ខេត្តសៀមរាប ៖ ស្ត្រីមានផ្ទៃពោះជាង២ខែម្នាក់ បានដាក់ពាក្យបណ្តឹងដើម្បីឱ្យសមត្ថកិច្ចនិងស្ថាប័នតុលាការជួយរកយុត្តិធម៌ ករណីភរិយាអតីតអភិបាលរងខេត្តសៀមរាបម្នាក់ បាននាំគ្នីគ្នាចំនួន៥នាក់ មកព្រួតវាយដល់មុខបន្ទប់ជួល រហូតរលូតកូន ។ រឿងរ៉ាវខាងលើ…
ខេត្តសៀមរាប ៖ ស្ត្រីមានផ្ទៃពោះជាង២ខែម្នាក់ បានដាក់ពាក្យបណ្តឹងដើម្បីឱ្យសមត្ថកិច្ចនិងស្ថាប័នតុលាការជួយរកយុត្តិធម៌ ករណីភរិយាអតីតអភិបាលរងខេត្តសៀមរាបម្នាក់ បាននាំគ្នីគ្នាចំនួន៥នាក់ មកព្រួតវាយដល់មុខបន្ទប់ជួល រហូតរលូតកូន ។ រឿងរ៉ាវខាងលើ បានកើតមានជាង២ខែមកហើយ ប៉ុន្តែទើបតែបែកធ្លាយនៅពេលនេះ ។
ស្ត្រីឈ្មោះ ពេជ្រ ស្រីនាង រស់នៅភូមិសាលាកន្សែង សង្កាត់ស្វាយដង្គំ ក្រុងសៀមរាប បានរៀបរាប់ពីដំណើរសាច់រឿងថា កាលពីល្ងាចថ្ងៃទី២៣ ខែមិថុនា ឆ្នាំ២០១៨ ក្រុមគ្រួសាររបស់គាត់និងមិត្តភក្តិ បានមកជួបជុំគ្នាហូបបាយ និងចាក់កូនធុងបាស់១ច្រៀងលេង ។ ខណៈពួកគាត់ច្រៀងបាន១បទ ស្រាប់តែស្ត្រីឈ្មោះ កែវ សុខុមអាយុ៤៨ឆ្នាំ ជាម្ចាស់ផ្ទះជួល និងជាភរិយារបស់លោក គឹម ឆៃហៀង អតីតអភិបាលរងខេត្តសៀមរាប បានឱ្យគេមកប្រាប់ថា កុំចាក់បាស់ព្រោះវារំខានណាស់ ហើយគាត់ក៏បានបិទបាស់ទៅវិញ ។
មួយសន្ទុះក្រោយមក ស្រាប់តែមានសំឡេងលាន់ឮខ្លាំងៗចេញពីម្ចាស់ផ្ទះជួល ហើយស្ត្រីឈ្មោះកែវ សុខុម ក៏បានស្រែកជេរដៀមដាមនិងគប់ស្បែកជើងចូលមកក្នុងបន្ទប់ជួលរបស់គាត់ ។ បន្ទាប់ពីប៉ះទង្គិចពាក្យសម្តីគ្នាមក ស្ត្រីឈ្មោះ កែវ សុខុម ប្រាប់ថា ឈប់ជួលផ្ទះឱ្យគាត់តទៅទៀត ហើយ និងបានដេញចេញភ្លាមៗតែម្តង ខណៈដែលគាត់ទើបតែបានមកជួលស្នាក់នៅបាន១៥ថ្ងៃប៉ុណ្ណោះ ។
បន្ទាប់មក គាត់ក៏បានទាមទារប្រាក់កក់ដែលនៅសល់ តែម្ចាស់ផ្ទះមិនព្រមឱ្យទើបចេះតែមានរឿងទំនាស់ពាក្យសម្តីគ្នាកាន់តែខ្លាំងឡើងៗ រហូតដល់ស្ត្រីឈ្មោះ កែវ សុខុម និងកូនស្រី ឈ្មោះ ហៀង ស្រីណុច ព្រមទាំងបក្ខពួក៣នាក់ទៀត នាំគ្នាមកវាយទាត់ធាក់គាត់ដល់បន្ទប់ជួល បណ្តាលឱ្យរងរបួសនិងរលូតកូនក្នុងផ្ទៃអាយុ២ខែតែម្តង។
ស្ត្រីរងគ្រោះរៀបរាប់ទៀតថា បន្ទាប់ពីកើតហេតុ ក្រុមគ្រួសារគាត់បានទៅដាក់ពាក្យបណ្តឹងនៅប៉ុស្តិ៍នគរបាលសង្កាត់ស្វាយដង្គំ ដើម្បីឱ្យជួយរកយុត្តិធម៌ដល់រូបគាត់ផង ។ ប៉ុន្តែ ការរង់ចាំអស់រយៈពេលជិត២ខែមកហើយនៅមិនទាន់មានពន្លឺពីសមត្ថកិច្ចទៀត ទើបរូបគាត់និងបងប្អូនសម្រេចចិត្តមកដាក់ពាក្យ
បណ្តឹងនៅសាលាដំបូងទៀតនៅថ្ងៃទី៨ ខែសីហាកន្លងទៅនេះ ដើម្បីទាមទារសំណងជំងឺចិត្តចំនួន៥ម៉ឺនដុល្លារសហរដ្ឋអាមេរិក និងស្នើឱ្យតុលាការចាត់ការជនបង្កទៅតាមផ្លូវច្បាប់ ។
ទោះជាយ៉ាងណា ខាងក្រុមគ្រួសារដែលត្រូវចោទថាបានលើកគ្នាមកវាយគេដល់បន្ទប់ជួលនោះ មិនអាចស្វែងរកការបកស្រាយបានទេ ដោយហៅទូរស័ព្ទមិនចូល ។ ទាក់ទិនទៅនឹងករណីនេះដែរ មន្ត្រីនគរបាលបានឱ្យដឹងថា សំណុំរឿងនេះបានបញ្ជូនទៅសាលាដំបូងផុតពីដៃសមត្ថកិច្ទហើយ បើចង់សួរ សូមសួរទៅខាងសាលាដំបូងខេត្តទៅ ។
ជុំវិញករណីខាងលើនេះដែរ លោក យិន ស្រាងអ្នកនាំពាក្យរបស់សាលាដំបូងខេត្ត បានឱ្យដឹងនៅថ្ងៃ១១ ខែសីហាថា សំណុំរឿងហ្នឹងខាងលោកទទួលបានពាក្យបណ្តឹងហើយ តែអ្នកមកប្តឹងនោះឃើញមានតែពាក្យបណ្តឹង ឯឯកសារផ្សេងៗនៅមិនឃើញមានដាក់មកតុលាការនៅឡើយ។លោកបន្តថា សំណុំរឿងហ្នឹងនៅមិនទាន់ដល់ដៃព្រះរាជអាជ្ញាណាមួយនៅឡើយទេ ព្រោះមិនទាន់មានឯកសារត្រឹមត្រូវ ។
រឿងក្តីអូសបន្លាយជិត២ខែមកហើយ ដែលមានតែតុលាការទេទើបរកស-ខ្មៅឃើញ ។ មានតែរង់ចាំតាមដានទាំងអស់គ្នាប៉ុណ្ណោះ តើវានឹងទៅជាបែបណា ?
ចែករំលែកព័តមាននេះ