ខេត្តមណ្ឌលគិរី ៖ កសិករនៅខេត្តមណ្ឌលគិរីកំពុងតែប្រឈមនឹងបញ្ហាទិន្នផលកសិកម្មឆ្នាំនេះធ្លាក់ចុះស្ទើរគ្រប់ប្រភេទ ដូចជា ដំណាំសណ្តែកបាយ និងម្រេចប្រមូលផលបានតិចតួច ។ ការធ្លាក់ចុះនូវទិន្នផលនេះ បានធ្វើឲ្យពួកគាត់បារម្ភពីជីវភាពប្រចាំថ្ងៃផងដែរ។ បើទោះជានៅឆ្នាំនេះ…
ខេត្តមណ្ឌលគិរី ៖ កសិករនៅខេត្តមណ្ឌលគិរីកំពុងតែប្រឈមនឹងបញ្ហាទិន្នផលកសិកម្មឆ្នាំនេះធ្លាក់ចុះស្ទើរគ្រប់ប្រភេទ ដូចជា ដំណាំសណ្តែកបាយ និងម្រេចប្រមូលផលបានតិចតួច ។ ការធ្លាក់ចុះនូវទិន្នផលនេះ បានធ្វើឲ្យពួកគាត់បារម្ភពីជីវភាពប្រចាំថ្ងៃផងដែរ។
បើទោះជានៅឆ្នាំនេះ សណ្ដែកបាយមានតម្លៃថ្លៃជាងឆ្នាំមុន ប៉ុន្តែកសិករនៅតែត្អូញត្អែរថា ការដាំសណ្ដែកបាយមិនចំណេញទេ ព្រោះចំណាយដើមទុនច្រើន រីឯការប្រមូលផលវិញបានតិច ។
អ្នកស្រី គឹម សៀងឡេង កសិកររស់នៅភូមិមេប៉ៃ ឃុំពូជ្រៃ ស្រុកពេជ្រាដា បានឲ្យដឹងថា បច្ចុប្បន្ន មុខរបរដាំសណ្តែកបាយពុំសូវទទួលបានផលចំណេញទេ រហូតធ្វើឱ្យកសិករដាំដុះសណ្តែកបាយមួយចំនួនបោះបង់ចោលរបរមួយនេះ ហើយងាកទៅចាប់យករបរថ្មីជំនួសវិញ ។
អ្នកស្រីថា ៖« មូលហេតុដែលធ្វើឱ្យមុខរបរដាំសណ្តែកបាយមិនសូវចំណេញ ដោយសារតែទុនដែលប្រើប្រាស់ក្នុងការដាំដុះត្រូវចំណាយអស់ច្រើន គឺពូជសណ្តែកក៏ថ្លៃ ជី និងថ្នាំផ្សេងៗក៏ថ្លៃ។ បើទោះជាសណ្តែកបាយនៅលើទីផ្សារមានតម្លៃឡើងបន្តិចនៅឆ្នាំនេះ ប៉ុន្តែខ្ញុំបានចំណេញតិចតួចប៉ុណ្ណោះ » ។
អ្នកស្រីបន្តថា គាត់មានផ្ទៃដីចម្ការប្រមាណ៦ហិកតា ដោយក្នុង១ហិកតាគាត់ត្រូវចំណាយលើការដាំសណ្ដែកបាយ ទាំងពូជ ជី ថ្នាំ និងកម្មករអស់ប្រាក់ជាង១លានរៀល ហើយទទួលបានទិន្នផលសណ្ដែកមកវិញត្រឹមតែ៦០០ទៅ១.០០០គីឡូក្រាមប៉ុណ្ណោះក្នុង១ហិកតា ។
អ្នកស្រី គឹម សៀងឡេង បន្ថែមថា នៅឆ្នាំនេះ សណ្តែកបាយមានតម្លៃ៣.០០០ ទៅ៣.៣០០រៀលក្នុង១គីឡូក្រាម គឺបានថ្លៃជាងឆ្នាំមុន៤០០រៀល ប៉ុន្តែតម្លៃនេះមិនអាចឲ្យពួកគាត់បានចំណេញច្រើននោះទេ ។ អ្នកស្រីថា ៖« វាប្រសើរជាងទុកដីទំនេរចោល ចំពោះកសិករដែលពុំមានដីធ្លីខ្លួនឯង ពួកគាត់ជួលដីគេប្រកបរបរនេះ គឺមិនចំណេញទេ ទើបនៅឆ្នាំនេះ មិនសូវមានអ្នកជួលដីដាំ គឺពួកគាត់ងាកទៅប្រកបរបរផ្សេងវិញ » ។
ប្រធានមន្ទីរកសិកម្ម និងរុក្ខាប្រមាញ់ខេត្ត លោក សុងឃាង បាន ឲ្យដឹងថា នៅឆ្នាំនេះ ដំណាំសណ្ដែកបាយមានតម្លៃថ្លៃជាងមុន គឺសណ្ដែកបាយលេខ១ ថ្លៃ៣.៥០០រៀល ។ តម្លៃនេះខ្ពស់ជាងឆ្នាំមុន ដែលស្មើត្រឹមតែ២.៥០០ ទៅ៣.០០០រៀលប៉ុណ្ណោះ ។
ចំពោះផ្ទៃដាំដុះសណ្ដែកបាយឆ្នាំនេះ ក៏មិនតិចជាងឆ្នាំមុនដែរ បើតាមរបាយការណ៍របស់មន្ទីរកសិកម្ម នៅទូទាំងខេត្តមណ្ឌលគិរី មានផ្ទៃដីដាំសណ្ដែកបាយសរុបចំនួន៣.៥០០ហិកតា ហើយក្នុងចំណោមស្រុក-ក្រុងទាំង៥ គឺមានតែ២ស្រុកប៉ុណ្ណោះដែលកសិករប្រកបរបរដាំសណ្ដែកបាយ គឺស្រុកពេជ្រាដា និងស្រុកកែវសីមា ៕
ចែករំលែកព័តមាននេះ