ខេត្តក្រចេះ ៖ អាជ្ញាធរខេត្តក្រចេះបានបញ្ជាក់ប្រាប់ថា គិតមកត្រឹមថ្ងៃទី0១ ខែសីហានេះ ស្ថានភាពទឹកជំនន់ទន្លេមេគង្គ គឺនៅមិនទាន់ជន់ឡើងដល់កម្រិតប្រកាសអាសន្ននៅឡើយទេ ស្របជាមួយគ្នានេះក៏មានពលរដ្ឋជាង២០គ្រួសារ និងសព្វពាហនៈជាច្រើនពាន់ក្បាល គឺត្រូវ បានចាត់ជម្លៀសដោយសុវត្ថិភាពទៅកាន់ទីទួលសុវត្ថិភាពដែលអាជ្ញាធរបានរៀបចំទុក ។
បើទោះបីជាកម្រិតទឹកដែលជន់ឡើងខ្លាំងក្នុងអំឡុងរយៈពេលប៉ុន្មានថ្ងៃចុងក្រោយជាប់ៗ តែការជន់ឡើងហាក់នៅមិនទាន់យាយីធ្ងន់ធ្ងរដល់ភូមិឋានរបស់ពលរដ្ឋធ្ងន់ធ្ងរ តែ យ៉ាងណាក្តីអាជ្ញាធរខេត្តបានចេញសេចក្តីប្រកាសព័ត៌មានឲ្យពលរដ្ឋដែលនៅតាមតំបន់ ងាយរងគ្រោះត្រូវមានការប្រុងប្រយ័ត្នខ្ពស់ចំពោះស្ថានភាពនេះ ។
មន្ត្រីសាលាខេត្តក្រចេះបានឲ្យដឹងទៀតថា នៅរសៀលថ្ងៃទី៣១ កក្កដា ឆ្នាំ២០១៨ អាជ្ញាធរខេត្តដឹកនាំដោយលោក វ៉ា ថន អភិបាលខេត្ត បានដឹកនាំកិច្ចប្រជុំជាមួយក្រុមការគ្រប់គ្រងគ្រោះមហន្តរាយថ្នាក់ខេត្តពីវិធានការត្រៀមសង្គ្រោះពលរដ្ឋដូចជា ការផ្តល់ថ្នាំសង្កូវជូនទៅពួកគាត់ និងការចាក់វ៉ាក់សាំងគោក្របី ដើម្បីបង្ការជម្ងឺឆ្លង ពិសសេនោះគឺការត្រៀមជម្លៀសពីតំបន់លិច លង់ងាយរងគ្រោះឲ្យបានទាន់ពេល ។ ដោយសារតែស្ថានភាពទឹកជំនន់ គឺមានសន្ធឹកជន់ឡើងខ្លាំងបានធ្វើឲ្យស្រុក-ក្រុងទាំង៦នៅទូទាំងខេត្តកំពុងតែស្ថិតក្នុងការលិចលង់កាន់តែធ្ងន់ធ្ងរទៅៗពីមួយថ្ងៃទៅមួយ ថ្ងៃ ។
មន្ត្រីសាលាខេត្តខេត្តក្រចេះបានឲ្យដឹងទៀតថា ទឹកជំនន់ដែលកំពុងតែជនលិចនេះ បានបង្កឲ្យប៉ះពាល់វិស័យកសិកម្មក្នុងនោះមានសន្ទូងស្រូវវស្សាចំនួន៦៥៣ហិកតា ត្រូវរងការ ប៉ះពាល់ដោយលិចលង់ និងប៉ះពាល់ដំណាំរួមផ្សំមានចំនួន៤៧៥ហិកតា ។ របាយការណ៍បាន បង្ហាញឲ្យដឹងទៀតថា មានផ្លូវលំជនបទយ៉ាងហោចប្រវែងជាង២ម៉ឺន៥ពាន់មែត្របានរងការ លិចលង់មិនអាចធ្វើដំណើរទៅមកបាន ។
ក្រៅពីនោះក៏នៅមានអណ្តូងទឹកចំនួន៧កន្លែងប៉ះពាល់លំនៅឋានប្រជាពលរដ្ឋ ជិត២ពាន់ខ្នងផ្ទះ សាលារៀន៤កន្លែង មណ្ឌលសុខភាព១មណ្ឌល ជម្លៀសពលរដ្ឋ ២៣គ្រួសារ ទៅទីទួលសុវត្ថិភាព និងបានជម្លៀសសត្វពាហនៈជាង២ពាន់ក្បាល។
មន្ត្រីសាលាខេត្តបានឲ្យដឹងទៀតថា ចំពោះស្ថានភាពផលប៉ះពាល់ធ្ងន់ធ្ងរទាំងនេះបាន កើតមាននៅតាមស្រុកមួយចំនួនដែលស្ថិតនៅតំបន់វាលទំនាបប្រប និងដងទន្លេមេគង្គមានដូចជា ស្រុកឆ្លូង ស្រុកសំបូរ ស្រុកព្រែកប្រសព្វ និងស្រុកចិត្របុរី ។
បើទោះជាការសន្ធឹកនៃការជន់លិចនេះត្រូវបានអាជ្ញាធរអះអាងថា មិនទាន់មានការប៉ះ ពាល់ធ្ងន់ធ្ងរ និងមិនមានបង្កគ្រោះថ្នាក់ដល់មនុស្ស និងសត្វដែលបណ្តាលមកពីគ្រោះទឹក ជំនន់នេះយ៉ាងណាក្តីតែពលរដ្ឋដែលរស់នៅតាមតំបន់ងាយលិចលង់ និងកំពុងតែជម្លៀស បានសម្តែងក្តីបារម្ភពីសុខសុវត្ថិភាពដោយការលិចលង់នេះខណៈដែលស្ថានភាពទឹក គឺនៅតែ បន្តជន់ឡើងនៅមិនទាន់ថមថយនៅឡើយទេនោះ ។
ពលរដ្ឋនៅក្នុងស្រុកចិត្របុរីបានលើកឡើងថា អ្វីដែលពួកគាត់បារម្ភនោះ គឺជំងឺឆ្លងទាំង មនុស្ស និងសត្វការគ្មានទឹកស្អាតប្រើប្រាស់ប្រចាំថ្ងៃក៏ជាបញ្ហាប្រឈម ។ ពិសេសនោះការខាតបង់ទិន្និផលដែលបានលិចលង់ ព្រោះនៅមិនទាន់បានប្រមូលផល ដោយខ្លះត្រូវសម្រេចបង្ខំប្រមូលផល មុនរដូវដែលពួកគាត់បានចាត់ទុកថា គឺជាទុក្ខដ៏ធំមួយរបស់ប្រជាកសិក ៕
ចែករំលែកព័តមាននេះ