ខេត្តពោធិ៍សាត់ ៖ កូនប្រុសតិរច្ឆានម្នាក់ ខណៈស្រវឹងស្រា ហើយមានកំហឹងនឹងឪពុក ដែលបានវាយនិងជេរស្ដីបន្តិចបន្តួច ក៏ទាញកាំបិតកាប់ឪពុកមិនញញើតដៃវិញ បណ្តាលឱ្យរបួសឈាមហូរស្រោចខ្លួន ។ ហេតុការណ៍នេះ កើតឡើងកាលពីថ្ងៃទី៨ កក្កដា វេលាម៉ោង៧យប់នៅភូមិព្រៃខ្លុង ឃុំរកាត ស្រុកភ្នំក្រវាញ ។ ក្រោយកើតហេតុ សមត្ថកិច្ចបានឃាត់ខ្លួនកូនអកតញ្ញូរូបនោះ ប៉ុន្តែឪពុកម្ដាយបានសុំឱ្យលើកលែងទោសវិញ ។ សមត្ថកិច្ចឱ្យដឹងថា ជនរងគ្រោះជាឪពុកឈ្មោះ ងួន គិត អាយុ៥៧ឆ្នាំ រីឯកូនប្រុសតិរច្ឆាននេះឈ្មោះ គិត គាលី អាយុ២៧ឆ្នាំ ។
ទាក់ទិននឹងករណីនេះ សមត្ថកិច្ចឱ្យដឹងថា កូនប្រុសរូបនេះ ទើបត្រឡប់មកពីធ្វើការនៅប្រទេសថៃ និងតែងតែផឹកស្រវឹងរាល់ថ្ងៃ ទោះបីឪពុកម្ដាយហាមប្រាមយ៉ាងណា ក៏មិនស្ដាប់ដែរ ។ ជាក់ស្ដែង នៅថ្ងៃនោះគេបានជួបជុំមិត្តភក្តិមានកម្មវិធីផឹកស៊ីពេញមួយថ្ងៃ ។
លុះនៅវេលាម៉ោង៧យប់ចូលផ្ទះ ត្រូវឪពុកជេរស្ដីក៏មានការតមាត់គ្នា ហើយឪពុកទ្រាំលែងបានក៏វាយប៉ុន្មានដៃ ។ ពេលនោះ កូនតិរច្ឆានខឹង ក៏ទាញកាំបិតកាប់ឪពុកចំថ្ងាស ថ្ពាល់ ចិញ្ចើម និងសៀតផ្កា ហូរឈាមស្រោចខ្លួនតែម្ដង ។ ជនរងគ្រោះត្រូវគ្រូពេទ្យដេរជាច្រើនថ្នេរ ហើយជនដៃដល់ជាកូន ក៏ត្រូវសមត្ថកិច្ចឃាត់ខ្លួនភ្លាមៗដែរ និងនាំទៅប៉ុស្តិ៍ដើម្បីសួរនាំ ប៉ុន្តែនៅថ្ងៃទី៩ ខែកក្កដា ឪពុកម្ដាយបានសុំឱ្យ លើក លែង ទោសវិញ ។
ចែករំលែកព័តមាននេះ