ប្រទេសថៃ ៖ ក្រុមអ្នកជួយសង្គ្រោះដែលប៉ុនប៉ងនាំក្មេងប្រុស១២នាក់ និងគ្រូបង្វឹកបាល់ទាត់ពួកគេចេញ ក្រោយពីជាប់នៅក្នុងរូងភ្នំ ដែលមានទឹកជន់លិច១៣ថ្ងៃមកហើយ នៅភាគខាងជើងប្រទេសថៃ បាននិយាយជាលើកដំបូង កាលពីថ្ងៃទី៦ ខែកក្កដា…
ប្រទេសថៃ ៖ ក្រុមអ្នកជួយសង្គ្រោះដែលប៉ុនប៉ងនាំក្មេងប្រុស១២នាក់ និងគ្រូបង្វឹកបាល់ទាត់ពួកគេចេញ ក្រោយពីជាប់នៅក្នុងរូងភ្នំ ដែលមានទឹកជន់លិច១៣ថ្ងៃមកហើយ នៅភាគខាងជើងប្រទេសថៃ បាននិយាយជាលើកដំបូង កាលពីថ្ងៃទី៦ ខែកក្កដា ថា ពួកគេមានពេលវេលាខ្លី សម្រាប់ការនាំអ្នកទាំងនោះចេញ។
ប្រមុខក្រុមកុម្មង់ដូនៃកងម៉ារីនថៃ លោកApakorn Yookongkaew ដែលជាអ្នកទទួលខុសត្រូវមួយរូបនៃប្រតិបត្តិការជួយសង្គ្រោះនេះ បានថ្លែងនៅចំពោះមុខអ្នកសារព័ត៌មានថា ពីដំបូងយើងគិតថា ក្មេងប្រុសទាំងនោះ អាចស្ថិតក្នុងរយៈពេលយូរក្នុងរូងភ្នំ ទម្រាំទឹកស្រក ។ ប៉ុន្តែសភាពការណ៍បានផ្លាស់ប្ដូរ ។ ពេលវេលាឥឡូវត្រូវបានកម្រិត ។
លោកក៏បញ្ជាក់ដែរថា បណ្ដាធុងអុកសីុហ្សែន ត្រូវបានដាក់រាយតាមបណ្ដោយរូងភ្នំ ដើម្បីអាចផ្គត់ផ្គង់ដល់ក្មេងប្រុសទាំងនោះ និងអ្នកនាំពួកគេចេញ ។ ទោះបីជាយ៉ាងណា លោកបដិសេធពុំនិយាយថា តើការនាំពួកគេចេញដ៏លំបាក អាចធ្វើចាប់ពីថ្ងៃទី៦ ខែកក្កដា ទៅឬយ៉ាងណាឡើយ ខណៈភ្លៀងបានចាប់ផ្ដើមធ្លាក់ឡើងវិញនៅតំបន់ភ្នំ់នោះ ។
ការប្រកាសនេះ ធ្វើឡើងប៉ុន្មានម៉ោង ក្រោយការជូនដំណឹងពីការស្លាប់អ្នកជួយសង្គ្រោះថៃម្នាក់ដែលនាំអុកសីុហ្សែនទៅផ្គត់ផ្គង់ដល់ក្មេងប្រុសទាំងនោះ ។ លោក Passakorn Boonyaluck អភិបាលរងខេត្តឈៀងរ៉ៃ ប្រកាសថា អ្នកជួយសង្គ្រោះនោះក្រោយពីផ្ដល់ធុងអុកសីុហ្សែនដល់គេហើយ តាមផ្លូវវិលត្រឡប់មកវិញបែរជារូបគេខ្វះអុកសីុហ្សែនខ្លួនឯង ។ គ្រោះអកុសលដែលកើតឡើង គឺសមាជិកក្រុមកុម្មង់ដូនៃកងម៉ារីនថៃរូបនេះ បានសន្លប់តាមផ្លូវវិលត្រឡប់មកវិញ ហើយមិត្តរួមក្រុមមុជទឹកម្នាក់បានសាកល្បងជួយគេនិងនាំគេចេញ ។
លោក Apakorn Yookongkaew បានបញ្ជាក់ នាព្រឹកថ្ងៃទី៦ ខែកក្កដា ថា ទោះជាយើងបាត់បង់មនុស្សម្នាក់ក៏ដោយ ក៏យើងនៅតែបន្តបេសកកម្មរបស់យើងទៀតដែរ ។ សោកនាដកម្មនេះ បង្ហាញពីការលំបាកនៃការធ្វើដំណើរដោយមុជទឹក ដែលតាមមើលទៅក្មេងប្រុសទាំង១២នាក់ និងគ្រូបង្វឹកពួកគេ ពុំអាចចៀសផុតពីការយកចេញពីរូងភ្នំទេ ។
