ខេត្តពោធិ៍សាត់ ៖ ក្មេងប្រុសអាយុ១២ឆ្នាំម្នាក់ត្រូវរថយន្ដបុកស្លាប់យ៉ាងអាណោចអាធម៌ ខណៈពេលជិះកង់បត់ចូលផ្ទះ ។ ហេតុការណ៍គ្រោះថ្នាក់ចរាចរណ៍នេះបានកើតឡើងនៅលើកំណាត់ផ្លូវជាតិលេខ៥ ចន្លោះគីឡូម៉ែតលេខ១៧៥ ១៧៦ ស្ថិតក្នុងភូមិតាកែវលើ ឃុំត្នោតជុំ ស្រុកក្រគរ កាលពីវេលាម៉ោង១១និង៤០នាទីព្រឹក ថ្ងៃទី២៦ ខែមិថុនា ឆ្នាំ២០១៨ ។
បន្ទាប់ពីកើតហេតុអ្នកបើកបររថយន្ដមិនស្គាល់អត្តសញ្ញាណបានគេចខ្លួនបាត់បន្សល់ទុករថយន្ដនៅទីនោះសមត្ថកិច្ចបានយកមករក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្ត ។
សមត្ថកិច្ចឲ្យដឹងថា នៅថ្ងៃនោះជនរងគ្រោះជាសិស្សសាលាចេញពីរៀនហើយបានជិះកង់លើផ្លូវជាតិលេខ៥ក្នុងទិសដៅពីលិចទៅកើត ។ ទៅដល់ចំណុចកើតហេតុបានបត់ឆ្វេងឆ្លងថ្នល់ចូលផ្ទះ ខណះនោះក៏ត្រូវរថយន្ថដែលកំពុងបោះពួយយ៉ាងលឿនមកពីមុខបុកយ៉ាងពេញទំហឹងបណ្ដាលឲ្យស្លាប់ភ្លាមៗនៅនឹងកន្លែងកើតហេតុគួរឲ្យសង្វេគ ។
ភ្លាមៗនោះអ្នកបើកបរមិនស្គាល់ឈ្មោះគេចខ្លួនបាត់ស្រមោល ។ សមត្ថកិច្ចឲ្យដឹងថា ជនរងគ្រោះឈ្មោះ រឿន កុយ ភេទប្រុស អាយុ១២ឆ្នាំ រស់នៅភូមិឃុំកើតហេតុខាងលើ ។ រថយន្ដដែលបង្កគ្រោះថ្នាក់នោះម៉ាកសាំយ៉ុងពណ៌ស ពាក់ស្លាកលេខ ភ្នំពេញ 2J-5980 សមត្ថកិច្ចយកមករក្សាទុកនៅស្នងការដ្ឋាននគរបាលខេត្តដើម្បីរង់ចាំម្ចាស់ចូលខ្លួនមកដោះស្រាយ ៕
ចែករំលែកព័តមាននេះ