រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងរថយន្តដែលពាក់ស្លាកលេខអង្គភាព គឺជារបស់រដ្ឋទោះបីជាឯកជនប្រើលុយផ្ទាល់ខ្លួនទិញយ៉ាងណាក៏ដោយ ។
ការលើកឡើងរបស់អ្នកនាំពាក្យគណបក្សកាន់អំណាចនេះបន្ទាប់ពីមហាជន ពិសេសនោះបណ្តាញសង្គមហ្វេសប៊ុកបានរិះគន់ចំពោះរថយន្តពីរគ្រឿងដែលពាក់ស្លាកលេខនគរបាល និងខេមរភូមិន្ទបានបិទស្លាកសញ្ញាគណបក្សប្រជាជនកម្ពុជាធ្វើឃោសនាបោះឆ្នោត ។
លោក សុខ ឥសាន បានគូសបញ្ជាក់ឲ្យដឹងនៅថ្ងៃទី១២ ខែកក្កដា យ៉ាងដូច្នេះថា«ការពិតនៃមធ្យោបាយរបស់រដ្ឋជាមធ្យោបាយរបស់រដ្ឋទាំងស្រុង គឺប្រើប្រាស់ថវិការដ្ឋដាក់លេខរដ្ឋសម្រាប់បម្រើការងាររដ្ឋ ភាគច្រើនជាមធ្យោបាយធំៗ» ។ លោកបន្តថា មធ្យោបាយចំណាយលុយឯកជនរបស់មន្ត្រីផ្ទាល់ខ្លួនដោយគ្រាន់តែសុំលេខរដ្ឋយកមកបំពាក់ឲ្យរថយន្តនោះសម្រាប់បម្រើការជូនអង្គភាពតែការពិតជារបស់ឯកជនទេ ។ តែទោះជាចំណាយលុយឯកជនយ៉ាងណាក៏ដោយ តែដាក់លេខរដ្ឋអាចថា ជារបស់រដ្ឋហើយ ។
លោកបញ្ជាក់ថា«ក្នុងយុទ្ធនាការឃោសនាបោះឆ្នោតគេមិនគិតរបស់បានមកដោយលុយឯកជន ឬលុយរដ្ឋទេ តែបំពាក់ផ្លាកលេខរដ្ឋត្រូវច្បាប់ហាមទាំងអស់ ។ បាតុភាពកើតឡើងដោយសារ រថយន្តជារថយន្តឯកជន ចំណាយលុយឯកជន តែបំពាក់លេខរដ្ឋបានជាម្ចាស់រថយន្តមិនបានគិតតាមផ្លូវច្បាប់ដោយគិតថា ជារថយន្តទិញលុយផ្ទាល់ខ្លួនបានជាយកមកប្រើប្រាស់ក្នុងយុទ្ធនាការឃោសនាបោះឆ្នោត ដោយមិនបានគិតពីលេខរដ្ឋជាទង្វើខុសច្បាប់នោះ ។ ដូច្នេះទោះបីរថយន្តទិញដោយលុយឯកជនក៏ដោយឲ្យតែដាក់លេខរដ្ឋត្រូវជៀសវាងយកទៅប្រើប្រាស់ក្នុងយុទ្ធនាការបោះឆ្នោតនាំឲ្យខុសច្បាប់ និងប៉ះពាល់ដល់កិត្តិយសរបស់គណបក្ស » ។
គួររឮកថា កាលពីពេលថ្មីៗកន្លងមកនេះសម្តេចតេជោ ហ៊ុន សែននាយករដ្ឋមន្ត្រីមុនថ្ងៃបោះឆ្នោតបានអំពាវនាវដល់មន្ត្រីរាជការជាសមាជិកគណបក្សប្រជាជនកម្ពុជា និងគាំទ្រទាំងអស់កុំយករបស់រដ្ឋទៅធ្វើការហែក្បួនឃោសនាបោះឆ្នោតឲ្យសោះ ។ចំណែកមន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោតក៏បានឃាមឃាត់មិនឲ្យប្រើប្រាស់រថយន្តដែលពាក្យស្លាកលេខរដ្ឋ ឬអង្គភាពទៅធ្វើការឃោសនាបោះឆ្នោតទេ ៕
ចែករំលែកព័តមាននេះ