ខេត្តកណ្តាល ៖ កាលពីរសៀលថ្ងៃទី៥ មេសា ឆ្នាំ២០១៣ នៅក្នុងបរិវេណវត្តព្រះពុទ្ធអណ្តែតហៅវត្តព្រែកហូរ លោកជំទាវឧកញ៉ាសៀង ចាន់ហេង អគ្គនាយិកាក្រុមហ៊ុនហេងអភិវឌ្ឍន៍ និងជាតំណាងសាខាកាកបាទក្រហមកម្ពុជាខេត្ត រួមជាមួយព្រះគ្រូឋានចារី អ៊ុក ថុល ព្រះធម្មធរអនុគណក្រុងតាខ្មៅ និងជាព្រះចៅអធិការវត្តព្រែកហូរ បានរៀបចំអំណោយយ៉ាងច្រើនសន្ធឹកសន្ធាប់ចែកជូនដល់កុមារកំព្រា អ្នកផ្ទុកមេរោគអេដស៍ និងជនក្រីក្រសរុបចំនួន៩៧នាក់ ។
ក្នុងនោះសង្កាត់ព្រែកហូរ៤៧នាក់ និងសង្កាត់តាក្តុលចំនួន៥០នាក់ ស្ថិតក្នុងក្រុងតាខ្មៅ ខេត្តកណ្តាល ដែលអំណោយទាំងនេះជាទេយ្យទានរបស់ព្រះចៅអធិការវត្តព្រែកហូរ និងលោកជំទាវឧកញ៉ាសៀង ចាន់ហេង ។ អញ្ជើញចូលរួមជាកិត្តិយសក្នុងពិធីនោះរួមមាន លោកជុន សុជាតិ ប្រធានក្រុមប្រឹក្សាក្រុងតាខ្មៅ លោកស្រីគង់ សារីយ៉ា នាយិកាសាខាកាកបាទក្រហមកម្ពុជាខេត្ត លោក លោកស្រីជាសប្បុរសជន ក្រុមប្រឹក្សាសង្កាត់ព្រែកហូរ និងសង្កាត់តាក្តុល ព្រះសង្ឃ ព្រមទាំងគណៈកម្មការវត្តព្រះពុទ្ធអណ្តែតផងដែរ ។
ក្នុងមតិស្វាគមន៍ លោកជុន សុជាតិ បានសម្តែងនូវអំណរគុណ និងអរគុណចំពោះព្រះចៅអធិការវត្តព្រះពុទ្ធអណ្តែត ហៅវត្តព្រែកហូរ ព្រមទាំងលោកជំទាវឧកញ៉ាសៀង ចាន់ហេង ដែលបានចំណាយធនធានផ្ទាល់ខ្លួន និងពេលវេលា មករួមចំណែកចែករំលែកនូវការលំបាកដល់ជនងាយរងគ្រោះនាឱកាសដ៏ថ្លៃថ្លានេះ ។ លោកបានប្រគេនពរចំពោះព្រះសង្ឃ ព្រះចៅអធិការវត្តព្រែកហូរ និងជូនពរជ័យលោកជំទាវឧកញ៉ាសៀង ចាន់ហេង ព្រមទាំងក្រុមគ្រួសារ ក្នុងឱកាសបុណ្យចូលឆ្នាំថ្មីប្រពៃណីជាតិ ដែលនឹងឈានចូលមកដល់នាពេលដ៏ខ្លីខាងមុខ សូមសមប្រកបនូវពុទ្ធពរទាំង៤ប្រការគឺ ៈ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។
ថ្លែងក្នុងពិធីនេះ លោកជំទាវឧកញ៉ា សៀង ចាន់ហេង បានឱ្យដឹងថា ដោយមើលឃើញការលំបាករបស់កុមារកំព្រា អ្នកផ្ទុកមេរោគអេដស៍ និងជនក្រីក្រដែលកំពុងរស់នៅក្នុងភាពតោកយ៉ាកជាយូរឆ្នាំមកហើយនោះ និងជាពិសេសដោយមើលឃើញនូវការលំបាកគ្រប់បែបយ៉ាង ទាំងការហូបចុក និងការរស់នៅ ទើបលោកជំទាវឧកញ៉ា ព្រមទាំងព្រះចៅអធិការវត្ត ព្រះសង្ឃ និងគណៈកម្មការវត្តព្រែកហូរ បានរៀបចំនូវជំនួយជាម្ហូបអាហារ គ្រឿងឧបភោគបរិភោគ និងថវិកា ដើម្បីយកមកចែកជូនដល់ប្រជាពលរដ្ឋនាពេលនេះ ។ លោកជំទាវមានប្រសាសន៍បន្តទៀតថា ថ្វីបើអំណោយទាំងនេះ មិនបានឆ្លើយតបទៅនឹងសេចក្តីត្រូវការរបស់កុមារកំព្រា បងប្អូនអ្នកផ្ទុកមេរោគអេដស៍ និងជនក្រីក្រទាំងអស់នោះក៏ដោយ តែនេះក៏ជាការចូលរួមចំណែកកាត់បន្ថយការលំបាកបានមួយគ្រាផងដែរ ។
លោកជំទាវបានផ្តាំផ្ញើដល់ប្រជាពលរដ្ឋជាជនងាយរងគ្រោះទាំងអស់ ត្រូវតស៊ូក្នុងឆាកជីវិតដើម្បីរស់រានក្នុងភាពថ្លៃថ្នូរ បើទោះជាពេលនេះបងប្អូនទាំងអស់ជួបនូវការលំបាកខ្លាំងយ៉ាងណាក៏ដោយ សូមមេត្តាតាំងស្មារតីកុំអស់សង្ឃឹម ត្រូវតស៊ូជម្នះរាល់ឧបសគ្គ និងការលំបាកទាំងឡាយ ហើយថែរក្សាសុខភាពឱ្យបានល្អ ដើម្បីគិតគូរអំពីបញ្ហាការរកទទួលទានចិញ្ចឹមជីវិត និងក្រុមគ្រួសារប្រកបដោយសុភមង្គល ។អំណោយដែលចែកជូននាឱកាសនោះគឺម្នាក់ៗទទួលបាន អង្ករ១០គីឡូក្រាម សម្ភារប្រើប្រាស់១៥មុខ មី១០កញ្ចប់ ស្ករស១គីឡូក្រាម តែ២កញ្ចប់ និងថវិកាចំនួន២ម៉ឺនរៀល ៕
ចែករំលែកព័តមាននេះ