ខេត្តពោធិ៍សាត់ ៖ ជនសង្ស័យចំនួន០៣នាក់បានត្រូវសមត្ថកិច្ចឃាត់ខ្លួន ខណៈពេលកំពុងលួចឈើក្នុងផ្នែករដ្ឋបាលព្រៃឈើស្រុកភ្នំក្រវាញ ហេតុការណ៍នេះកើតឡើងកាលពីវេលាម៉ោង១៦និង២០នាទីល្ងាច ថ្ងៃទី២៤ ខែកក្កដាឆ្នាំ២០១៨។ ជនសង្ស័យទាំង០៣នាក់ខាងលើ ១-ឈ្មោះ ធឿន…
ខេត្តពោធិ៍សាត់ ៖ ជនសង្ស័យចំនួន០៣នាក់បានត្រូវសមត្ថកិច្ចឃាត់ខ្លួន ខណៈពេលកំពុងលួចឈើក្នុងផ្នែករដ្ឋបាលព្រៃឈើស្រុកភ្នំក្រវាញ ហេតុការណ៍នេះកើតឡើងកាលពីវេលាម៉ោង១៦និង២០នាទីល្ងាច ថ្ងៃទី២៤ ខែកក្កដាឆ្នាំ២០១៨។
ជនសង្ស័យទាំង០៣នាក់ខាងលើ ១-ឈ្មោះ ធឿន សុឃឿន ភេទប្រុស អាយុ៣៥ឆ្នាំ ២-ឈ្មោះ ចេក សុខសាន្ដ ភេទប្រុស អាយុ១៧ឆ្នាំ ទាំងពីរនាក់នេះរស់នៅភូមិព្រែក១ ឃុំសំរោង និង៣-ឈ្មោះ អឿន សុខរ៉ា ភេទប្រុស អាយុ២០ឆ្នាំ រស់នៅភូមិពេជបានឃុំសំរោង ស្រុកភ្នំក្រវាញ។
តាមសមត្ថកិច្ចឲ្យដឹងថា កាលពីថ្ងៃទី២២ កក្កដា មានក្រុមចោរមួយក្រុមបានជីករូងដីទំលុះក្រោមរបងថ្មចូលទៅក្នុងបរិវេណរដ្ឋបាលព្រៃឈើស្រុកភ្នំក្រវាញ ហើយបានលួចយកឈើក្ដារអស់ចំនួន២២សន្លឹក ម៉ាស៊ីនភ្លើង០១គ្រឿង ម៉ាស៊ីនកុំព្យូទ័រ ០១គ្រឿង និងអាគុយ១២០អំពែ ០១គ្រឿងទៅបាត់។
សមត្ថកិច្ចបន្តថា បន្ទាប់ពីដឹងហេតុការណ៍នេះភ្លាម មន្ត្រីមេព្រៃសហការជាមួយនគរបាលប៉ុស្ដិ៍រដ្ឋបាលសំរោង និងកម្លាំងប្រជាការពារចាំឃ្លាំមើល។ លុះមកដល់ថ្ងៃទី២៤ កក្កដា វេលាម៉ោង១៦និង២០នាទីល្ងាច ស្រាប់តែមានក្រុមចោរមួយក្រុមមានគ្នា០៣នាក់ ចូលមកលួចឈើធ្នង់តាមរូងដីនោះដដែល ប៉ុន្តែខណៈពេលដែលកំពុងធ្វើសកម្មភាពដឹកជញ្ជូនឈើធ្នង់ចេញទើបតែបាន០៣សន្លឹក ក៏ត្រូវសមត្ថកិច្ចក្របួចជាប់ទាំង០៣នាក់តែម្ដង។
បច្ចុប្បន្ននេះ ជនសង្ស័យទាំង៣នាក់ និងវត្ថុតាងសមត្ថកិច្ចបានកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការបន្តតាមនីតិវិធី៕
ចែករំលែកព័តមាននេះ