ខេត្តព្រៃវែង ៖ រថយន្ត និងម៉ូតូរាប់ពាន់គ្រឿង បានកកស្ទះបន្តកន្ទុយគ្នាជិត៧គីឡូម៉ែត្រ នៅលើកំណាត់ផ្លូវជាតិលេខ១ ចាប់ពីចំណុចគល់ស្ពានស្ទឹងស្លូត រហូតដល់ផ្សារកំពង់សឹង្ហ ដោយសារតែបងប្អូនប្រជាពលរដ្ឋនៅខេត្តព្រៃវែង និងខេត្តស្វាយរៀង…
ខេត្តព្រៃវែង ៖ រថយន្ត និងម៉ូតូរាប់ពាន់គ្រឿង បានកកស្ទះបន្តកន្ទុយគ្នាជិត៧គីឡូម៉ែត្រ នៅលើកំណាត់ផ្លូវជាតិលេខ១ ចាប់ពីចំណុចគល់ស្ពានស្ទឹងស្លូត រហូតដល់ផ្សារកំពង់សឹង្ហ ដោយសារតែបងប្អូនប្រជាពលរដ្ឋនៅខេត្តព្រៃវែង និងខេត្តស្វាយរៀង នាំគ្នាធ្វើដំណើរត្រឡប់ទៅទីក្រុងភ្នំពេញវិញ ក្រោយពីបានចូលរួមបោះឆ្នោតជ្រើសរើសតំណាងរាស្ត្រ នីតិកាលទី៦ កាលពីថ្ងៃទី២៩ កក្កដាកន្លងទៅ។
ការកកស្ទះនេះ បានចាប់កើតឡើងនៅវេលាម៉ោង ៣រសៀល ថ្ងៃទី៣០កក្កដា ដោយមុនដំបូងគឺស្ទះជាប់គាំងនៅចំណុចស្ពានស្ទឹងស្លូត ដែលជាព្រំប្រទល់រវាងស្រុកពាមរក៍ និងស្រុកព្រះស្តេច ដោយសារតែមិនអាចទៅមុខរួច ឯម៉ូតូ និងរថយន្តបងប្អូនប្រជាពលរដ្ឋ ដែលមកពីស្រុកបាភ្នំ ស្រុកព្រះស្តេច និងស្រុកកំពង់ត្របែក ព្រមទាំងមកពីខេត្តស្វាយរៀង កាន់តែច្រើនឡើងៗទើបធ្វើឲ្យស្ទះបន្តកន្ទុយគ្នា ពីស្ពានស្ទឹងស្លូត ទៅកើតរហូតដល់ផ្សារកំពង់សឹង្ហ ចម្ងាយជិត៥គីឡូម៉ែត្រ និងពីស្ពានស្ទឹងស្លូតទៅលិចរហូតដល់ រង្វង់មូលត្រីកោណ ផ្លូវឡើងស្ពានអ្នកលឿងចម្ងាយជិត៣គីឡូម៉ែត្រ។
ភ្លាមៗបន្ទាប់ពីមានការកកស្ទះខ្លាំងបែបនេះ គេឃើញកម្លាំងកងរាជអាវុធហត្ថខេត្តព្រៃវែងចំនួន៥៩នាក់ ដឹកនាំដោយលោកវរៈសេនីយឯង ហ៊ុយ វុទ្ធា មេបញ្ជាការរង និងជានាយសេនាធិការកងរាជអាវុធហត្ថ ខេត្តព្រៃវែង និងកម្លាំងនគរបាលជាច្រើនរូប បានចេញជួយធ្វើអន្តរាគមន៍សម្រួលចរាចរណ៍ ហើយបានប្រើពេលវេលាអស់រយៈពេលជាង៣ម៉ោង ទើបចរាចរណ៍មានភាពប្រសើរឡើងវិញ ហើយបងប្អូនប្រជាពលរដ្ឋក៏អាចធ្វើដំណើរទៅមក បានយ៉ាងស្រួលផងដែរ។
ចំពោះមូលហេតុនៃ ការកកស្ទះនេះ ត្រូវបានសមត្ថកិច្ចប្រាប់ឲ្យដឹងថា គឺបណ្តាលមកពីស្ពានស្ទឹងស្លូតនេះមានទំហំតូច ហើយបងប្អូនអ្នកដំណើរខ្វះការយោគយល់គ្នា ម្នាក់ៗប្រជ្រៀតដណ្តើមគ្នាទៅមុននៅលើស្ពាននេះ ទើបធ្វើឲ្យជាប់គាំងទៅមុខមិនរួច ថយក្រោយមិនកើត និងធ្វើឲ្យកកស្ទះចរាចរណ៍ជាច្រើនគីឡូម៉ែត្រ បែបនេះទៅ៕
https://youtu.be/KBOjRquj180
ចែករំលែកព័តមាននេះ