រាជធានីភ្នំពេញ ៖ ដោយកាលពីម្សិលមិញមានករណីមួយដែលភ្ញាក់ផ្អើល គឺជាកូនប្រុសរបស់លោកអនុប្រធានមន្ទីរសុខាភិបាលខេត្តបន្ទាយមានជ័យ កាលពីរសៀលថ្ងៃទី០១ ខែសីហា ឆ្នាំ ២០១៨ ហេតុការណ៍ដ៏គួរឱ្យភ្ញាក់ផ្អើលមួយនេះកើតឡើងនៅក្នុងជាន់ទី២ របស់សណ្ឋាគារ និងខារ៉ាអូខេ «កូឡូសូ» ដែលមានទីតាំងនៅខាងមុខជាប់ផ្លូវលេខ៣៦០ និងខាងក្រោយផ្លូវលេខ៣៥០ ក្នុងសង្កាត់បឹងកេងកងទី៣ ខណ្ឌចំការមន ។
ក្នុងសណ្ឋាគារខាងលើដែលជាកន្លែងដែលលោកវរៈសេនីយ៍ទោ ម៉ុន រតនៈឧត្តម ជាមន្ត្រីនគរបាលក្រសួងមហាផ្ទៃម្នាក់បានប្រើកាំភ្លើងខ្លីម៉ាក K54 មួយដើមបាញ់ធ្វើអត្តឃាតសម្លាប់ខ្លួនឯងនៅក្នុងបន្ទប់យ៉ាងស្ងៀមស្ងាត់ និងអាថ៌កំបាំងបំផុត ហើយនៅព្រឹកថ្ងៃទី០២ ខែសីហានេះ សពក៏ត្រូវបានក្រុម គ្រួសារកំពុងតែតម្កល់ធ្វើបុណ្យនៅក្នុងវត្តនិរោធផងដែរ ។
ក្នុងពីធីបុណ្យសពនៅវត្តនិរោធនេះដែរ បុរសជាពូបង្កើតម្នាក់បានរៀបរាប់ប្រាប់ឱ្យដឹងថា ពាក់ព័ន្ធទៅនឹងការបាញ់សម្លាប់ធ្វើអត្តឃាតខ្លួនឯងរបស់ក្មួយប្រុសបង្កើតរបស់គាត់ម្នាក់ដែលមានឋានន្តរសក្តិថ្នាក់វរៈសេនីយ៍ទោ នេះដែរ រូបលោកមិនបានដឹងថា «រូបគេមានវិបត្តិអ្វីច្បាស់លាស់ឡើយ» ព្រោះរូបគាត់មានទីលំនៅនៅឆ្ងាយពីគ្នា និងទើបតែមកពីខេត្តមកចូលរួមបុណ្យសពរបស់គេប៉ុណ្ណោះ ។ ក្មួយប្រុសរបស់គាត់រូបនេះ(លោកវរៈសេនីយ៍ទោ ម៉ុន រតនៈឧត្តម) រូបគេជាមនុស្សដែលមានអត្តចរិកស្លូតបូតសុភាពរាបសា និងមិនសូវចេះមាត់ករ ត្រឹមត្រូវជាទីបំផុត តែមិនដឹងជារូបគេមានបញ្ហាអ្វីបានជារូបគេដាច់ចិត្តធ្វើបែបនេះឡើយ ។ បុរសជាពូដដែលបានប្រាប់បន្តទៀតថា សព្វថ្ងៃក្មួយប្រុសរបស់លោកនៅលីវ និងមិនទាន់មានប្រពន្ធកូនឡើយព្រោះរូបគេនៅក្មេងទើបតែមានអាយុប្រមាណជា២៦ឆ្នាំប៉ុណ្ណោះ ដោយគ្រាន់តែដឹងរហៀងថា« រូបគេមានសង្សារហើយ» ដែរតែពួកគាត់មិនដឹងថា រូបគេធ្វើបែបនេះដោយសារតែមានវិបត្តិអ្វីឡើយ ។
