ខេត្តប៉ៃលិន ៖ បើតាមសេចក្តីរាយការណ៍បានឱ្យដឹងថា មានស្នេហាឆក់កណ្តៀតមួយ ក្លាយទៅជាការប្តឹងប្តល់សមត្ថកិច្ចពីនារីម្នាក់ ខណៈបុរសគូស្នេហ៍ដោះដៃគេចខ្លួនទៅធ្វើការងារនៅព្រះសីហនុបាត់ ។ នាងក៏ជិះម៉ូតូឌុបទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលឃុំស្ទឹងកាច់ ដើម្បីហៅបុរសហេងស៊យឱ្យទទួលខុសត្រូវចំពោះកូនក្នុងផ្ទៃរបស់នាង ។ ការដាក់ពាក្យបណ្តឹងនេះ កើតឡើងកាលពីម៉ោង៩និង៣០នាទីព្រឹកថ្ងៃទី៨ ខែសីហា ។
ប្រភពព័ត៌មានបានឱ្យដឹងថា នារីរងគ្រោះខាងលើអាយុ១៩ឆ្នាំ រស់នៅក្នុងស្រុកសាលាក្រៅ ចំណែកបុរសជាប់ចោទឈ្មោះ វីរៈ អាយុ២២ឆ្នាំ បានយកនាងមករស់នៅក្នុងផ្ទះរបស់ខ្លួននៅក្នុងភូមិ-ឃុំជាមួយគ្នា ។
បើតាមនាងរងគ្រោះរៀបរាប់ថា កាលពីជាង៥ខែមុននាងធ្វើដំណើរពីខេត្តកំពង់ឆ្នាំង មកស្នាក់នៅធ្វើការស៊ីឈ្នួលកាច់ពោតឱ្យថៅកែម្នាក់នៅក្បែរផ្ទះបុរសខាងលើ លុះក្រោយមកក៏ស្គាល់គ្នា ហើយបុរសនេះឌុបនាងទៅដើរលេងនៅក្នុងក្រុងប៉ៃលិន ។ ក្រោយមក ពួកគេទាំង២នាក់ក៏រួមរស់ជាមួយគ្នាដោយមិនបានរៀបការឬសែនព្រេនអ្វីទេ គឺធ្វើជាប្តីប្រពន្ធតែម្តង ។ ប៉ុន្តែឪពុកម្តាយខាងប្រុសមិនពេញចិត្តនឹងរូបនាងទេ ទោះនាងមានផ្ទៃពោះ៥ខែទៅហើយ ទើបនាងបង្ខំចិត្តទៅដាក់ពាក្យបណ្តឹងដើម្បីឱ្យហៅមកទទួលខុសត្រូវចំពោះកូនក្នុងផ្ទៃរបស់នាង ។
ស្ត្រីរូបនេះបន្តទៀតថា បច្ចុប្បន្ននាងគ្មានអ្វីទីពឹងនោះទេ មានឪពុកម្តាយដែរតែពួកគាត់ក្រីក្ររកព្រឹកខ្វះល្ងាច ហើយគាត់ក៏ដេញនាងចេញពីផ្ទះទៀត ដោយមិនទទួលស្គាល់ជាកូននោះឡើយ ។ នាងមិនដឹងជាគិតយ៉ាងណានោះទេ ព្រោះឥឡូវនេះកូននៅក្នុងពោះ៥ខែទៅហើយ ស្រាប់តែប្តីរត់គេចខ្លួនទៅឯខេត្តព្រះសីហនុបាត់ទៀត នាងមិនចង់ទាមទារអ្វីច្រើនទេ គ្រាន់តែឱ្យរូបគេមកដោះស្រាយផ្តល់ថ្លៃសំណង រួចចង់ទៅណាក៏នាងមិនឃាត់ដែរ ។
ពាក់ព័ន្ធករណីនេះ លោក សេម សុផល បានឱ្យដឹងថា ខាងលោកបានទទួលពាក្យបណ្តឹងពីស្ត្រីខាងលើហើយ និងកំពុងហៅបុរសជាប់ចោទឱ្យប្រញាប់មកទទួលខុសត្រូវ ផ្តល់អាហារកិច្ចដល់ទារកដែលនឹងកើតនាពេលឆាប់ៗខាងមុខ ៕
ចែករំលែកព័តមាននេះ