រាជធានីភ្នំពេញ ៖ ក្រោយពីតំណាងអយ្យការអមសាលាដំបូងរាជធានីភ្នំពេញ សាកសួរលោកគ្រូ-អ្នកគ្រូ២នាក់ចប់សព្វគ្រប់ ពាក់ព័ន្ធពីបទលួចនិងសមគំនិតលួចទឹកខ្មៅរបស់គណៈកម្មាធិការជាតិរៀបចំការបោះឆ្នោត(គ.ជ.ប) នៅវេលាម៉ោងប្រមាណ៦ល្ងាចថ្ងៃទី៣១ កក្កដា ជនត្រូវចោទ គឺលោកគ្រូ-អ្នកគ្រូទាំង២នាក់ត្រូវបានចៅក្រមសើុបសួរបើកការជំនុំជម្រះផ្ទាល់ និងប្រកាសសាលក្រមភ្លាមៗផ្តន្ទាទោសម្នាក់ៗ៦ខែ…
រាជធានីភ្នំពេញ ៖ ក្រោយពីតំណាងអយ្យការអមសាលាដំបូងរាជធានីភ្នំពេញ សាកសួរលោកគ្រូ-អ្នកគ្រូ២នាក់ចប់សព្វគ្រប់ ពាក់ព័ន្ធពីបទលួចនិងសមគំនិតលួចទឹកខ្មៅរបស់គណៈកម្មាធិការជាតិរៀបចំការបោះឆ្នោត(គ.ជ.ប) នៅវេលាម៉ោងប្រមាណ៦ល្ងាចថ្ងៃទី៣១ កក្កដា ជនត្រូវចោទ គឺលោកគ្រូ-អ្នកគ្រូទាំង២នាក់ត្រូវបានចៅក្រមសើុបសួរបើកការជំនុំជម្រះផ្ទាល់ និងប្រកាសសាលក្រមភ្លាមៗផ្តន្ទាទោសម្នាក់ៗ៦ខែ តែទោសនោះ ត្រូវបានព្យួរទាំងអស់ ពោលគឺគ្រូបង្រៀនទាំង២នាក់ មិនត្រូវបានឃុំខ្លួនទេ ពេលបិទសវនាការ ត្រូវបានអនុញ្ញាតឱ្យមានសេរីភាពវិញ ។
លោកគ្រូ-អ្នកគ្រូទាំង២នាក់នេះ ម្នាក់ឈ្មោះទែន រតនា ភេទប្រុស អាយុ៤២ឆ្នាំ និងម្នាក់ទៀតឈ្មោះ ជា សុធារី ភេទស្រី អាយុ៤៦ឆ្នាំ ជាគ្រូបង្រៀននៅអនុវិទ្យាល័យ ហ៊ុន សែន ជម្ពូវ័ន ក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ ។ អ្នកគ្រូ ជា សុធារី ត្រូវបានតំណាងអយ្យការចោទប្រកាន់ពីបទលួច ចំណែកលោក
គ្រូ ទែន រតនា ត្រូវបានចោទប្រកាន់ពីបទសមគំនិតក្នុងអំពើលួច ។
ប្រភពព័ត៌មាននៅសាលាដំបូងរាជធានីភ្នំពេញបានឱ្យដឹងថា កាលពីព្រឹកថ្ងៃទី៣១ ខែកក្កដា នគរបាលខណ្ឌពោធិ៍សែនជ័យ បានបញ្ជូនគ្រូបង្រៀនដែលជាជនជាប់ចោទ២នាក់មកសាលាដំបូងរាជធានីភ្នំពេញ ដើម្បីប្រគល់ជូនតំណាងអយ្យការធ្វើការសាកសួរពីរឿងលួចទឹកខ្មៅជ្រលក់ចង្អុលដៃរបស់ គ.ជ.ប ។ ដំបូងសមត្ថកិច្ចបានធ្វើការឃាត់ខ្លួនអ្នកគ្រូ ជា សុធារី តែម្នាក់ទេ ប៉ុន្តែក្រោយពីធ្វើការសាកសួរក៏ជាប់ពាក់ព័ន្ធនឹងលោកគ្រូម្នាក់ទៀត ទើបតំណាងអយ្យការតម្រូវឱ្យសមត្ថកិច្ចនាំមកទាំង២នាក់ ។
នៅសាលាដំបូងរាជធានីភ្នំពេញ គេឃើញលោកគ្រូអ្នកគ្រូទាំង២នាក់ ត្រូវបានសមត្ថកិច្ចនាំទៅអង្គុយជិតគ្នា រង់ចាំការសាកសួរពីសំណាក់លោកព្រះរាជអាជ្ញារងដែលកាន់សំណុំរឿងនោះ ។ពេលពួកគាត់អង្គុយក្បែរគ្នា ឮតែសំឡេងជជែកគ្នាខ្លាំងៗ ដោយអ្នកគ្រូបានដាក់បន្ទុកទៅលោកគ្រូថា បានជាគាត់លួចយកទឹកខ្មៅរបស់ គ.ជ.ប នោះ ដោយសារលោកគ្រូបានពឹងពាក់ឱ្យគាត់ជួយយកដបទឹកថ្នាំខ្មៅនោះមកជ្រលក់ដៃ ព្រោះលោកគ្រូជាប់រវល់មិនបានទៅបោះឆ្នោតនឹងគេនិងមិនមានស្នាមទឹកខ្មៅជាប់ចង្អុលដៃ ដូច្នោះបានជាគាត់យកឱ្យ ។
