រាជធានីភ្នំពេញ ៖ សម្រាប់ការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ រដ្ឋសភាគណបក្សប្រជាជនកម្ពុជាជាគណបក្សកាន់អំណាចបន្តឈ្នះយ៉ាងភ្លុកទឹកប្លួកដីពោល គឺហួសអ្វីដែលរំពឹងទុក ។ នេះបើតាមការឲ្យដឹងពីអ្នកនាំពាក្យ ។ លោក សុខ…
រាជធានីភ្នំពេញ ៖ សម្រាប់ការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ រដ្ឋសភាគណបក្សប្រជាជនកម្ពុជាជាគណបក្សកាន់អំណាចបន្តឈ្នះយ៉ាងភ្លុកទឹកប្លួកដីពោល គឺហួសអ្វីដែលរំពឹងទុក ។ នេះបើតាមការឲ្យដឹងពីអ្នកនាំពាក្យ ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យកោះសន្តិភាពដឹងតាមទូរស័ព្ទនាថ្ងៃទី ៣១ កក្កដាថា គណបក្សប្រជាជនកម្ពុជាឈ្នះក្នុងការបោះឆ្នោតយ៉ាងប្លួកទឹក ប្លួកដី គឺហួសពីអ្វីដែលរំពឹងទុកចំពោះអាសនៈរដ្ឋសភា ។ សម្រាប់សម្លេងអាសនៈក្នុងរដ្ឋសភាវិញ លោកសុខ ឥសានមិនបានឲ្យដឹងថា មានចំនួនប៉ុន្មានច្បាស់លាស់ទេ តែលោកគ្រាន់តែថា ត្រូវបានដឹងជាមុនរួចហើយ គឺមានចំនួនច្រើនហួសពីអ្វីដែលរំពឹងទុក ។ លោកថា ចំពោះអាសនៈក្នុងរដ្ឋសភាទុកឲ្យគណៈកម្មការជាតិប្រកាសជូនដែលលទ្ធផលបណ្តោអាសន្នធ្វើនៅថ្ងៃទី១១ ខែសីហា ហើយលទ្ធផលផ្លូវការនៅថ្ងៃទី១៥ ខែសីហា ឆ្នាំ២០១៨ខាងមុខនេះ ។
សម្លេងអាសនៈក្នុងសភាវិញត្រូវបានមតិមួយចំនួនលើកឡើងថា គណបក្សប្រជាជនកម្ពុជាបានច្រើនលើសលុប បើតាមរូបមន្តដដែលមានចែងក្នុងច្បាប់ស្តីពីអ្នកតំណាងរាស្ត្រយ៉ាងណាក្តី អ្នកនាំពាក្យបក្សកាន់អំណាចមិនបានបង្ហា្ញឲ្យដឹងនោះទេ ។ លោកសុខ ឥសាន បញ្ជាក់ថា ៖« រឿងអាសនៈនឹងយើង ដឹងហើយ ប៉ុន្តែយើងមិនអាចប្រាប់ទេ ព្រោះថា អ្នកសារព័ត៌មានតែងតែយកពាក្យខ្ញុំបន្ថែម ។ អីញ្ចឹងទេខ្ញុំគ្រាន់តែផ្តល់យោបល់ថា ផ្អែកទៅតាមសម្លេងឆ្នោតដែលទូរទស្សន៍ជាតិកម្ពុជាផ្សាយនោះ គណបក្សប្រជាជនកម្ពុជា និងទទួលបានជ័យជំនះដ៏ធំធេងប្លួកទឹកប្លួកដី ហួសពីការស្មាន» ។
ជាមួយគ្នានោះដែរលោក សុខ ឥសាន ក៏បានឲ្យដឹងបេក្ខជនជា អ្នកតំណាងរាស្ត្រអាណត្តិទី៦ និងត្រូវប្រកាសសុពលភាពក្រោយការបោះឆ្នោតចំនួន៦០ថ្ងៃ ។ លោកបន្តថា«សុពលភាពអ្នកតំណាងរាស្ត្រនឹងត្រូវប្រកាសមិនឲ្យហួសរយៈពេល៦០ថ្ងៃនោះទេ គឺក្នុងអំឡុងខែកញ្ញា ឆ្នាំ២០១៨ ។ យោងតាមស្មារតីរដ្ឋធម្មនុញ្ញព្រះមហាក្សត្រ និងកោះប្រជុំរដ្ឋសភាពេញអង្គលើកដំបូងមុន៦០ថ្ងៃនោះទេ អាចបើកសម័យប្រជុំនៅចន្លោះពីថ្ងៃទី២៥ ដល់ថ្ងៃទី២៧ ខែក ញ្ញាខាងមុខហ្នឹង» ។
