ខេត្តព្រះសីហនុ ៖ សពក្មេងប្រុស ស្រី វ័យ១៤ឆ្នាំចំនួន២នាក់ត្រូវបានប្រជាពរដ្ឋរាវរកឃើញម្តងម្នាក់ៗ នៅក្នុងទឹកសមុទ្រ បន្ទាប់មានការភ្ញាក់ផ្អើលឆោឡោថា ក្មេងទាំងពីរនាក់នេះត្រូវ គេសង្ស័យថា បានលង់ទឹក ខណៈដែលពួកគេទាំង២នាក់នាំគ្នាចុះលេងទឹកក្បែរស្ពានដែលមានទឹកហូរចូលសមុទ្រ។ ហេតុការណ៍ឆោឡោនេះបានកើតឡើងកាលពីវេលាម៉ោង២រសៀលថ្ងៃទី២៩ ខែកក្កដា ឆ្នាំ២០១៨នេះ នៅចំណុចស្ពានចំការដូង ស្ថិតក្នុងភូមិអុងឃុំរាម ស្រុកព្រៃនប់ ខេត្តព្រះសីហនុ។
តាមប្រភពពីសមត្ថកិច្ចបានអោយដឹងថា ក្មេងរងគ្រោះទាំងពីរនាក់ដែលលង់ទឹកស្លាប់ ម្នាក់ ឈ្មោះ កាំង សុសក្កដា ភេទប្រុស អាយុ១៤ឆ្នាំ ជាសិស្ស មានឪពុកឈ្មោះសេង វុត្ថា អាយុ៤៩ឆ្នាំ និងម្នាក់ទៀតឈ្មោះសាង យាន ភេទស្រី អាយុ១៤ឆ្នាំ ជាសិស្ស មានឪពុកឈ្មោះសាង សៀង អាយុ៥៧ឆ្នាំ ។ ក្មេងប្រុសស្រីទាំងពីរនាក់នេះជាបងប្អូនជីដូនមួយនឹងគ្នា និងមានទីលំនៅភូមិអុង ឃុំរាម ស្រុកព្រៃនប់ ខេត្តព្រះសីហនុ ។
ប្រភពដដែលបានបន្តថា បន្ទាប់ពីមានការភ្ញាក់ផ្អើល មានប្រពលរដ្ឋជាច្រើនក្នុងភូមិផងរបងជាមួយបាននាំគ្នាចែវទូក និងឡិបក្នុងទឹករាវរកក្មេងទាំងពីរនាក់ ហើយដោយការព្យាយាមអស់ជាច្រើនម៉ោង សពក្មេងប្រុសម្នាក់ត្រូវបានរាវរកឃើញក្នុងទឹកសមុទ្រ ចំណែកសពក្មេងស្រី គេរកមិនទាន់ឃើញនៅឡើយ។
ប្រភពដដែលនោះបានបន្ថែមថា ប្រតិបត្តិការតាមបច្ចេកទេសផ្សេងៗក្នុងការរាវរកសពក្មេងស្រីម្នាក់ទៀតនៅតែបន្តយ៉ាងសកម្មពីសំណាក់ពលរដ្ឋ ហើយរហូតដល់ម៉ោង២រំលងអាធ្រាត្រឈានចូលថ្ងៃទី៣០ កក្កដា សពក្មេងស្រីរងគ្រោះត្រូវបានរកឃើញបន្តទៀត តាមរយៈប្រើឧបករណ៍នេសាទសន្ទូចអូសត្រី អូសជាប់សពក្មេងស្រីនោះដែលមានចំងាយរាប់រយម៉ែត្រពីទីតាំងសពក្មេងប្រុស និងជាច្រើនរយម៉ែត្រទៀតពីចំណុចក្មេងទាំងពីរនាក់ចុះលេងទឹក ។
សូមបញ្ជាក់ថា មុនពេលកើតហេតុ ក្មេងប្រុសស្រីទាំងពីរនាក់នោះបាននាំគ្នាទៅមុជទឹកលេងនៅក្បែរស្ពានដែលមានទឹកហូរចូលក្នុងសមុទ្រ តែមិនដឹងជាយ៉ាងម៉េច ទើបបណ្តាលឱ្យក្មេងទាំងពីរនាក់ត្រូវលង់ហូរទៅតាមទឹក ធ្លាក់ដល់ក្នុងសមុទ្រ រហូតបាត់បង់ជីវិត ហើយជាមួយគ្នានោះ ការរុករកសពក្មេងទាំងពីរនាក់នោះបានប្រើពេលអស់ជាច្រើនម៉ោង ហើយការរាវរកប្រៀដូចជានេសាទត្រី ទើបសពក្មេងទាំង២នាក់នោះត្រូវបានរកឃើញជាបន្តបន្ទាប់ ៕
ចែករំលែកព័តមាននេះ