រាជធានីភ្នំពេញ៖ តាមរយៈឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ចំពេលវេលាមួយ ដែលត្រូវការផ្សព្វផ្សាយ នូវព័ត៌មានការងារ សម្រាប់យុវជនរបស់យើង…
រាជធានីភ្នំពេញ៖ តាមរយៈឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ចំពេលវេលាមួយ ដែលត្រូវការផ្សព្វផ្សាយ នូវព័ត៌មានការងារ សម្រាប់យុវជនរបស់យើង ក៏ដូចជាបងប្អូនប្រជាពលរដ្ឋ ដែលកំពុងត្រឡប់មកពីប្រទេសថៃ ដែលជាសកម្មភាពបន្ថែម របស់ក្រសួងការងារធ្លាប់បានធ្វើកន្លងមក ។
នៅថ្ងៃទី១ ខែវិច្ឆិកា ឆ្នាំ២០២៥ ក្នុងពិធីបើកពិព័រណ៍ការងារ និងផលិតភាពជាតិ ឆ្នាំ២០២៥ ឯកឧត្តម ហេង សួរ បានឱ្យដឹងបន្តថា៖ «ខ្ញុំមើលឃើញថាការចូលរួមរបស់វិស័យឯកជននៅតែខ្លាំងដដែល សកម្មភាពសេដ្ឋកិច្ច និងសង្វាក់ផលិតកម្មរបស់យើង ទាំងនៅគ្រប់វិស័យ ដូចជា វិស័យកសិកម្ម ឧស្សាហកម្ម ពាណិជ្ជកម្ម និងសេវាកម្ម គឺមានតម្រូវការការងារខ្ពស់ ដូចនេះសិស្សនិស្សិតនឹងមិនត្រឹមតែបានមកស្វែងយល់អំពីក្រុមហ៊ុននានា ដែលត្រូវជាមួយជំនាញបច្ចេកទេស ឬមុខវិជ្ជាដែលពួកគេកំពុងរៀននោះទេ តែក៏ជាឱកាស ដើម្បីស្វែងរកការងារ ប្រសិនបើក្រុមហ៊ុន និងអ្នកកំពុងស្វែងការងារធ្វើត្រូវរួវគ្នាហើយ ក្រុមហ៊ុននឹងសំភាសន៍ពួកគេដើម្បីធ្វើការតែម្តង» ។
ពិធីបើកពិព័រណ៍ការងារ និងផលិតភាពជាតិ ឆ្នាំ២០២៥ ក្រោមប្រធានបទ «វិថីឆ្ពោះទៅរកផលិតភាព៖ ផ្សារភ្ជាប់ជំនាញ បច្ចេកវិទ្យា និងឱកាសការងារ» ដើម្បីបន្តរក្សាតុល្យភាពក្នុងទីផ្សារការងារ តាមរយៈការជួយជ្រោមជ្រែងនិយោជក ដែលមានតម្រូវការជ្រើសរើសកម្លាំងពលកម្ម និងអ្នកស្វែងរកការងារ ដែលមានរយៈពេល ២ថ្ងៃ គឺថ្ងៃទី១-២ ខែវិច្ឆិកា ឆ្នាំ២០២៥ នៅកោះពេជ្រ ។
ឯកឧត្តម ហេង សួរ បន្ថែមថា ការប្រារព្ធពិធីដ៏មានអត្ថន័យនេះ គឺជាការយន្តការពង្រឹងទំនាក់ទំនងដ៏ល្អ និងកាន់តែស្អិត រមួតរវាងរាជរដ្ឋាភិបាល ដៃគូអភិវឌ្ឍន៍ និយោជក រោងចក្រ សហគ្រាស កម្មករនិយោជិត គ្រឹះស្ថាន អប់រំបណ្តុះបណ្តាលបច្ចេកទេស និងវិជ្ជាជីវៈ (TVET) សិស្ស និស្សិត យុវជន និងអ្នកស្វែងរក ការងារធ្វើ ព្រមទាំងឆ្លើយតបទៅនឹងតម្រូវការជំនាញ នៅក្នុងទីផ្សារការងារបច្ចុប្បន្ន និងអនាគត ក៏ដូចជាការបង្កើនការយល់ដឹង បណ្តុះផ្នត់គំនិត ស្តីពីការបង្កើនផលិតភាពការងារ ។ ពិព័រណ៍ការងារឆ្នាំ នេះ បែងចែកជាព្រឹត្តិការណ៍សំខាន់ៗ ចំនួន ៣ ដូចខាងក្រោម៖
ទី១. ការតាំងបង្ហាញរបស់ក្រុមហ៊ុន សហគ្រាស ដែលនឹងផ្ដល់ឱកាសនៅមួយកន្លែងងាយ ស្រួលសម្រាប់ក្មួយៗ សិស្ស និស្សិត យុវជន និងអ្នកស្វែងរកការងារ ក្នុងការដាក់ពាក្យរកការងារ ជួបដោយផ្ទាល់ និងសម្ភាសភ្លាមៗ ជាមួយនិយោជក ដែលកំពុងមានតម្រូវការជ្រើសរើសកម្លាំង ពលកម្មជាក់ស្ដែងចំនួនជាង ៣ម៉ឺនកន្លែង ។
