ខេត្តព្រៃវែង ៖ បុរស២នាក់បានរងរបួសធ្ងន់ធ្ងរនៅក្នុងហេតុការណ៌គ្រោះថ្នាក់ចរាចរណ៌២ករណីផ្សេងពីគ្នា ដែលបានកើតឡើងក្នុងរយៈពេលតែ១៥នាទីប៉ុណ្ណោះ ដែលមូលហេតុបង្កឡើងគឺដោយសារតែការបើកបរខ្វះការប្រុងប្រយ័ត្ន ។
ករណីទី១ បានកើតឡើងនៅវេលាម៉ោង១១ព្រឹក ថ្ងៃទី២៦ កក្កដា នៅលើកំណាត់ផ្លូវជាតិលេខ៣១៤ ត្រង់ចំណុចភូមិព្រៃស្រមោច ឃុំអង្គររាជ្យ ស្រុកព្រះស្តេច ខេត្តព្រៃវែង រវាងរថយន្តមួយគ្រឿងម៉ាកហ៊ីយ៉ាន់ ពណ៌ស ពាក់ស្លាកលេខ ព្រៃវែង 3A-0895 បានបុកជាមួយនឹងម៉ូតូមួយគ្រឿងម៉ាក ហុងដាC125 ពណ៌ខ្មៅ ពាក់ស្លាកលេខ កណ្តាល 1J-9144 ។
ប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុគេឃើញរថយន្តខាងលើ ធ្វើដំណើរមកក្នុងទិសដៅពីលិចទៅកើត ក្នុងល្បឿនយ៉ាងលឿន ពេលមកដល់ចំណុចកើតហេតុ ដែលជាចំណុចផ្លូវកោង រថយន្តព្យាយាមយកចង្កូតទៅឆ្វេងដៃ តែយកខ្លាំងពេកក៏ជ្រុលចង្កូតទៅបុកម៉ូតូហុងដា ដែលបើកមកបញ្ច្រាសទិសគ្នាពេញទំហឹងបណ្តាលអោយអ្នកបើកបរម៉ូតូឈ្មោះ ហុល ខាន់ ភេទប្រុស អាយុ៥៦ឆ្នាំ រងរបួសធ្ងន់ ហើយត្រូវបានគេដឹកយកទៅសង្គ្រោះនៅមន្ទីរពេទ្យភ្លាមៗក្រោយពីកើតហេតុ ចំណែកអ្នកបើកបររថយន្តបង្កបានរត់គេចខ្លួនបាត់បន្សល់ទុកតែរថយន្តនៅហ្នឹងកន្លែងកើតហេតុ ។
ក្រោយពីកើតហេតុប្រមាណជា១០នាទី សមត្ថកិច្ចក៏បានទៅដល់កន្លែងកើតហេតុ ធ្វើការវាស់វែង និងសម្រួលចរាចរណ៌ រួចប្រមូលយកទាំងម៉ូតូ និងរថយន្តទៅរក្សាទុកនៅអធិការដ្ឋាននគរបាលស្រុកព្រះស្តេចរងចាំការដោះស្រាយនៅពេលក្រោយ ។
ករណីទី២ បានកើតឡើងនៅវេលាម៉ោង១១និង១៥នាទីព្រឹក ថ្ងៃទី២៦ កក្កដា នៅលើកំណាត់ផ្លូវជាតិលេខ១១ ចន្លោះភូមិស្តៅ និងភូមិពន្លៃ ស្ថិតក្នុងឃុំព្រៃកណ្តៀង ស្រុកពាមរក៍ ខេត្តព្រៃវែង ។ ករណីនេះបង្កឡើងដោយរថយន្តមួយគ្រឿង ដែលគេមិនស្គាល់ម៉ាក ព្រោះបានបើករត់គេចទៅបាត់បន្សល់ទុកតែម៉ូតូជនរងគ្រោះ និងជនរងគ្រោះឈ្មោះ សុខ កែវ ភេទប្រុស អាយុ២៣ឆ្នាំ ជនជាតិវៀតណាម មានទីលំនៅក្នុងភូមិ៦ សង្កាត់កំពង់លាវ ក្រុងព្រៃវែង ខេត្តព្រៃវែងសន្លប់ស្តូកស្តឹងនៅនិងកន្លែងកើតហេតុតែម្តង ។
យោងតាមការអះអាងរបស់ជនរងគ្រោះ ព្រមទាំងការបំភ្លឺពីសាក្សីនៅក្បែកន្លែងកើតហេតុ បានអោយដឹងថា មុនពេលកើតហេតុ ជនរងគ្រោះបានជិះម៉ូតូមួយគ្រឿងម៉ាកវ៉េវ ពណ៌ខ្មៅពាក់ស្លាកលេខ ព្រៃវែង 1C-7833 ដើររកទិញកណ្តុរនៅតាមភូមិដឹកយកទៅលក់នៅប្រទេសវៀតណាម ពេលជិះមកដល់ចំណុចកើតហេតុក្នុងទិសដៅពីជើងទៅត្បូង ស្រាប់តែមានរថយន្តមួយគ្រឿងដែលមើលមិនស្គាល់ម៉ាក បើកមកបញ្ច្រាស់ទិសគ្នាក្នុងល្បឿនយ៉ាងលឿន បានរេចង្កូតមកបុកម៉ូតូជនរងគ្រោះចំពេញទំហឹង បណ្តាលអោយម៉ូតូនិងជនរងគ្រោះ ប៉ើងខ្ទាតជាច្រើនម៉ែត្រសន្លប់ស្តូកស្តឹងនៅនិងកន្លែង ចំណែករថយន្តបង្កហេតុពេលបុកជនរងគ្រោះហើយ ក៏បានបង្កើនល្បឿនរថយន្ត បើករត់គេចខ្លួនបាត់ស្រមោលតែម្តង ៕
ចែករំលែកព័តមាននេះ