ខេត្តបន្ទាយមានជ័យ ៖ ដោយពិនិត្យឃើញពីការរស់នៅលំបាកវេទនាគ្មានទីជម្រកត្រឹមត្រូវ និងគ្មានទីពឹងអាស្រ័យលោកយាយ លោកតាក្រីក្រចំនួន៤គ្រួសារ ក្នុងនោះរស់នៅក្នុងស្រុកសិរីសោភ័ណ២គ្រួសារ និងស្រុកថ្មពួក ចំនួន២គ្រួសារ បានទទួលផ្ទះទេវតាចំនួន៤ខ្នង ធ្វើអំពីថ្មប្រក់ស័ង្កសីមានទំហំ៧គុណ៦ម៉ែត្រ ដែលជាអំណោយដ៏ថ្លៃថ្លារបស់លោកជំទាវហ៊ុន ម៉ាណា អគ្គនាយិកានៃអគ្គនាយកដ្ឋានវិទ្យុ និងទូរទស្សន៍បាយ័ន និងជាប្រធានមូលនិធិបាយ័ន។ ពិធីប្រគល់ផ្ទះទេវតាធ្វើឡើងកាលពីព្រឹកថ្ងៃទី១៩ មីនា ២០១៣ ក្រោមការអញ្ជើញចូលរួមពីលោកជំទាវ ហ៊ុន ម៉ាលី បុត្រីពៅ សម្តេចតេជោ ហ៊ុន សែន និងលោកជំទាវ កិត្តិព្រឹទ្ធ បណ្ឌិត ប៊ុន រ៉ានី ហ៊ុន សែន និងជាតំណាងដ៏ខ្ពង់ខ្ពស់របស់លោកជំទាវ ហ៊ុន ម៉ាណា និងមានការរួមដំណើរដោយលោកម៉ឹង ពន្លក ប្រធានចលនាយុវជនក្រុម១៥៧ ព្រមទាំងអាជ្ញាធរខេត្ត ស្រុក ក្រុង និងប្រជាពលរដ្ឋចូលរួមយ៉ាងច្រើនកុះករ។
លោកម៉ឹង ពន្លក ប្រធានចលនាយុវជនក្រុម១៥៧ ជំនួសឲ្យលោកជំទាវ ហ៊ុន ម៉ាលី បានមានមតិនាឱកាសនោះថា តាមរយៈលោកជំទាវហ៊ុន ម៉ាលី សូមពាំនាំនូវការសាកសួរសុខទុក្ខពីសំណាក់លោកជំទាវ ហ៊ុន ម៉ាណា និងការផ្តាំផ្ញើនឹករលឹកពីសម្តេចតេជោហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនចំពោះបងប្អូនប្រជាពលរដ្ឋដែលបានចូលរួមក្នុងកម្មវិធីប្រគល់ផ្ទះទេវតានាពេលនេះ ដែលជានិច្ចកាលសម្តេច និងលោកជំទាវ តែងតែគិតគូរពីសុខទុក្ខបងប្អូនប្រជាពលរដ្ឋរស់នៅខេត្តបន្ទាយមានជ័យ ក៏ដូចជាប្រជាពលរដ្ឋនៅទូទាំងប្រទេស៕
ចែករំលែកព័តមាននេះ