រាជធានីភ្នំពេញ ៖ មន្ត្រីនៃក្រសួងពាណិជ្ជកម្មបានឲ្យដឹងថា គិតមកដល់ពេលនេះ ក្រសួងបានធ្វើប្រតិភូកម្ម នៃការចេញវិញ្ញាបនបត្របញ្ជាក់ប្រភពដើមទំនិញទម្រង់ឌី (D) សម្រាប់នាំចេញកសិផលទៅដល់មន្ទីរពាណិជ្ជកម្មខេត្តចំនួន៦ និងនៅតំបន់សេដ្ឋកិច្ចពិសេសមួយកន្លែងទៀតក្នុងខេត្តស្វាយរៀង ។…
រាជធានីភ្នំពេញ ៖ មន្ត្រីនៃក្រសួងពាណិជ្ជកម្មបានឲ្យដឹងថា គិតមកដល់ពេលនេះ ក្រសួងបានធ្វើប្រតិភូកម្ម នៃការចេញវិញ្ញាបនបត្របញ្ជាក់ប្រភពដើមទំនិញទម្រង់ឌី (D) សម្រាប់នាំចេញកសិផលទៅដល់មន្ទីរពាណិជ្ជកម្មខេត្តចំនួន៦ និងនៅតំបន់សេដ្ឋកិច្ចពិសេសមួយកន្លែងទៀតក្នុងខេត្តស្វាយរៀង ។
មន្ត្រីក្រសួងពាណិជ្ជកម្មបានថ្លែងនៅព្រឹកថ្ងៃទី១១ កក្កដា ថា មន្ទីរពាណិជ្ជកម្មក្នុងខេត្តចំនួន៦ រួមមាន ខេត្តប៉ៃលិន ឧត្តរមានជ័យ បន្ទាយមានជ័យ បាត់ដំបង ត្បូងឃ្មុំ និងរតនគិរី។ ដោយឡែក មួយកន្លែងផ្សេងទៀត គឺនៅតំបន់សេដ្ឋកិច្ចពិសេសមេនហាតធេន តាយសេង និងសានដុង សាន់សែល ស្ថិតក្នុងខេត្តស្វាយរៀង ។
លោកបន្តថា ក្រសួងនឹងបន្តទៅបណ្តាខេត្តជាប់ព្រំដែនផ្សេងទៀត ដែលតម្រូវធ្វើការបណ្តុះបណា្តលដល់មន្ត្រីរាជការមន្ទីរពាណិជ្ជកម្មជាមុន ទាំងកម្រិតជំនាញនៃវិធានប្រភពដើមទំនិញ ក៏ដូចជាការប្រើប្រាស់នូវប្រព័ន្ធស្វ័យប្រវត្តិកម្ម នៃការចេញវិញ្ញាបនបត្របញ្ជាក់ប្រភពដើមទំនិញនេះ ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម កាលពីពេលកន្លងទៅនេះបានមានប្រសាសន៍ថា ការបើកឲ្យមានធ្វើប្រតិភូកម្មនៃការចេញវិញ្ញាបនបត្របញ្ជាក់ប្រភពដើមទំនិញទម្រង់ឌី សម្រាប់នាំចេញកសិផលបានចាប់ផ្តើមនៅដើមឆ្នាំ២០១៥ ។ ប្រព័ន្ធស្វ័យប្រវត្តិកម្មនេះ បានភ្ជាប់ដោយជោគជ័យទៅនឹងប្រព័ន្ធបញ្ជរតែមួយរបស់ជាតិ និងកំពុងតភ្ជាប់នឹងប្រព័ន្ធបញ្ជរតែមួយអាស៊ាន ដែលត្រូវអនុវត្តនាចុងឆ្នាំ២០១៨ ដើម្បីបញ្ជូនទិន្នន័យបឋម ស្តីពីការផ្តល់វិញ្ញាបនបត្របញ្ជាក់ប្រភពដើមទំនិញទម្រង់ឌី ទៅបណ្តាប្រទេសអាស៊ានតាមប្រព័ន្ធអេឡិចត្រូនិក ។
វាជាផ្នែកជាមួយនៃកិច្ចសម្រួល ពាណិជ្ជកម្មរបស់អាស៊ាន ក៏ដូចជាសម្រាប់បញ្ជូនទិន្នន័យបឋម ស្តីពីការផ្តល់វិញ្ញាបនបត្របញ្ជាក់ប្រភពដើមទំនិញទម្រង់ផ្សេងៗទៅបណ្តាប្រទេស ដៃគូអាស៊ានផងដែរ នាពេលឆាប់ៗខាងមុខ ។
សូមបញ្ជាក់ថា ការនាំចេញតាមវិញ្ញាបនបត្របញ្ជាក់ប្រភពដើមទំនិញទម្រង់ឌី (D) ទៅកាន់ទីផ្សារតំបន់អាស៊ាន មានកំណើនគួរឲ្យកត់សម្គាល់ប្រមាណជាង៦៦% បើប្រៀបធៀបនឹងឆ្នាំ២០១៦ មានទឹកប្រាក់ចំនួន៧២៨លានដុល្លារអាមេរិក បានកើនឡើងដល់១.២១៤លានដុល្លារអាមេរិកនៅឆ្នាំ២០១៧ ៕
ចែករំលែកព័តមាននេះ