តាមប្រភពពី Bangkok Post បានឱ្យដឹងថា ក្មេងៗកីឡាករបាល់ទាត់ទាំង១២នាក់ និងគ្រូបង្វឹកម្នាក់ ត្រូវបានរកឃើញដោយសុវត្ថិភាពកាលពីយប់មិញ ។ អស់រយៈពេល៩ថ្ងៃហើយ ដែលក្រុមទាត់បាល់ទាំង១៣នាក់…
តាមប្រភពពី Bangkok Post បានឱ្យដឹងថា ក្មេងៗកីឡាករបាល់ទាត់ទាំង១២នាក់ និងគ្រូបង្វឹកម្នាក់ ត្រូវបានរកឃើញដោយសុវត្ថិភាពកាលពីយប់មិញ ។ អស់រយៈពេល៩ថ្ងៃហើយ ដែលក្រុមទាត់បាល់ទាំង១៣នាក់ ត្រូវបានជាប់នៅក្នុងរូងភ្នំលិចទឹក ដែលទាមទារឱ្យមានការស្វែងរកអស់រយៈចម្ងាយ ១០គីឡូម៉ែត្រ ដោយក្រុមជួយសង្គ្រោះទាំងជាតិ និងអន្តរជាតិ ។
ក្មេងៗដែលជាកីឡាករដែលទើបរកឃើញ គឺមានអាយុចន្លោះពី១១ឆ្នាំ ទៅ១៦ឆ្នាំ។ ចំណែកឯគ្រូបង្វឹកមានអាយុ២៥ឆ្នាំ។ ពួកគេជាប់នៅក្នុងរូងភ្នំមួយ ហៅថា Tham Luang ដែលស្ថិតនៅភាគខាងជើងប្រទេសថៃ ក្រោយការប្រកួតកាលពីថ្ងៃសៅរ៍ ទី២៣ ខែមិថុនា ។ ក្រោយពីបាត់ខ្លួន ម្តាយរបស់ពួកគេបានរាយការណ៍មកប៉ូលិស ព្រោះមិនឃើញចូលកូនត្រឡប់មកផ្ទះវិញ ។
ក្រុមអាជ្ញាធរបាននាំគ្នាចាប់ផ្តើមស្វែងរកក្មេងៗទាំងនោះ ក្រោយគេគិតថា ពួកគេអាចជាប់នៅក្នុងរូងភ្នំដោយសារតែភ្លៀងខ្លាំង ដែលធ្វើឲ្យបិទផ្លូវច្រកចេញ ។ អាជ្ញាធររកឃើញកង់របស់ក្មេងៗចាក់សោជាប់ជាមួយនឹងរបង ជាមួយនឹងស្បែកជើងកីឡានៅចំច្រកចូល។
ក្រុមអ្នកជួយសង្គ្រោះដែលមកពីខាងចិន ឡាវ អង់គ្លេស អាមេរិក និងថៃ បានរកឃើញស្នាមបាតដៃ បាតជើង ដែលបន្សល់ទុកនៅតាមផ្លូវចូលរូងភ្នំ ។ ការរុករកពិតជាមានការលំបាក ដោយសារតែទឹកចេះតែកើនឡើង ហើយការមុជក៏មិនស្រួលដែរ ទើបតែថ្ងៃអាទិត្យនិងម្សិលមិញទេ ដែលអាកាសធាតុចាប់ផ្តើមមានអំណោយផល។
ជាមួយគ្នានេះដែរ គេក៏ឃើញមានវត្តមានរបស់នាយករដ្ឋមន្ត្រីថៃ ប្រាយុទ្ធ ចាន់អូចា បានមកដល់កន្លែង ដើម្បីជួយជាកម្លាំងចិត្តដល់ក្រុមសង្គ្រោះ។ សិស្សនិងគ្រូរាប់ម៉ឺននាក់ បានប្រមូលផ្តុំគ្នាបួងសួងដល់អតីតព្រះមហាក្សត្រ Bhumibol Adulyadej និង ម្ចាស់ក្សត្រី នៅវាល Royal Plaza នាទីក្រុងបាំងកក។
ដោយសារតែខ្លាច ក្មេងៗអត់ឃ្លានស្លាប់ ក្រុមយោធាថៃបាននាំគ្នាវេចអាហារ ពិល និង ផែនទីក្នុងរូងភ្នំ ដាក់នៅក្នុងប្រអប់ ហើយបណ្តែតទឹក ដើម្បីឲ្យដល់ក្មេងៗ។
ក្រុមអ្នកសង្គ្រោះគិតថា ក្មេងៗប្រហែលជាទៅនៅទីខ្ពស់នាឆ្នេរខ្សាច់ប៉ាតាយ៉ា។ ពួកគេបានប្រើប្រាស់ធុងអុកស៊ីសែន ដើម្បីមុជទឹកឲ្យបានកាន់តែជ្រៅ។ ការខិតខំ ពិតជាមានលទ្ធផលល្អមែន។ ចុងក្រោយ ក្មេងៗទាំង១២នាក់ និង គ្រូបង្វឹក ត្រូវបានគេរកឃើញទាំងនៅមានជីវិត នៅចម្ងាយប្រហែល៤០០ម៉ែត្រលើឆ្នេរប៉ាតាយ៉ា។ ក្រុមមនុស្សនៅកន្លែងនោះ នាំគ្នាស្រែកហ៊ោសប្បាយរីករាយ ដោយសារតែរកឃើញ ។
ទោះបីជារកឃើញហើយក៏ដោយ មហាជនមានការព្រួយបារម្ភពីការយកក្មេងៗចេញពីទីនោះឲ្យមានសុវត្ថិភាព ព្រោះការធ្វើដំណើរចេញមកវិញ ទាមទារពេលដល់ទៅរាប់ថ្ងៃ រាប់អាទិត្យ ហើយពេលនេះពួកគេកំពុងតែខ្សោយអស់កម្លាំងទៀត ក្រោយការអត់អាហារ៩ថ្ងៃ។ ជាដំណោះស្រាយ ក្រុមអ្នកជួយសង្គ្រោះកំពុងតែគិតគូរលើការបង្រៀនក្មេងៗ ឲ្យចេះមុជទឹកជ្រៅៗ ដើម្បីចេញមកវិញ ៕
ចែករំលែកព័តមាននេះ