ចំណែកលោកគ្រូវិញបានបដិសេធការចោទប្រកាន់របស់អ្នកគ្រូនិងបានតបទៅអ្នកគ្រូវិញថា ខ្ញុំគ្រាន់តែនិ
យាយថា បើសិនជាខ្ញុំមិនបានទៅបោះឆ្នោតតើខ្ញុំអាចសុំទឹកថ្នាំខ្មៅរបស់គ.ជ.ប មកជ្រលក់ចង្អុលដៃបានឬអត់? លោកគ្រូអ្នកគ្រូទាំង២នាក់ បានជជែកគ្នាច្រើនជាងនេះទៀត ដែលម្នាក់ៗចង់ដោះបន្ទុករៀងៗខ្លួន ។ ទោះជាយ៉ាងណាក្តី ការរកឃើញនូវទោសកំហុសដែលលោកគ្រូនិងអ្នកគ្រូបានប្រព្រឹត្ត តំណាងអយ្យការបានធ្វើការចោទប្រកាន់ជាផ្លូវការ និងបានចាត់បញ្ជូនទៅចៅក្រមសើុបសួរ ។ រហូតដល់វេលាម៉ោងប្រមាណ៦ល្ងាចថ្ងៃដដែល សំណុំរឿងនេះត្រូវបានបើកសវនាការភ្លាមៗ និងបានផ្តន្ទាទោសជនជាប់ចោទទាំងពីរនាក់ដូចបានរៀបរាប់ខាងលើ ។
គួររំឭកថា ដំបូងឡើយអ្នកគ្រូ ជា សុធារី ដែលបង្រៀននៅអនុវិទ្យាល័យ ហុ៊ន សែន ជម្ពូវ័ន និងជាអនុប្រធានការិយាល័យបោះឆ្នោតផងនោះ ត្រូវបានអាជ្ញាធរខណ្ឌពោធិ៍សែនជ័យ សហការជាមួយនគរបាលប៉ុស្តិ៍ត្រពាំងក្រសាំង ចាប់ឃាត់ខ្លួននាំយកទៅសាកសួរ បន្ទាប់ពីគាត់លួចយកទឹកថ្នាំជ្រលក់ដៃបោះឆ្នោត១ដប ចេញពីការិយាល័យដែលគាត់គ្រប់គ្រង ហើយត្រូវបែកការណ៍ និងកសាងសំណុំរឿងនៅផ្នែកនគរបាលព្រហ្មទណ្ឌខណ្ឌពោធិ៍សែនជ័យ រួចបញ្ជូនទៅសាលាដំបូង ។ ពេលនោះគាត់បានប្រាប់នគរបាលថា ការដែលគាត់លួចយកទឹកខ្មៅជ្រលក់ដៃនោះ គឺដើម្បីចែកចាយឱ្យក្រុមគ្រួសារ និងសាច់ញាតិប្រើប្រាស់ ក្នុងការជ្រលក់ដៃដោយមិនចាំបាច់ទៅបោះឆ្នោត ។
ម្យ៉ាងទៀត គាត់ធ្វើបែបនេះក៏ព្រោះតែខឹងអនុប្រធានភូមិគាត់ម្នាក់ ដែលតែងមើលរំលងគាត់ជាសមាជិកគណបក្សប្រជាជនម្នាក់ដែរ តែមិនដែលឱ្យគាត់ចូលប្រជុំការងារបក្សដើម្បីបានលុយ២ម៉ឺនរៀលដូចជាអ្នកឯទៀត។ ការចាប់ខ្លួននេះ បានធ្វើឡើងកាលពីវេលាម៉ោង១០និង៣០នាទីព្រឹកថ្ងៃទី២៨ ខែកក្កដា នៅក្នុងការិយាល័យបោះឆ្នោតលេខ១៤០១ ស្ថិតនៅក្នុងសាលាបឋមសិក្សាត្រពាំងក្រសាំង ភូមិត្រពាំងអណ្ដូង សង្កាត់ត្រពាំងក្រសាំង ខណ្ឌពោធិ៍សែនជ័យ ។ អ្នកគ្រូជា សុធារី ក៏ជាអនុប្រធានការិយាល័យបោះឆ្នោតលេខ១៤០១នោះដែរ និងមានទីលំនៅក្នុងភូមិសាមគ្គី២ សង្កាត់ត្រពាំងក្រសាំង ។
មន្ត្រីនគរបាលបានឱ្យដឹងថា អ្នកគ្រូ ជា សុធារី បានលួចយកទឹកថ្នាំជ្រលក់ដៃបោះឆ្នោតចេញពីការិយាល័យខាងលើ១ដប ដាក់នៅក្នុងកាបូបស្ពាយរបស់គាត់បម្រុងគេចខ្លួន ប៉ុន្តែខណៈនោះត្រូវបែកការណ៍មានអ្នកប្រទះឃើញក៏រាយកាណ៍ជូនអាជ្ញាធរខណ្ឌពោធិ៍សែនជ័យ ។ពេលនោះ លោកអភិបាលរងខណ្ឌមួយរូប ដឹកនាំកងកម្លាំងទៅសហការជា មួយនគរបាលប៉ុស្ដិ៍ត្រពាំងក្រសាំង ចាប់ឃាត់ខ្លួនអ្នកគ្រូភ្លាមៗតែម្ដង ។ ប្រភពដដែលបន្តថា ក្រោយពេលឃាត់ខ្លួនធ្វើការត្រួតពិនិត្យ បានរកឃើញទឹកថ្នាំជ្រលក់ដៃ១ដបនៅក្នុងកាបូបស្ពាយរបស់គាត់ ហើយដៃរបស់គាត់ក៏មានប្រឡាក់ទឹកថ្នាំនោះដែរ ៕
ចែករំលែកព័តមាននេះ