ខេត្តកណ្តាល ៖ ខណៈទឹកទន្លេមេគង្គកំពុងតែហក់ឡើងយ៉ាងលឿនបង្កឲ្យដំណាំរបស់ប្រជាពលរដ្ឋ មួយចំនួននៅតាមជួរមាត់ទន្លេក្នុងស្រុកកៀនស្វាយ និងស្រុកលើកដែក ខេត្តកណ្តាលមួយចំនួន ដែលមិនទាន់បានប្រមូលផលត្រូវរងនូវការលិចលង់ខូចខាតទាំងស្រុង។ បើតាមប្រជាកសិករ រស់នៅក្នុងស្រុកទាំងពីរខាងលើបានលើកឡើងថា ដំណាំរបស់ពួកគាត់មួយចំនួន ដែលមិនទាន់ បានប្រមូលផលត្រូវលិចទឹកនេះរូមមាន ស្រូវ ពោត ត្រឡាច ពពាយ ម្ទេស ននោង។ល។ កសិករបន្តថា ទឹកទន្លេឆ្នាំនេះឡើងលឿនខុសឆ្នាំមុន ដោយកាលពីឆ្នាំទៅដើមខែសីហា ទើបទឹកឡើងហូរចូលអូរ សន្សឹមៗ។
ស្រាប់តែឆ្នាំនេះទឹកចាប់ផ្តើមឡើងគំហុកយកចាប់តាំងពីពាក់កណ្តាលខែកក្កដា ហេតុដូច្នេះហើយធ្វើដំណាំរបស់ពួកគាត់មួយចំនួនដាំក្រោយៗនៅតាមតំបន់ទំនាបអូរប្រមូលផលមិនទាន់ត្រូវទឹកលិចក្លាយជាចំណីសត្វត្រី។ រីឯដំណាំនៅតាមទីទួលមួយចំនួនទឹកមិនទាន់លិចទេគឺពួកគាត់ កំពុងតែប្រមូលផលយកមកលក់បណ្តើរ។ ប៉ុន្តែគ្រាន់តែតម្លៃវាថោកដូចជាពពាយ១គីឡូក្រាម៩០០រៀល ត្រឡាច១គីឡូក្រាម៧០០រៀល សណ្តែកកួរ១គីឡូក្រាម៧០០រៀល ត្រប់១គីឡូក្រាម៤០០រៀល ត្រសក់៤០០រៀល បើពោត និងរំដេងវិញគ្មានឈ្មួញមកទិញសោះ។
ចំណែកស្រូវធ្វើនៅលើផ្ទៃដី តិចៗប្រមូលផលបានបន្តិចបន្តួចគ្រាន់ទុកហូបខ្លួនឯងនៅតាមផ្ទះ។ ទន្ទឹមនឹងដំណាំធ្លាក់ថ្លៃនេះដែរ ប្រជាកសិករក្នុងស្រុកកៀនស្វាយ និងស្រុកលើកដែក ក៏សូមសំណូមពរដលអាជ្ញាធរពាក់ព័ន្ធ ជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី មេត្តាជួយរកទីផ្សារឲ្យកសិផល ដំណាំរបស់ប្រជាកសិករខ្មែរឲ្យបានថ្លៃខ្ពស់ផង។ សូមជួយឲ្យបានពពាយតម្លៃ៥.០០០រៀល ក្នុង១គីឡូក្រាម ត្រឡាច៣.០០០រៀលក្នុង១គីឡូក្រាម សណ្តែកកួរ៣.០០០រៀល ក្នុង១គីឡូក្រាម ត្រប់២.០០០រៀល ក្នុង១គីឡូក្រាម ត្រសក់២.០០០រៀល ក្នុង១គីឡូក្រាម ទើបប្រជាកសិករ បានចំណេញប្រាក់ខ្លះគ្រាន់បង់សងរំលួសធនាគារ ឬតាមបណ្តាមីក្រូហិរញវត្ថុឯកជនផ្សេងៗ និងនៅសល់ប្រាក់ខ្លះផ្គត់ផ្គង់ដោះស្រាយជីវភាពក្នុងគ្រួសារឲ្យកូនរៀនសូត្រផង។
ពាក់ពន្ធ័គ្រោះទឹកជំនន់ប៉ះពាល់ផលដំណាំប្រជាកសិករនេះដែរ លោក នូវ សំណាង អភិបាលស្រុកលើកដែក បានប្រាប់ឲ្យដឹងថា នៅទូទាំងស្រុកមានផ្ទៃដីកសិកម្មជិត៨.០០០ហិកតា ហើយប្រជាពលរដ្ឋជាង៨០ភាគរយដែលប្រកបមុខរបរបង្កបង្កើនផលដំណាំកសិកម្មធ្វើស្រូវ.ពោត និងដំណាំបន្លែផ្សេងៗ។ ចំពោះប្រជាពលរដដ្ឋប្រមូលផលបានប្រហែលជាង៨០ភាគរយហើយ នៅសល់តែប្រហែល១៦ភាគរយតែប៉ុណ្ណោះ ដោយខ្លះនៅតាមតំបន់ទំនាបប្រមូលមិនទាន់ទឹកលិច និងខ្លះទៀតទើបនឹងដាក់ដាំសារក្រោយតែទឹកមិនទាន់លិចទេ។ លោកអភិបាលបញ្ជាក់បន្ថែមថា ដោយអនុវត្តន៍តាមបទបញ្ជារបស់ប្រមុខរាជរដ្ឋាភិបាលអាជ្ញាធរស្រុកបានត្រៀមលក្ខណៈជាប្រចាំដើម្បីណែនាំ និងជួយទប់ស្កាត់ ហើយសង្គ្រោះដាច់ខាតមិនឲ្យពលរដ្ឋណាម្នាក់មានគ្រោះថ្នាក់ បាត់បង់ជីវិតដោយសារទឹកជំនន់នោះឡើយ។
ដោយឡែកលោក អ៊ូ ឈាង អភិបាលស្រុកកៀនស្វាយ ដោយសារលោកកំពុងជាប់រវល់ប្រជុំមួយថ្ងៃពេញ ក៏បានប្រាប់យ៉ាងខ្លីថា មិនមានប៉ះពាល់អ្វីធ្ងន់ធ្ងរនោះទេ ព្រោះទឹកទើបនឹងហូរចូលតាមទំនាបៗលិចបន្តិចបន្តួចជួរដងមាត់ទន្លេប៉ុណ្ណោះ។ ហើយអាជ្ញាធរក៏បានណែនាំ និងបានត្រៀមរួចជាស្រេចសម្រាប់ការជួយទប់ស្កាត់សង្គ្រោះពលរដ្ឋ ឲ្យស្របតាមអនុសាសន៍របស់ប្រមុខរាជរដ្ឋាភិបាលមិនថាយប់ ឬថ្ងៃនោះទេ ដាច់ខាតមិនឲ្យមានពលរដ្ឋណាម្នាក់គ្រោះថ្នាក់បាត់បង់អាយុជីវិតនោះឡើយ៕
ចែករំលែកព័តមាននេះ