ទាក់ទិននឹងការចេញថ្លែងការណ៍របស់រដ្ឋមន្ត្រីព័ត៌មានរបស់សហរដ្ឋអាមេរិកវិញ លោក សុខ ឥសានបានអះអាង គឺជាសិទ្ធិរបស់គេ ប៉ុន្តែការចេញសេចក្តីថ្លែងការណ៍នេះមិនបង្ហាញពីការពិតនោះទេព្រោះ ថាការបោះឆ្នោតនៅកម្ពុជាបានប្រព្រឹត្តិទៅដោយរលូនគ្មានហិង្សាការគំរាមកំហែង និងបាតុភាពណាមួយនោះទេ ។
លោកបន្តការបោះឆ្នោតនៅកម្ពុជាធ្វើឡើងតាមប្រទេសកាន់របបលទ្ធិប្រជាធិតេយ្យកម្ពុជាមិនធ្វើតាមក្រោមលទ្ធិប្រជាធិបតេយ្យអាមេរិកនោះទេ ។ កម្ពុជាមិនបានភ័យព្រួយចំពោះទីផ្សារនាំចេញពីកម្ពុជាទៅអាមេរិកនោះទេ ព្រោះថា ការនាំចេញទំនិញពីកម្ពុជាបណ្តាប្រទេសនានាស្ថិតក្នុងកិច្ចព្រមព្រៀងពាណិជ្ជកម្មការងារ ដូច្នេះគេមើលទៅលើលក្ខខណ្ឌរបស់កម្ពុជាមានភាពល្អប្រសើរ ឬអត់ ។
លោក សុខ ឥសាន ក៏បានហៅការថ្លែងការណ៍របស់រដ្ឋមន្ត្រីព័ត៌មានអាមេរិកជារឿងមួយដែលមិនអាចស្រប និងតថភាពសង្គមកម្ពុជានោះទេ ។ ដូច្នេះគ្មានប្រសិទ្ធិភាពនៅកម្ពុជាឡើយ ហើយកម្ពុជាធ្វើឡើងស្ថិតក្នុងក្របខណ្ឌឯករាជ្យភាព និងអធិបតេយ្យភាពរបស់កម្ពុជា ។ សូមជម្រាបថា ការលើកឡើងរបស់អ្នកនាំពាក្យគណបក្សប្រជាជនកម្ពុជានេះ បន្ទាប់ពីរដ្ឋមន្ត្រីព័ត៌មានអាមេរិកកាល ពីថ្ងៃទី២៩ កក្កដានេះបានចេញសេចក្តីថ្លែងការណ៍ជុំការបោះឆ្នោតនៅកម្ពុជាថា មិនគោរពលទ្ធិប្រជាធិបតេយ្យមិនស្មើភាពជាដើម ។ ថ្លែងការណ៍ថា ការបោះឆ្នោតសភាដែលមានកំហុសឆ្គងនៅកម្ពុជាសហរដ្ឋអាមេរិកមានការសោកស្តាយដែលការបោះឆ្នោតសភានៅកម្ពុជានៅថ្ងៃទី២៩ ខែកក្កដា គ្មានភាពសេរី និងយុត្តិធម៌ ហើយមិនតំណាងឲ្យឆន្ទៈរបស់ប្រជាជនកម្ពុជា ។
ការបោះឆ្នោតដែលមានកំហុសឆ្គងនេះដែលបានផាត់ចេញនូវគណបក្សប្រឆាំងសំខាន់ជាងគេនៅកម្ពុជា គឺជាបរាជ័យមួយយ៉ាងធំបំផុតចំពោះប្រព័ន្ធប្រជាធិបតេយ្យដែលមានចែងនៅក្នុងរដ្ឋធមុ្មនុញ្ញនៃប្រទេសកម្ពុជា ហើយកាត់បន្ថយយ៉ាងច្រើននូវការសម្រេចបានរបស់ប្រទេសកម្ពុជានៅក្នុងការជំរុញការផ្សះផ្សានយោបាយ និងកំណើនសេដ្ឋកិច្ចតាំងពីមានកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ មក ។
ថ្លែងការណ៍បញ្ជាក់ថា «យើងមានការខកខិត្តយ៉ាងខ្លាំងដែលរដ្ឋាភិបាលកម្ពុជាសម្រេចដកសិទ្ធិបោះឆ្នោតពីអ្នកបោះឆ្នោតរាប់លាននាក់ ដែលមានមោទនភាពដោយត្រឹមត្រូវចំពោះការអភិវឌ្ឍនៃប្រទេសរបស់គេ នៅក្នុងរយៈពេល២៥ឆ្នាំកន្លងមកនេះ» ៕
ចែករំលែកព័តមាននេះ