រាជធានីភ្នំពេញ ៖ នៅពេលធ្វើដំណើរតាមផ្លូវអាកាស អ្នកខ្លះមានអារម្មណ៍ជួបបញ្ហាសុខភាពខ្លះៗ ដូចជា ហ៊ឹងត្រចៀក វិលមុខ រកកលក្អួតចង្អោរជាដើម។ ដើម្បីចៀសវាងបញ្ហាទាំងនេះ សូមអនុវត្តវិធីមួយចំនួនដូចខាងក្រោមនេះ ៖
១-ហាមដេកពេលយន្ដហោះចាប់ផ្ដើមហោះឡើង ឬពេលចុះ ៖ សម្ពាធខ្យល់ជុំវិញអ្នកបានផ្លាស់ប្ដូរយ៉ាងលឿននៅពេលយន្ដហោះហោះឡើង ឬចុះចត ធ្វើឲ្យសម្ពាធខ្យល់ក្នុងត្រចៀកលោកអ្នកផ្លាស់ប្ដូរមិនទាន់ បណ្ដាលឲ្យហ៊ឹងត្រចៀកស្ដាប់អ្វីលែងលឺ មានអាការៈវិលមុខ ឬរកកលក្អួតចង្កោរជាដើម ។
ដំណោះស្រាយ ៖ ស្ងាប, បៀមស្ករគ្រាប់ ឬទំពារស្ករកៅស៊ូ ។
២-កន្លែងអង្គុយចង្អៀតពេក ៖ អ្នកដំណើរតែងយកកាបូបស្ពាយតាមខ្លួន ព្រមទាំងមានអីវ៉ាន់មួយចំនួនទៀត រួចយកទៅទុកនៅទូលើក្បាលផង និងក្រោមកៅអីខាងមុខយើងផង ដែលនាំឲ្យចង្អៀតពិបាកសម្រួលដៃជើង គួបផ្សំនឹងការស្លៀកពាក់រាងតឹងចង្អៀតផងនោះ ធ្វើឲ្យលោកអ្នកមានអារម្មណ៍មិនស្រួលខ្លួនចង់ក្អួតចង្អោរ វិលមុខជាដើម ។
ដំណោះស្រាយ ៖ ចូរដាក់កាបូប ឬវ៉ាលីសណាដែលធំទៅដាក់លើទូដែលនៅខាងលើក្បាល និងរបស់របរតិចតួចនៅផ្នែកខាងក្រោមកៅអីអង្គុយនៅមុខបានហើយ ដើម្បីងាយស្រួលចេញចូល ឬសម្រួលឥរិយាបថផង ។
៣-ហាមប្ដូរខោទឹកនោមទារកនៅកៅអីយន្តហោះ ៖ កុំឲ្យសោះ ! សូមគិតដល់អ្នកអង្គុយក្បែរខ្លួនផង ពិសេសក្លិនទឹកនោម ឬលាមកទារក អាចបង្កបរិយាសធ្វើឲ្យអ្នកដំណើរក្អួតចង្កោរមួយរំពេច ។
ដំណោះស្រាយ៖ នៅបន្ទប់ទឹកលើយន្ដហោះ មានកន្លែងសម្រាប់ផ្លាស់ប្ដូរឲ្យទារក ហើយបើយន្ដហោះនោះអត់មានទេ អ្នកអាចបិទគម្របបង្គន់ធ្វើជាកន្លែងផ្លាស់ប្ដូរបាន ។ ចំណែកខោទឹកនោមនោះត្រូវដាក់ក្នុងធុងសម្រាម។
៤- ពាក់ស្បែកជើងជានិច្ចពេលចូលបន្ទប់ទឹក ៖ សាកស្រម៉ៃថា ស្រោមជើងរបស់អ្នកសើម ហើយជះក្លិនមក តើអ្នកមានអារម្មណ៍បែបណា ។ អ្នកដំណើរមិនចូលចិត្តទេ បញ្ហាធំក្លិនស្រោមជើងនោះ ។ ដូច្នេះ សូមប្រាកដថា ស្រោមជើងរបស់អ្នកនឹងមិនរំខានដល់អ្នក និងអ្នកជិតខាង ។