ទី២. កិច្ចពិភាក្សាលើប្រធានបទ “វិថីឆ្ពោះទៅរកផលិតភាព៖ ផ្សារភ្ជាប់ជំនាញ បច្ចេកវិទ្យា និងឱកាសការងារ” និងការចែករំលែកបទពិសោធក្នុងការចាប់យកអាជីព ដែលមានការចូលរួមពី សំណាក់វាគ្មិនកិត្តិយសដែលជំនាញនៅក្នុងទីផ្សារ ដើម្បីចែករំលែកនូវគំនិត ចំណេះដឹង ចំណេះធ្វើ និងបទពិសោធជោគជ័យជាក់ស្តែង សំដៅបណ្ដុះផ្នត់គំនិត កែប្រែឥរិយាបថ និងបង្កើនការយល់ដឹង អំពីការលើកកម្ពស់ផលិតភាព និងភាពប្រកួតប្រជែងអាជីវកម្ម ។
ទី៣.កម្មវិធីនេះបង្កើតបណ្តាញទំនាក់ទំនង ផ្នែកធនធានមនុស្ស ដែលអាចបើកច្រកសម្រាប់ ក្មួយៗសិស្ស និស្សិតដែលចង់ស្វែងយល់អំពីព័ត៌មានឱកាសការងារ និងនិយោជកដែលមាន តម្រូវការជ្រើសរើសបុគ្គលិក អាចជួបគ្នាផងដែរ ។
ជាមួយគ្នានេះផងដែរ លោក គង់ ច័ន្ទវាសនា អនុប្រធានសហភាពសហព័ន្ធយុវជនកម្ពុជា រាជធានីភ្នំពេញ ក៏បានឱ្យដឹងថា៖ «នេះគឺជាលើកទី៣ហើយ ដែលខ្ញុំ បានមកចូលរួមក្នុងកម្មវិធីនេះដោយផ្ទាល់ និងជាឆ្នាំទី៦ហើយ ដែល សហភាពសហព័ន្ធយុវជនកម្ពុជា រាជធានីភ្នំពេញ បានរួម សហការជាមួយទីភ្នាក់ងារជាតិមុខរបរ និងការងារ នៃក្រសួងការងារ និងបណ្តុះបណ្តាលវិជ្ជាជីវៈ ក្នុងការរៀបចំកម្មវិធីនេះឡើង។ តាមរយៈការដាក់តាំងបង្ហាញស្តង់យុវជនផង, ការជ្រើសរើសយុវជនឱ្យចូលរួមក្នុង សន្និសីទសារព័ត៌មាន ក្នុងកម្មវិធីប្រកួតនិយាយជាសាធារណះ (វោហាកោសល្យ) និងក្នុងកម្មវិធីសិក្ខាសាលាផង ព្រម ទាំងការផ្សព្វផ្សាយលើបណ្តាញសង្គមដើម្បីជំរុញ និងបង្កើនការចូលរួមរបស់យុវជនក្នុងព្រឹត្តការណ៍នេះផង» ។
លោក គង់ ច័ន្ទវាសនា បន្ថែមថា ពិព័រណ៌ការងារ និងផលិតភាពជាតិ ឆ្នាំ២០២៥នេះ ពិតជាមានសារសំខាន់ណាស់ សម្រាប់យុវជន និងឆ្លុះបញ្ចាំង ឱ្យឃើញនូវការយកចិត្តទុកដាក់ខ្ពស់ ការគិតគូរម៉ត់ចត់ និងចក្ខុវិស័យវែងឆ្ងាយរបស់ក្រសួងការងារ និងបណ្តុះបណ្តាលវិជា្ជជីវះ ក្រោមការដឹកនាំដ៍ឈ្លាសវៃ ស្វាហាប់ និងប្រកបដោយចក្ខុវិស័យវែងឆ្ងាយរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា សម្រាប់យុវជន និងអនាគតយុវជន។ ទន្ទឹមនេះ ការបង្កើនផលិតភាព តាមរយៈការផ្សារភ្ជាប់ជំនាញ បច្ចេកវិទ្យា និងឱកាសការងារ គឺជាប្រធានបទដែលឆ្លើយតបទៅនឹងនៃការរីចម្រើន និងប្រែប្រួល យ៉ាងឆាប់រហ័សនៃបច្ចេកវិទ្យាក្នុងយុគសម័យបរិវត្តកម្មឌីជីថល (Digital Transformation) ដែលបច្ចេកវិទ្យាឌីជីថលបាន ក្លាយទៅជាចំណែកមួយដែលមិនអាចខ្វះបានរួចទៅហើយក្នុងជីវភាពរស់នៅប្រចាំថ្ងៃរបស់យើងទាំងអស់គ្នា ។
សូមជម្រាបជូនផងដែរថា ព្រឹត្តិការណ៍ដ៏មានសារ:សំខាន់នេះ បានចូលរួមសហការ ជាមួយទីភ្នាក់ងារជាតិមុខរបរ និងការងារ (NEA), សហភាព សហព័ន្ធយុវជនកម្ពុជា (ស.ស.យ.ក.) រាជធានីភ្នំពេញ, សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC), មូលនិធិអភិវឌ្ឍន៍ជំនាញ (SDF), ទីភ្នាក់ងារសហប្រតិបត្តិការអន្តរជាតិកូរ៉េ (KOICA), និងដៃគូដែលមិនអាចខ្វះបាន គឺអង្គការ អន្តរជាតិខាងការងារ (ILO) ៕ អត្ថបទសហការ
ចែករំលែកព័តមាននេះ