រាជធានីភ្នំពេញ ៖ គណបក្សខ្មែរក្រោកក្រោយបោះឆ្នោតបានប្រកាសថា បក្សនេះនឹងចាប់ផ្តើមយុទ្ធនាការ
«ស្នាមមេដៃដើម្បីកោះត្រល់» នៅថ្ងៃទី៨ ខែសីហា ឆ្នាំ២០១៨ ដោយប្រមូលស្នាមមេដៃប្រជាពលរដ្ឋទូទាំងរាជធានីខេត្តក្រុងដើម្បីអនុវត្តយន្តការថ្នាក់ជាតិលើកទី១ រៀបចំញត្តិប្តឹងក្រុមប្រឹក្សាធម្មនុញ្ញនៃព្រះរាជាណា
ចក្រកម្ពុជា ដែលមានសមត្ថកិច្ចមោឃភាពរាល់ការអនុម័តទាំងឡាយណាផ្ទុយនឹងគោលករណ៍ រក្សាការពារឯករាជ្យ អធិបតេយ្យភាព បូរណភាពទឹកដីនៃប្រទេសកម្ពុជាដោយយោងតាមមាត្រា៩២នៃរដ្ឋធម្មនុញ្ញ។
យោងតាមសេចក្តីជូនដំណឹងរបស់គណបក្សដដែលបានលើកឡើងទៀតថា នេះជាកិច្ចការប្រវត្តិសាស្ត្រមួយដោយយោងតាមយន្តការថ្នាក់ជាតិជាជំហ៊ានដំបូងមុនទៅដល់ការប្រើប្រាស់យន្តការអន្តរជាតិទៅតុលាការយុត្តិធម៌អន្តរជាតិក្រុងឡាអេ(ICJ)ដែលគណបក្សខ្មែរក្រោកអនុវត្តតាមគោលនយោបាយស្តីពីការប្តឹងទាមទារនូវដែនអធិបតេយ្យភាពកោះត្រល់ដែលប្រទេសវៀតណាមរំលោភកាន់កាប់ខុសច្បាប់កន្លងមក។
គណបក្សបានអះអាងថា យុទ្ធនាការនឹងធ្វើនៅស្នាក់ការកណ្តាលរបស់គណបក្សផ្ទះលេខ១១ ផ្លូវលេខ៣៥៣ សង្កាត់បឹងកក់ទី១ ខណ្ឌទួលគោក ហើយគណបក្សនេះថានឹងមានរៀបចំផ្តិតមេដៃតាមប្រព័ន្ធអនឡាញផងដែរ ។ បក្សនេះថា ការចូលរួមរបស់បងប្អូនបង្ហាញពីជំហថាពលរដ្ឋកម្ពុជាមិនអនុញ្ញាតឲ្យបរទេសណារំលោភទន្ទ្រានលើដែនអធិបតេយ្យភាពរបស់ប្រទេសកម្ពុជាបានឡើយ៕
ចែករំលែកព័តមាននេះ