ទីក្រុងឌូបៃ ៖ យោងតាមសារព័ត៌មានក្នុងប្រទេសអ៊ីរ៉ង់បានរាយការណ៍កាលពីថ្ងៃសៅរ៍ថា ប្រទេសអ៊ីរ៉ង់កំពុងតែសិក្សាពីវិធីបន្តនាំចេញប្រេង និងវិធីផ្សេងទៀត ដើម្បីឆ្លើយតបនឹងការដាក់ទណ្ឌកម្មរបស់សហរដ្ឋអាមេរិកលើប្រទេសនេះ ។
តាំងពីលោកប្រធានាធិបតីសហរដ្ឋអាមេរិក ដូណាល់ ត្រាំ បានដកសហរដ្ឋអាមេរិកចេញពីកិច្ចព្រមព្រៀងអាវុធនុយក្លេអ៊ែរកាលពីខែឧសភា ដែលនាំឲ្យមានការដាក់ទណ្ឌកម្មលើអ៊ីរ៉ង់ គឺរូបិយវត្ថុរបស់ប្រទេសនេះបានធ្លាក់ចុះ៤០% ដែលធ្វើឲ្យក្រុមពាណិជ្ជករធ្វើកូដកម្ម ។
មេដឹកនាំកំពូលរបស់ប្រទេសអ៊ីរ៉ង់ លោក Ayatollah Ali Khamenei បាននិយាយថា ការដាក់ទណ្ឌកម្មរបស់អាមេរិកនេះ គឺមានគោលដៅធ្វើឲ្យប្រជាពលរដ្ឋអុីរ៉ង់ប្រឆាំងនឹងរដ្ឋាភិបាលរបស់ខ្លួន ។
ព្រោះតែការដាក់ទណ្ឌកម្មឡើងវិញនេះ អាចនឹងធ្វើឲ្យប្រទេសអុីរ៉ង់ពិបាកប្រើប្រាស់ប្រព័ន្ធហិរញ្ញវត្ថុពិភពលោក ។ លោកប្រធានាធិបតី Hassan Rouhani បានជួបប្រធានសភា និងតុលាការ ដើម្បីពិភាក្សាពីវិធានការឆ្លើយតប ។
សារព័ត៌មាននេះបានឲ្យដឹងថា ៖« ការគំរាមកំហែងជាច្រើនមកលើសេដ្ឋកិច្ចប្រទេសអ៊ីរ៉ង់ ដែលបង្កដោយរដ្ឋាភិបាលអាមេរិក ត្រូវបានត្រួតពិនិត្យ និងចេញវិធានការសមរម្យដើម្បីត្រៀមខ្លួនជាមួយការដាក់ទណ្ឌកម្មនេះ ព្រមទាំងចៀសវាងការប៉ះពាល់ជាអវិជ្ជមានផងដែរ » ។
សារព័ត៌មានបន្ថែមទៀតថា វិធានការមួយ គឺការព្យាយាមផលិតប្រេងឥន្ធនៈឲ្យបានគ្រប់គ្រាន់សម្រាប់ការប្រើប្រាស់នៅក្នុងប្រទេស។
លោក Fereydoun Hassanvand ប្រធានគណៈកម្មាធិការថាមពលរបស់សភាអ៊ីរ៉ង់ បាននិយាយថា រដ្ឋាភិបាល និងសភាបានបង្កើតគណៈកម្មាធិការមួយដើម្បីសិក្សាពីអតិថិជនប្រេង និងសិក្សាវិធីរកប្រាក់ចំណូលចូលប្រទេស បន្ទាប់ពីទណ្ឌកម្មរបស់អាមេរិកបានអនុម័ត ៕
ចែករំលែកព័តមាននេះ