បើតាមប្រភពព័ត៌មានពីនគរបាលខណ្ឌចំការមនបានរៀបរាប់ប្រាប់ឱ្យដឹងថា បុរសរងខាងលើមានឈ្មោះ ម៉ុន រតនៈឧត្តម អាយុ២៦ឆ្នាំ ជាមន្ត្រីនគរបាលបម្រើការនៅក្រសួងមហាផ្ទៃ ដែលមានឋានន្តរសក្តិថ្នាក់វរៈសេនីយ៍ទោ មានទីលំនៅក្នុងសង្កាត់បឹងទំពុនទី២ ខណ្ឌមានជ័យ រាជធានីភ្នំពេញ ។
មុនពេលកើតហេតុកាលពីយប់ថ្ងៃទី៣១ ខែកក្កដា ឆ្នាំ២០១៨ កន្លងទៅនេះបុរសរងគ្រោះបានចូលមកស្នាក់នៅក្នុងបន្ទប់លេខ២០៩ ជាន់ទី២ របស់សណ្ឋាគារ និងខារ៉ាអូខេ «កូឡូសូ»តែម្នាក់ឯង ។ លុះដល់វេលាម៉ោងប្រមាណជា១២និង៣០នាទីថ្ងៃត្រង់ថ្ងៃទី០១ ខែសីហា ឆ្នាំ ២០១៨ ម្សិលមិញនេះបុគ្គលិកផ្នែកអនាម័យក៏បានទៅគោះទ្វារបន្ទប់របស់បុរសរងគ្រោះ ដើម្បីធ្វើការសំអាត តែមិនមានអ្នកណាម្នាក់បើកទ្វារឲ្យ និងមិនមានអ្នកណាម្នាក់ឆ្លើយតបវិញឡើយ ។ តាមប្រភពដដែលបានប្រាប់បន្តទៀតថា ពេលនោះក្រុមបុគ្គលិកផ្នែកអនាម័យក៏បានយកកូនសោរទៅចាក់ទ្វារបន្ទប់ចូលទៅមើលទើបបានឃើញបុរសរងគ្រោះបានដេកនៅក្នុងថ្លុកឈាមលើគ្រែពូកស្លាប់បាត់ទៅហើយ និងបង្កឲ្យមានការភ្ញាក់ផ្អើលកើតឡើងទើបខាងសណ្ឋាគារ និងខារ៉ាអូខេរាយការណ៍ទៅប្រាប់ពួកគាត់ឲ្យបានដឹងពីរឿងនេះ ។ ទើបបានកម្លាំងមានសមត្ថកិច្ចពួកលោករួមទាំងនគរបាលផ្នែកបច្ចេកទេសក្រុង ចុះមកដល់បន្ទប់កើតហេតុខាងលើ ចុះទៅមើលបានឃើញនៅក្បែរសពរបស់បុរសរងគ្រោះមានអាវុធខ្លីម៉ាក K54 មួយដើម នៅក្បែរសព និងមានស្នាមគ្រាប់កាំភ្លើងនៅលើសៀតផ្កាផ្នែកខាងស្តាំផងដែរ ។
ក្រោយពីកម្លាំងជំនាញធ្វើការត្រួតពិនិត្យ និងកោសលវិច្ច័យទៅលើសពរបស់ជនរងគ្រោះរួចហើយបានបញ្ជាក់ប្រាប់ថា «ជនរងគ្រោះឈ្មោះ ម៉ុន រតនៈឧត្តម បានស្លាប់បាត់បង់ជីវិតដោយសារតែការធ្វើអត្តឃាតបាញ់សម្លាប់ខ្លួនឯង» និងប្រគល់សពទៅឲ្យក្រុមគ្រួសារយកទៅធ្វើបុណ្យទៅតាមប្រពៃណី ។
ពាក់ព័ន្ធទៅនឹងករណីលោកវរៈសេនីយ៍ទោ ម៉ុន រតនៈឧត្តម ប្រើប្រាស់អាវុធខ្លីម៉ាក K54 បាញ់សម្លាប់ខ្លួននៅក្នុងបន្ទប់សណ្ឋាគារ និងខាងរ៉ាអូខេយីហោខាងលើកម្លាំងមានសមត្ថកិច្ចខណ្ឌចំការមនមិនបានបញ្ជាក់ប្រាប់ពីមូលហេតុ អ្វីដែលឈានទៅដល់ការបាញ់សម្លាប់ខ្លួនឯងរបស់មន្ត្រីនគរបាលក្រសួងមហាផ្ទៃម្នាក់ខាងលើឡើយ ៕
ចែករំលែកព័តមាននេះ