៥-ពិសាជាតិអាកុលច្រើន ៖ នៅលើយន្ដហោះអត់ហាមអ្នកមិនឲ្យពិសាជាតិអាកុលនោះទេ អ្នកបម្រើលើយន្ដហោះគ្រាន់តែពិនិត្យថា តើយើងពិសាច្រើនប៉ុនណា ដើម្បីការពារពីសុវត្ថិភាព ដូច្នេះគួរពិសាដោយទទួលខុសត្រូវ។ បើសិនលោកអ្នកពិសាជាតិអាកុលច្រើន វាកាន់តែពិបាកក្នុងខ្លួន នៅពេលយន្ដហោះហោះកាន់តែខ្ពស់ ។
៦-សូមពិចារណាការជ្រើសរើសអាហារ ៖ នៅលើយន្ដហោះភាគច្រើនគេផ្ដល់អាហាររួមមានសាច់ត្រី, សាច់មាន់ ឬសាច់គោ ប៉ុន្ដែក៏មានអ្នកដំណើរខ្លះយកអាហារដែលគាត់ចូលចិត្តឡើងយន្ដហោះដែរ ។ ដូច្នេះត្រង់ចំណុចនេះ សូមពិចារណាបន្ដិចក្រែងមានអាហារនោះមានក្លិនមិនល្អ ឬងាយនឹងកំពប់ធ្វើឲ្យប្រឡាក់ជាដើម ។ ដំណោះស្រាយ ៖ យើងអាចយកអាហារណាដែលក្រៀមៗដាក់តាមខ្លួន ដូចជាសាន់វិចជាដើម ។
៧-ហាមចូលបន្ទប់ទឹកពេលយន្ដហោះឡើង ឬចុះ ៖ ជាទូទៅ នៅពេលយន្ដហោះចាប់ផ្ដើមហោះឡើង, ពេលប៉ះខ្យល់ខ្លាំង ឬពេលចុះចត សញ្ញាហាមចូលបន្ទប់ទឹក និងសញ្ញាពាក់ខ្សែក្រវាត់សុវត្ថិភាព នឹងបង្ហាញនៅលើយន្ដហោះ ។ បើសិនជាចូលបន្ទប់ទឹកចំពេលយន្ដហោះប៉ះខ្យល់ខ្លាំង អ្នកគួរតាំងស្មារតី និងទប់លំនឹងឲ្យបានល្អ ព្រោះពេលនោះអ្នកនឹងមានអារម្មណ៍វិលៗ ឬចង់ក្អួតចង្អោរជាដើម ។
ដំណោះស្រាយ ៖ លោកអ្នកគួរចូលបន្ទប់ទឹកឲ្យបានរួចរាល់ មុនពេលហោះចេញដំណើរ ឬចុះចត ។
៨- ហាមលាបថ្នាំក្រចកលើយន្ដហោះ ៖ វាពិតជាកម្រមានណាស់ តែបើមានមិនត្រឹមតែអ្នកទេ ដែលពុលក្អួតចង្អោរ សម្បីតែអ្នកអង្គុយក្បែរក៏ពុលដែរ ។
៩- អត់ធ្មត់បន្ដិចនៅពេលយន្ដហោះចុះចត ៖ អ្នកដំណើរភាគច្រើនប្រញាប់តែស្ទុះចេញពីកៅអី រួចឈរយ៉ាងយូរ មុនពេលអ្នកនៅខាងមុខចេញអស់ ។ ដូច្នេះមុនពេលអ្នកចាកចេញពីកៅអី ត្រូវប្រាកដថា យន្ដហោះបានចតដោយសុវត្ថិភាព ហើយរង់ចាំឲ្យអ្នកដំណើរនៅជួរមុខចេញផុតសិន ចាំក្រោកពីកៅអី។ ក្នុងអំឡុងពេលនោះ អ្នកអាចសម្រួលដង្ហើម និងឥរិយាបថ ព្រមទាំងរីករាយជាមួយនឹងគោលដៅធ្វើដំណើរតាមផ្លូវអាកាសប្រកបដោយសុវត្ថិភាព ។
ប្រសិនបើអ្នកបានដឹងនូវចំណុចទាំងនេះហើយ សូមជួយចែករំលែកចំណេះដឹងនេះដល់សាច់ញាតិ ឬមិត្តភក្ដិជាទីស្រឡាញ់ដែលមានគម្រោងដំណើរកម្សាន្ដនៅក្រៅប្រទេសតាមផ្លូវអាកាសផង ដើម្បីពួកគាត់ទទួលបានការធ្វើដំណើរប្រកបដោយភាពរីករាយ ៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