រាជធានីភ្នំពេញ ៖ រដ្ឋមន្ត្រីសេដ្ឋកិច្ចកម្ពុជាបានអះអាងថា ប្រាក់បៀវត្សរ៍មន្ត្រីរាជការកម្ពុជានឹងកើនឡើង៣ដង តាមគោលនយោបាយបៀវត្សរ៍ថ្នាក់ជាតិ បើគិតចន្លោះពីឆ្នាំ២០១៣-២០១៨នេះ ។ ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ…
រាជធានីភ្នំពេញ ៖ រដ្ឋមន្ត្រីសេដ្ឋកិច្ចកម្ពុជាបានអះអាងថា ប្រាក់បៀវត្សរ៍មន្ត្រីរាជការកម្ពុជានឹងកើនឡើង៣ដង តាមគោលនយោបាយបៀវត្សរ៍ថ្នាក់ជាតិ បើគិតចន្លោះពីឆ្នាំ២០១៣-២០១៨នេះ ។
ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានមានប្រសាសន៍ឲ្យដឹងនាព្រឹកថ្ងៃទី២ កក្កដា ថា ការដំឡើងប្រាក់បៀវត្សរ៍សម្រាប់គោលនយោបាយបៀវត្សរ៍ថ្នាក់ជាតិឆ្នាំ២០១៨ បៀវត្សរ៍អប្បបរមារបស់មន្ត្រីរាជការ និងកងកម្លាំងប្រដាប់អាវុធ ក៏ត្រូវបានកើនឡើងជិត៣ដង បើធៀបនឹងឆ្នាំ២០១៣ ។ ក្នុងនោះមន្ត្រីរាជការដែលមានប្រាក់បៀវត្សរ៍ប្រមាណពីជាង៨៥ម៉ឺន ឡើងដល់ជាង៩១ម៉ឺនរៀលនៅខែមករា ឆ្នាំ២០១៨ និងចាប់ពីខែមេសា ឆ្នាំ២០១៨ ឡើងដល់ប្រមាណជាង១លានរៀល ។
ចំពោះប្រាក់បៀវត្សរ៍សម្រាប់គ្រូបង្រៀន បានកើនពី៩៥ម៉ឺននៅឆ្នាំ២០១៧ ដល់ប្រមាណជាង១លានរៀលនៅខែមករា ឆ្នាំ២០១៨ និងចាប់ពីខែមេសា ឆ្នាំ២០១៨ ឡើងដល់ប្រមាណជាង១លាន១សែនរៀល ខណៈឆ្នាំ២០១៣ មានត្រឹមតែ៤០ម៉ឺនរៀលប៉ុណ្ណោះ ។
លោក អូន ព័ន្ធមុនីរ័ត្ន បន្តថា ៖« ការដែលមន្ត្រីរាជការត្រូវដំឡើងប្រាក់អប្បបរមា គឺបានបង្ហាញយ៉ាងច្បាស់អំពីស្ថានភាពសេដ្ឋកិច្ចនៅកម្ពុជា » ។ លោកបន្តថា ៖« សមិទ្ធផលទាំងនោះបានកើតចេញពីការខិតខំប្រឹងប្រែងរបស់រាជរដ្ឋាភិបាល ពោលគឺសេដ្ឋកិច្ចជាតិមានកំណើនល្អ ប្រជាពលរដ្ឋមានជីវភាពកាន់តែធូរធារ និងមានការងារធ្វើកាន់តែច្រើន ព្រមទាំងទទួលបានប្រាក់បៀវត្សរ៍សមរម្យ » ៕
ចែករំលែកព័តមាននេះ