ADផ្ទាំងផ្សព្វផ្សាយពាណិជ្ជកម្ម

តាមផ្សារធំៗ និងតាមផ្លូវសារធារណៈមួយចំនួនក្នុងរាជធានីភ្នំពេញហាក់មានសភាពស្ងាត់

7 ឆ្នាំ មុន

២៩ ខែ កក្កដា ឆ្នាំ ២០១៨ ម៉ោង ២០:០១

រាជធានីភ្នំពេញ ៖ ផ្សារធំៗមួយចំនួនក្នុងរាជធានភ្នំពេញដូចជា ផ្សារធំថ្មី ផ្សារអូឡាំពិក ផ្សារចាស់ ផ្សារទួលទំពូង និងតាមបណ្តាផ្សារតូចៗមួយចំនួនទៀត ក៏ដូចជាតាមផ្លូវសាធារណៈទាំងធំ ទាំងតូច ទូទាំងក្នុងរាជធានីភ្នំពេញ ហាក់បីដូចជាមានសភាពស្ងាត់ជ្រងំខុសពីធម្មតា និង ផ្សារមួយចំនួនទៀតបិទទាំងស្រុងក៏មានផងដែរ ក្នុងថ្ងៃបោះឆ្នោតជ្រើសតាំងតំណាងរាស្ត្រនីតិកាលទី៦ ក្នុងថ្ងៃទី២៩ ខែកក្កដា ឆ្នាំ២០១៨នេះ។

ស្ត្រីអ្នកលក់ផ្លែឈើនៅផ្សារទួលទំពូងម្នាក់ឈ្មោះ ប៉ុន ប៊ុនណូ អាយុ៤៧ឆ្នាំ បានរៀបរាប់ប្រាប់ឱ្យដឹងថា ក្នុងថ្ងៃនេះដែរ នៅក្នុងផ្សារទួលទំពូងទាំងមូលមានសភាពស្ងាត់ យ៉ាងខ្លាំង ទាំងក្រុមអាជីវករអ្នកលក់ និងអ្នកទិញ បាននាំគ្នាបិទតូបដើម្បីនាំគ្នាទៅស្រុកបោះឆ្នោតអស់ គ្មានសល់។ ចំណែករូបគាត់វិញទើបតែមកពីបោះឆ្នោតវិញ និងមកផ្សារបើកលក់ប៉ុណ្ណោះ ហើយក៏មានតែអ្នកលក់ដូរ និងអ្នកមកផ្សារតិចតួចប៉ុណ្ណោះនាំគ្នាមកបើកលក់ និងមករកទិអីវ៉ាន់ ដោយមានប្រមាណជា៤០%ប៉ុណ្ណោះ។

ស្ត្រីដដែលបានរៀបរាប់ប្រាប់បន្តទៀតថា ក្នុងថ្ងៃបោះឆ្នោតនេះដែរ ក្រុមអាជីវករទាំងអស់ដែលលក់ដូរក្នុងផ្សារបាននាំគ្នាបិទតូប ដើម្បីទៅបោះឆ្នោត និង ខ្លះទៀតនៅជួបជុំក្រុមគ្រួសាររបស់ពួកគេក៏មាន ហើយមួយចំនួនទៀត ក្រោយពីបោះឆ្នោតរួចនាំគ្នាទៅ ដើរលេងបន្តទៅទៀតក៏មានដែរ។ ការលក់ផ្លែឈើរបស់គាត់នេះ គឺលក់ដាច់ជាធម្មតាទេ ថ្វីបើមានមនុស្សដើរផ្សារតិចតួចមែន ដោយមានទាំងជនបរទេស និងជនជាតិខ្មែររបស់យើង បាននាំគ្នាមករកទិញផ្លែឈើរបស់គាត់ជាបន្តបន្ទាប់។

ស្ត្រីអ្នកលក់ចេកអាំងម្នាក់បានប្រាប់ឱ្យដឹងថា ពេលនេះដែរនៅផ្សារអូឡាំពិកគឺមានការបិទទាំងស្រុងតែម្តង និងមានភាពស្ងប់ស្ងាត់យ៉ាងខ្លាំង ដោយសារតែក្រុមអាជីវករបាននាំគ្នាបិទតូបមិនមកលក់ដូរ និងនាំគ្នារវល់ទៅបោះឆ្នោតអស់គ្នាសល់ នោះ។ ដោយកាលពីព្រឹកមិញខាងផ្សារគេបានមកបើកឲ្យមានការលក់ដូរដែរ តែដោយសារតែគ្មាន ក្រុមអាជីវករមិននាំគ្នាមកលក់ដូរនោះទើបខាងផ្សារសម្រេចបិទផ្សារទាំងស្រុងតែម្តង ដោយមានតែអ្នកលក់ខាងក្រៅបន្តិចបន្តួចដូចជា ចេកអាំង បាយ និងត្រីអាំង ខាងក្រៅខ្លះៗប៉ុណ្ណោះ។

អ្នកស្រីក៏បានប្រាប់ន្តទៀតថា កុំថាឡើយក្រុមអាជីវករដែលក់ដូរខាងក្នុងផ្សារ មិននាំគ្នាមកលក់ សូម្បីតែតាមផ្ទះដូរលុយ លក់មាស លក់ថ្នាំពេទ្យ ខាងក្រៅក៏បានបិទទ្វារមិនលក់ដែរ ថ្វីត្បិតតែផ្សារមាន សភាពស្ងាត់ជ្រងំបែបនេះមែន តែការលក់ចេកអាំងរបស់គាត់នៅតែមានអ្នកមករកទិញហូបដដែល។ ស្របពេលដែលប្រទេសកម្ពុជារបស់យើងក្នុងថ្ងៃបោះឆ្នោតរើសតំណាងរាស្ត្រនីតិកាលទី៦នេះដែរ តាមបណ្តាអង្គភាព អង្គភាព ស្ថាប័នរដ្ឋ ក្រុមហ៊ុនវិនិយោគឯកជន បណ្តារោងចក្រកាត់ដេរ ត្រូវបានបិទទ្វារ និងឈប់សម្រាក ដើម្បីឲ្យបុគ្គលិកនាំគ្នាទៅបោះឆ្នោតផងដែរ៕