សម្រាប់ពេលនេះ គេត្រូវប្រើពេលរហូតដល់១១ម៉ោង សម្រាប់អ្នកមុជទឹកម្នាក់មុជ ទៅមកទៅកាន់កន្លែងពួកក្មេងស្នាក់នៅ ។ គេត្រូវមុជទឹក៦ម៉ោងទៅ និង៥ម៉ោងមក ។ ដូច្នេះហើយ ទើបប្រឹងបូមទឹកឲ្យស្រក ដើម្បីអាចងាយដើរចេញដោយគ្រាន់តែមុជទឹកនៅកន្លែងខ្លះ ។ ប្រព័ន្ធបូមទឹករៀបចំដោយពួកវិស្វករជប៉ុន បានបូមទឹកចេញពីក្នុងរូងស្មើនឹងទឹកអាងហែលទឹកអូឡាំពិកដល់ទៅជាង៥០ដងរួចហើយ ។
ការស្លាប់អ្នកជួយសង្គ្រោះម្នាក់ កាលពីថ្ងៃទី៦ ខែកក្កដា ធ្វើឲ្យប៉ះពាល់ដល់អារម្មណ៍របស់ពួកអ្នកជួយសង្គ្រោះជាច្រើនរយនាក់ដែលក្នុងនោះមានជនបរទេសជាច្រើននាក់ផងដែរ ។ព័ត៌មានស្តីពីអ្នកសង្គ្រោះស្លាប់ នៅព្រឹកថ្ងៃទី៦ ខែកក្កដានោះ ក៏ធ្វើឲ្យមានការភ្ញាក់ផ្អើលនិងរន្ធត់យ៉ាងខ្លាំងដែរនៅប្រទេសថៃ ។
យោងតាមប្រភពព័ត៌មានបរទេសបានឱ្យដឹងថា អតីតទាហានមុជទឹករូបនេះ ឈ្មោះ Samarn Kunun អាយុ៣៨ឆ្នាំ បេសកកម្មរបស់គាត់គឺនាំយកបំពង់អុកស៊ីហ្សែនចូលទៅកន្លែងក្មេងប្រុសទាំង១២នាក់និងគ្រូបង្វឹកពួកគេដែលជាប់នៅក្នុងរូងភ្នំនោះ ។ ប៉ុន្តែជាអកុសលពេលត្រឡប់មកវិញ បំពង់អុកស៊ីហ្សែនរបស់គាត់ក៏អស់ធ្វើឱ្យខ្វះខ្យល់ដកដង្ហើម ហើយសន្លប់បាត់ស្មារតីនៅក្នុងទឹក ក្រោយមកក៏បានស្លាប់បាត់បង់ជីវិតតែម្តង ។
ជុំវិញការរិះរកមធ្យោបាយ ដើម្បីនាំក្មេងប្រុសទាំងនោះ និងគ្រូបង្វឹកពួកគេចេញពីរូងភ្នំនេះ កំពុងបង្ហាញឱ្យឃើញពីការរិះរកវិធីផ្សេងៗគ្នា ។ ប្រជាពលរដ្ឋថៃ និងក្រុមអ្នកជំនាញជាច្រើននាក់ បានសរសេរពីវិធីផ្សេងៗតាមការយល់ឃើញរបស់ពួកគេ និងបានផ្ញើទៅកាន់រដ្ឋាភិបាលថៃ ឱ្យធ្វើការពិចារណា ។
វិធីមួយក្នុងចំណោមវិធីជាច្រើន ដែលកំពុងត្រូវបានគេចាប់អារម្មណ៍នោះ គឺការប្រើប្រាស់បំពង់ធំមួយ ក្តារស្គី និងទួរប៊ីន (ម៉ូទ័រវិលដែលអាចរុញច្រានរបស់អ្វីមួយឱ្យទៅមុខបាន) ធ្វើជាឧបករណ៍សម្រាប់នាំអ្នកទាំងនោះចេញពីរូងភ្នំ ។ សារព័ត៌មានបាងកកប៉ុស្តិ៍បានចុះផ្សាយពីវីធីខាងលើនេះនិងបានពន្យល់ថា ដំបូងគេត្រូវដាក់បំពង់ធំមួយពីកន្លែងដែលក្មេងប្រុសទាំងនោះនិងគ្រូបង្វឹកពួកគេកំពុងស្នាក់នៅ និងដាក់ឱ្យដល់មាត់ល្អាង ដែលជាកន្លែងត្រូវចេញមកវិញ ។ បន្ទាប់មក គេប្រើប្រាស់ក្តារស្គីឱ្យក្មេងក្រាបពីលើ និងប្រើប្រាស់ទួរប៊ីនដែលមានកម្លាំងខ្លាំង ដើម្បីរុញក្តារស្គីនោះឱ្យចេញមកក្រៅបាន ។
ទោះជាយ៉ាងណាក្តី គេនៅមិនទាន់អនុវត្តវិធីនេះនៅឡើយទេ ដោយរង់ចាំពិភាក្សាជាមួយក្រុមអ្នកជំនាញជាមុនសិន ដើម្បីឱ្យដឹងច្បាស់ថាតើអាចទៅរួចឬអត់ ប្រសិនបើត្រូវធ្វើតាមវិធីនេះ ?
ចែករំលែកព័តមាននេះ