងៃទី១២ សីហា សមត្ថកិច្ចនគរបាលខណ្ឌចំការមន បានធ្វើការឃាត់ខ្លួនស្ត្រីជនជាតិចិនម្នាក់ ដូចមានឈ្មោះខាងលើពាក់ព័ន្ធករណីមនុស្សឃាតដោយអចេតនា បើករថយន្តដេញបំបុកជនសង្ស័យ២នាក់ថាបានឆក់ទូរស័ព្ទដៃរបស់នាង ដែលបណ្តាលឲ្យជនសង្ស័យម្នាក់ស្លាប់ និងម្នាក់របួសធ្ងន់ នៅចំណុចផ្លូវលេខ១២៣ កែងផ្លូវ លេខ៤៥៦ (មុខផ្ទះលេខ៥៤) ក្រុម២២ ភូមិ៤ សង្កាត់ទួល ទំពូង១ ខណ្ឌចំការមន រាជធានីភ្នំពេញ ។
ជនសង្ស័យឆក់ទូរស័ព្ទដៃ ម្នាក់ឈ្មោះ សារុន ពិសិដ្ឋ ភេទប្រុស អាយុ២៨ឆ្នាំ មុខរបរនៅផ្ទះ ស្នាក់នៅផ្ទះលេខ២៥០ ផ្លូវលេខ៤៦០ ភូមិ៤ សង្កាត់ទួលទំពូង១ ខណ្ឌចំការមន (របួសធ្ងន់) ចំណែកម្នាក់ទៀតឈ្មោះ បេ សុភាដេវីត ភេទប្រុស អាយុ២៤ ឆ្នាំ មុខរបរ នៅផ្ទះ ស្នាក់នៅផ្ទះលេខ៣២A ផ្លូវលេខ២៨០ ភូមិ៥ សង្កាត់បឹងកេងកង២ ខណ្ឌចំការមន (ស្លាប់នៅមន្ទីរពេទ្យ) ។
សមត្ថឱ្យដឹងថា ការឃាត់ខ្លួន នគរបាលបានដកហូតវត្ថុតាងមានម៉ូតូ១គ្រឿងម៉ាកSCOOPY ពណ៌ស ស្លាកលេខ ភ្នំពេញ ១CL-៧២៤១ (របស់ជនសង្ស័យ ) រថយន្តម៉ាក LEXUS RX-300 ពណ៌ស ស្លាកលេខ ភ្នំពេញ ២AN-៩៧៤៥ (របស់ស្ត្រីចិន) និងទូរស័ព្ទដៃ១គ្រឿង ម៉ាក Meitu ពណ៌ខ្មៅលាយបៃតង
(បែកអេក្រង់ខ្ទេច ) ។
គួរបញ្ជាក់ទៀតថា មុនពេលកើតហេតុ ជនសង្ស័យថាជាចោរឆក់ឈ្មោះ សារុន ពិសិដ្ឋ និងឈ្មោះ បេ សុភាដេវីត បានជិះម៉ូតូ១គ្រឿងខាងលើឌុបគ្នា មកដល់ចំណុចមុខផ្ទះកើតហេតុខាងលើ ឃើញស្ត្រីជាតិចិន និងមិត្តភ័ក្តិម្នាក់ទៀត ឈប់រថយន្តតេទូរស័ព្ទ ចំហរកញ្ចក់ខាងមុខផ្នែកខាងឆ្វេង ហើយឈ្មោះសារុន ពិសិដ្ឋ និងឈ្មោះ បេ សុភាដេវីត ក៏ធ្វើសកម្មភាពឆក់ យកទូរស័ព្ទដៃជនជាតិចិនឈ្មោះ Yuan Tang បានសម្រេច រួចបើកម៉ូតូគេចខ្លួន។
ភ្លាមនោះស្ត្រីជាតិចិនឈ្មោះ Yuan Tang ដែលជាម្ចាស់ទូរស័ព្ទ បានបើករថយន្តដេញតាមបំបុកម៉ូតូពីក្រោយ បណ្តាលឱ្យដួលខ្ទាតទាំងមនុស្ស ទាំងម៉ូតូទៅក្បែរជញ្ជាំងរបងផ្ទះលេខ៣៩ ផ្លូវលេខ ១២៣ កែង ផ្លូវលេខ៤៥៦ បណ្តាលឱ្យជនសង្ស័យទាំង២នាក់ខាងលើរងរបួសធ្ងន់ធ្ងរ ត្រូវបានសមត្ថកិច្ចបញ្ជូនទៅសង្គ្រោះបន្ទាន់នៅមន្ទីរពេទ្យមិត្ត ភាពខ្មែរ-សូវៀត ។ លុះដល់ម៉ោង២និង៥០រំលងអាធ្រាត្រចូលដល់ថ្ងៃទី១៣ សីហា ២០១៨ ជនសង្ស័យម្នាក់ឈ្មោះ បេ សុភាដេវីត បានស្លាប់នៅមន្ទីពេទ្យ ហើយសពត្រូវតម្កល់ទុករង់ចាំក្រុមគ្រួសារមកទទួលយក ។ ចំណែកជនសង្ស័យម្នាក់ទៀតឈ្មោះ សារុន ពិសិដ្ឋ រងរបួសធ្ងន់សន្លប់មិនទាន់ដឹងខ្លួននៅឡើយទេ និងកំពុងសង្គ្រោះបន្ទាន់នៅមន្ទីរពេទ្យនោះដែរ ។
ស្ត្រីជនជាតិចិនម្នាក់នោះបាននិងកំពុងស្ថិតនៅដំណាក់កាលតំណាងអយ្យការធ្វើការសាកសួរ ដែលនៅមិនទាន់សម្រេចចោទប្រកាន់ឬយ៉ាងណានោះទេ ៕
ចែករំលែកព័តមាននេះ