យោងទៅតាមសេចក្តីរាយការណ៍ពីសារព័ត៌មាន Guardian បានឲ្យដឹងថា វាមានការទាក់ទងមួយរវាងជំងឺតាអកធ្ងន់ និងបញ្ហាបេះដូង ។ ការសិក្សាដ៏ធំមួយរបស់ប្រទេសអង់គ្លេសបានរកឃើញថា អ្នកដែលមានជំងឺតាអកធ្ងន់ទំនងជាអាចកើតជំងឺបេះដូងជាច្រើនដូចជា ឈឺដើមទ្រូងដោយសារបេះដូង គាំងបេះដូង និងខ្សោយបេះដូងជាដើម ។
អ្នកស្រាវជ្រាវបានកំពុងតែពិនិត្យទៅលើប្រភេទនៃជំងឺតាអកដែលកើតឡើងញឹកញាប់បំផុត នោះគឺ Atopic Eczema ដែលវាធ្វើឲ្យស្បែកទៅជារមាស់ ក្រហម ស្ងួត និងប្រេះបែក ។ ការសិក្សាបានប្រើប្រាស់កំណត់ត្រារបស់ NHS សម្រាប់មនុស្សពេញវ័យប្រមាណ ៣៨៧៤៣៩នាក់ដែលមានជំងឺតាអក និងផ្គូផ្គងជាមួយអ្នកដែលមិនមានជំងឺនេះ ១.៥២៨.៤៧៧នាក់ផ្សេងទៀត ។
រយៈពេលជាមធ្យមនៃការតាមដាន៥ឆ្នាំ អ្នកស្រាវជ្រាវបានរកឃើញថា អ្នកដែលមានជំងឺតាអកទំនងជាមានជំងឺឈឺទ្រូងដោយសារតែបេះដូង ឬហៅថា Unstable Angina (ដែលអ្នកជំងឺអាចមានរោគសញ្ញាជាច្រើនដែលមិនអាចដឹងទុកជាមុន និងក៏មិនគ្រាន់តែកើតឡើងក្នុងពេលធ្វើសកម្មភាពរាងកាយនោះទេ) ខ្សោយបេះដូង បេះដូងលោតខុសចង្វាក់ ឬដាច់សរសៃឈាមខួរក្បាល ។
ភាពខុសគ្នានេះភាគច្រើនបង្កឡើងដោយសារលទ្ធផលបានពី៥ភាគរយនៃអ្នកដែលស្ថិតក្នុងការសិក្សាមានជំងឺតាអកធ្ងន់ ។ សម្រាប់អ្នកដែលស្ថិតក្នុងសភាពតិចតួច វាក៏មានតិចតួចដែរក្នុងការបង្កើនបញ្ហាលើបេះដូង ។
យើងក៏មិនអាចនិយាយបានថាអ្វីនៅពីក្រោយការប្រឈមមុខនេះដែរ ។ វាអាចដោយសារតែការរលាករយៈពេលវែងបង្កឡើងដោយជំងឺនេះធ្វើឲ្យខូចខាតដល់បេះដូង និងសរសៃឈាម ខណៈពេលដែលការប្រើថ្នាំព្យាបាលជំងឺនេះអាចបង្កើនការប្រឈមនឹងបញ្ហាបេះដូងដែរ (ស្រង់ពីគេហទំព័រសុខភាព) ៕
ចែករំលែកព័តមាននេះ