ខេត្តរតនគីរី ៖ ស្ដ្រីម្នាក់មានជម្លោះជាមួយប្ដីចងកសម្លាប់ខ្លួនស្លាប់ចោលកូនស្រីអាយុ២ខែ ហេតុការណ៍នេះបានកើតឡើងកាលពីវេលាម៉ោង៦និង៥០នាទីយប់ថ្ងៃទី១៩ ខែកក្កដា ឆ្នាំ២០១៨ ស្ថិតនៅក្នុងផ្ទះជនរងគ្រោះ ក្នុងភូមិប៉ាណល់ ឃុំទីងចាក់ ស្រុកបកែវ ។
តាមប្រភពពីសមត្ថកិច្ចដែលចុះទៅពិនិត្យផ្ទាល់បានឱ្យដឹងថា ស្ត្រីរងគ្រោះដែលស្លាប់ឈ្មោះពីនណាត់ អាយុ២៥ឆ្នាំ មានប្ដីឈ្មោះទីង ហុង ។ ទាំង២នាក់ប្ដីប្រពន្ធជាជនជាតិទំពួន មានមុខរបរកសិករ និងចាប់តាំងពីរៀបការបាន៣ឆ្នាំ មានកូនស្រីអាយុទើបតែបាន២ខែម្នាក់គត់ ។
សមត្ថកិច្ចបានបន្តទៀតថា បើតាមសម្ដីបងប្អូនសាច់ញាតិរបស់ស្ត្រីរងគ្រោះ និងអ្នករស់នៅក្បែផ្ទះស្ដ្រីរងគ្រោះបានប្រាប់សមត្ថកិច្ចឱ្យដឹងថា កាលពីថ្ងៃទី១៥ ខែកក្កដា ឆ្នាំ២០១៨ ពីនាក់ប្ដីប្រពន្ធនេះមានរឿងរ៉ាវឈ្លោះទាស់ទែងគ្នាយ៉ាងខ្លាំងនៅពេលយប់ ស្រាប់តែព្រឹកឡើងប្ដីរបស់នាងបានវេចខោអាវចេញពីផ្ទះចោលនាងនិងកូនតូចអោយនៅតែពីនាក់យ៉ាងលំបាក។ បន្ទាប់ពីប្តីទៅចោលអស់រយៈពេល៤ថ្ងៃហើយបុរសជាប្តីបានមករស់នៅឯផ្ទះម្ដាយនៅភូមិកាមែន ឃុំឯកភាព ស្រុកអូជុំ ទើបស្ដ្រីជាប្រពន្ធបានខឹងប្ដី ហើយនាងសម្រេចចិត្តចងកសម្លាប់ខ្លួនឯងបែបនេះទៅ ។
សមត្ដកិច្ចបានបន្តទៀតថា ក្រោយពីធ្វើការត្រួតពិនិត្យសពរួច បានរកឃើញថា ស្ត្រីរងគ្រោះពិតជាចងកសម្លាប់ខ្លួនឯងពិតប្រាកដមែន គ្មានរឿងឃាតកម្មអ្វីកើតឡើងនោះទេ ដោយស្ដ្រីរងគ្រោះយកខ្សែអង្រឹងចងកនឹងមេដំបូលផ្ទះកម្ពស់២ម៉ែត្រនៅក្នុងបន្ទប់នាងដេកតែម្ដង ។ ក្រោយសមត្ថកិច្ចធ្វើការត្រួតពិនិត្យរួច សពត្រូវបានប្រគល់ជួនសាច់ញាតិដើម្បីធ្វើបុណ្យតាមប្រពៃណីជនជាតិទំពួន។
បើតាមព័ត៌មានពីបងប្អូនដែលរស់ក្បែរផ្ទះស្ដ្រីរងគ្រោះបានឱ្យដឹងថា ពួកគាត់មានការសោកស្ដាយនាង (ស្ត្រីរងគ្រោះ)យ៉ាងខ្លាំង ព្រោះនាងមានចរឹតស្លូតបូតមិនសូវចេះនិយាយច្រើនទេ ហើយថែមទាំងស្លាប់ចោលកូនដែលទើបតែមានអាយុ២ខែទុកអោយប្ដីមើលថែយ៉ាងលំបាកវេទនា៕
ចែករំលែកព័តមាននេះ