ខេត្តប៉ៃលិន ៖ បុរសម្នាក់បានប្រើឧបករណ៍ ដើរឆក់ត្រី កាលពីវេលាម៉ោង៣ និង៣០នាទីរសៀល ថ្ងៃទី០៨ កក្កដា ត្រូវបានគេប្រទះឃើញដេកស្លាប់ នៅចំណុចទឹកបឹងតូចមួយចម្ងាយប្រហែល៥០០ម៉ែត្រ…
ខេត្តប៉ៃលិន ៖ បុរសម្នាក់បានប្រើឧបករណ៍ ដើរឆក់ត្រី កាលពីវេលាម៉ោង៣ និង៣០នាទីរសៀល ថ្ងៃទី០៨ កក្កដា ត្រូវបានគេប្រទះឃើញដេកស្លាប់ នៅចំណុចទឹកបឹងតូចមួយចម្ងាយប្រហែល៥០០ម៉ែត្រ ពីភូមិព្រៃសន្ទះ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ដោយមូលហេតុប្រើឧបករណ៍ឆក់ត្រី ភ្លាត់ស្នៀតឆក់ខ្លួនឯងស្លាប់។ សពជនរងគ្រោះឈ្មោះ សុខ សឿត ភេទប្រុស អាយុ៣៨ឆ្នាំ រស់នៅភូមិព្រៃសន្ទះ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន។
តាមសាក្សីក្រុមគ្រួសារជនរងគ្រោះ បានប្រាប់សមត្ថកិច្ចថា កាលពីព្រឹកថ្ងៃទី០៦ កក្កដា ជនរងគ្រោះបានយកម៉ូទ័រកែច្នៃជាឧករណ៍ឆក់ត្រី ដើរទៅឆក់ត្រីនៅបឹងខាងក្រោយភូមិដូចសព្វមួយដង។ ក្រោយពេលជនរងគ្រោះទៅឆក់ត្រី ស្រាប់បាត់ខ្លួនរហូត២ថ្ងៃ ក្រុមគ្រួសារចេះតែឆ្ងល់អត់ឃើញមកផ្ទះ ហើយក៏បាននាំគ្នាទន្ទឹងមើលផ្លូវ និង ដើររកដែរតែរកមិនឃើញ។ លុះនៅរសៀលថ្ងៃទី០៨ កក្កដា ត្រូវបានប្រទះឃើញដេកស្លាប់នៅមាត់បឹងនោះ ដោយជាប់ជាមួយនឹងឧបករណ៍កែច្នៃម៉ូទ័រឆក់ត្រី។
បន្ទាប់មកសមត្ថកិច្ចបានចុះទៅពិនិត្យសាកសព ដោយបានកំណត់ថា ជនរងគ្រោះអាចទាក់ខ្សែភ្លើង ឬដែកប៉ះទៅនឹង សំណើមបណ្តាលឱ្យឆក់ស្លាប់យ៉ាងដូច្នេះ។ សាកសពត្រូវបានក្រុមគ្រួសារ ដឹកយកទៅធ្វើបុណ្យតាមប្រពៃណី៕ ប៊ុន ណាក់
ចែករំលែកព័តមាននេះ