ខេត្តព្រះវិហារ ៖ ពិតជាមិនអាចស្មានដល់សោះឡើយដែលថា រថយន្តខ្លួនឯង បែរជាបុកម្ចាស់ទាំងកំរោលរហូតដល់ស្លាប់ ពេលបញ្ជូនទៅកាន់មន្ទីរពេទ្យ ។ ហេតុការណ៍នេះ បានកើតឡើង បន្ទាប់ពីម្ចាស់រថយន្តបើកទៅលេងផ្ទះមិត្តភក្តិ…
ខេត្តព្រះវិហារ ៖ ពិតជាមិនអាចស្មានដល់សោះឡើយដែលថា រថយន្តខ្លួនឯង បែរជាបុកម្ចាស់ទាំងកំរោលរហូតដល់ស្លាប់ ពេលបញ្ជូនទៅកាន់មន្ទីរពេទ្យ ។ ហេតុការណ៍នេះ បានកើតឡើង បន្ទាប់ពីម្ចាស់រថយន្តបើកទៅលេងផ្ទះមិត្តភក្តិ ហើយពេលទៅដល់ ក៏ពន្លត់ម៉ាស៊ីនចុះពីលើរថយន្ត ទុកឲ្យមិត្តភក្តិម្នាក់នៅលើរថយន្ត ។
បន្ទាប់ពីចុះបានមួយសន្ទុះ ក៏ឮសំឡេងរថយន្តបញ្ឆេះឡើងវិញ ហើយឃើញរថយន្តថយក្រោយធ្លាក់ក្នុងភក់ ។ ខណៈឃើញដូច្នេះ បុរសជាម្ចាស់រថយន្តរត់ទៅស្រែកប្រាប់អ្នកនៅក្នុងរថយន្តឲ្យនៅស្ងៀម ចាំខ្លួនទៅបើក ភ្លាមនោះស្រាប់តែរថយន្ត ក៏ហក់ឡើងមកបុកគាត់ទាំងកំរោលតែម្តង បណ្តាលឱ្យរងរបួសធ្ងន់ ។
រឿងរ៉ាវនេះ បានកើតឡើង កាលពីរសៀលថ្ងៃទី២២ ខែកក្កដា នៅភូមិគូលែនត្បូង ឃុំគូលែនត្បូង ស្រុកគូលែន ។
មន្ត្រីនគរបាលស្រុកគូលែនបានឱ្យដឹងថា មុនពេលកើតហេតុ ជនរងគ្រោះជាម្ចាស់រថយន្តបានបើករថយន្តរបស់ខ្លួន ដោយមានអ្នករួមដំណើរម្នាក់ផងមកឈប់មុខផ្ទះអ្នកស្គាល់គ្នា ដែលជាកន្លែងកើតហេតុ ។ ពេលនោះ ជនរងគ្រោះបានពន្លត់ម៉ាស៊ីនរថយន្ត ហើយចុះដើរទៅលេងផ្ទះអ្នកដែលស្គាល់គ្នា ចំណែកអ្នករួមដំណើរមិនបានចុះពីលើរថយន្តនោះទេ ។ ស្របពេលដែលម្ចាស់រថយន្តកំពុងនិយាយគ្នា ស្រាប់តែរថយន្តដែលពន្លត់ម៉ាស៊ីនទៅហើយនោះបានបញ្ឆេះឡើងវិញហើយថយក្រោយធ្លាក់កប់ភក់ ។
នៅពេលឃើញដូច្នេះ ម្ចាស់រថយន្តបានរត់ទៅស្រែកប្រាប់អ្នករួមដំណើរដែលនៅក្នុងរថយន្តឲ្យនៅស្ងៀមចាំខ្លួនទៅបើក ប៉ុន្តែនិយាយមិនទាន់ផុតពីមាត់ផង ស្រាប់តែរថយន្តហក់ឡើងពីភក់បុកគាត់ផ្ទប់នឹងម៉ូតូ ហើយបន្តទៅបុកសសរផ្ទះបាក់អស់២ដើមទៀត ។ ក្រោយកើតហេតុ ជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ តែបានស្លាប់នៅតាមផ្លូវ ។
មន្ត្រីនគរបាលស្រុកគូលែន បានឲ្យដឹងទៀតថា ជនរងគ្រោះជាម្ចាស់រថយន្តឈ្មោះ ធួន សាវៀត អាយុ៤៦ឆ្នាំ ជាអនុប្រធានការិយាល័យអប់រំ យុវជន និងកីឡាស្រុកគូលែន ចំណែកអ្នករួមដំណើរជាមួយឈ្មោះ ណៃ វណ្ណា ភេទប្រុស អាយុ៣០ឆ្នាំ ជាមន្ត្រីបរិស្ថានប្រចាំនៅស្នាក់ការតាកឹង ។ ឯរថយន្តដែលបុកម្ចាស់ឯងនេះ ម៉ាកតាកូម៉ា ពណ៌សម្បកឪឡឹក ពាក់ផ្លាកលេខភ្នំពេញ ២Q-៩៩២១ បានខូចខាតផ្នែកខាងមុខ និងត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលស្រុក។
ទាក់ទងនឹងហេតុការណ៍ដែលមិនគួរកើតឡើងនេះ ត្រូវបានសមត្ថកិច្ចសន្និដ្ឋានថា អាចបណ្តាលមកពីអ្នករួមដំណើរនៅក្នុងរថយន្តហប់ខ្យល់ពេលពន្លត់ម៉ាស៊ីនរថយន្ត ធ្វើឱ្យគាត់កាច់សោបញ្ឆេះវិញ ស្របពេលមិនចេះបើកផងប៉ះចង្កឹះលេខថយក៏ថយក្រោយធ្លាក់ភក់តែម្តង ។លុះព្យាយាមដាក់ចង្កឹះលេខទៅមុខវិញ ទើបបណ្តាលឱ្យបុកមនុស្សនិងបុកម៉ូតូ ព្រមទាំងបុកសសរផ្ទះបាក់អស់២ដើម ។ ទោះជាយ៉ាងណានេះគ្រាន់តែជាការសន្និដ្ឋានប៉ុណ្ណោះ ឯរឿងពិតយ៉ាងណានោះសមត្ថកិច្ចកំពុងស្រាវជ្រាវបន្តទៀត ។
បើតាមលោកវរសេនីយ៍ទោ ឡាញ់ លីស៊ីវឡេង អធិការនគរបាលស្រុកគូលែន បានឲ្យដឹងនៅព្រឹកថ្ងៃទី២៣ ខែកក្កដាថា បុរសឈ្មោះ ណៃ វណ្ណា ជាមន្ត្រីបរិស្ថានគូលែនព្រហ្មទេពប្រចាំស្នាក់ការតាកឹង បានត្រូវសមត្ថកិច្ចឃាត់ខ្លួន បន្ទាប់ពីមានករណីគ្រោះថ្នាក់នេះ ៕
ចែករំលែកព័តមាននេះ