ខេត្តកែប ៖ តាមសេចក្តីរាយការណ៍ពីនគរបាលចរាចរណ៍ក្រុងកែបបានឲ្យដឹងថា នៅវេលាម៉ោង៥និង៣០នាទីល្ងាចថ្ងៃទី២៥ ខែមិថុនា ឆ្នាំ២០១៨ នេះមានករណីគ្រោះថ្នាក់ចរាចរណ៍មួយបានកើតឡើងរវាងរថយន្ត និងម៉ូតូសង់កូរ៉េបើកបរដោយមន្ត្រីនគរបាលម្នាក់ត្រូវរថយន្តបុកលើផ្លូវជាតិលេខ៣៣ ទិសដៅកែងគ្នា ក្នុងចំណុចផ្លូវកែងទល់មុខផ្លូវចូលស្រែអំបិលឈ្មោះ អ៊ុយ ហិ ករណីនេះបណ្តាលឲ្យមន្ត្រីនគរបាលម្នាក់ដែលជិះម៉ូតូបានរងរបួសធ្ងន់ ។
សមត្ថកិច្ចបានបញ្ជាក់ថា ម៉ូតូដែលត្រូវរថយន្តបើកបុកនគរបាលនោះម៉ាកសេ១០០កូរ៉េ ពណ៌ក្រហម គ្មានផ្លាកលេខ បើកបរដោយឈ្មោះ ម៉ី រ៉ាឌី ភេទប្រុស អាយុ៥៤ឆ្នាំ មុខរបរនគរបាល បច្ចុប្បន្ននៅភូមិកែប សង្កាត់កែប ក្រុងកែប(រងរបួសធ្ងន់) ។ ចំណែករថយន្តដែលបុកម៉ាក (រេហ្វ) ពណ៌ទឹកប្រាក់ ពាក់ផ្លាកលេខភ្នំពេញ ២AB- ០៤៤៣ បើកបរដោយឈ្មោះ ផុន ធឿន ភេទប្រុស អាយុ២៧ឆ្នាំ មុខរបរបុគ្គលិកក្រុមហ៊ុនមួយ រស់នៅភូមិព្រៃស្នៀត ឃុំព្រៃស្នៀត ស្រុកពារាំង ខេត្តព្រៃវែង មិនរងរបួសទេ ។
តាមប្រភពព័ត៌មានពីនគរបាលចរាចរណ៍ក្រុងកែបបានឲ្យដឹងថា ម៉ូតូបានបត់ឆ្វេងដោយខ្វះការប្រុងប្រយ័ត្នក៏ត្រូវរថយន្តបុកតែម្តង ក្រោយពេលបុកហើយរថយន្តបង្កបានព្យាយាមបើករត់គេចខ្លួន ប៉ុន្តែត្រូវកម្លាំងនគរបាលអធិការក្រុងបានតាមប្រមាញ់រថយន្តរហូតឃាត់បានទាំងរថយន្ត និងអ្នកបើកបរនៅចំណុចឆ្នេរខាងលិចសាលាខេត្តកែប ហើយនាំមកកាន់អធិការនគរបាលក្រុង ដើម្បីធ្វើការសាកសួរ ។
ប្រភពព័ត៌មានចុងក្រោយបានឲ្យដឹងថា ក្រោយពីកើតហេតុត្រូវបានសមត្ថកិច្ចយករថយន្តសង្គ្រោះរបស់ស្នងការខេត្តដឹកទៅសង្គ្រោះនៅមន្ទីរពេទ្យឯប្រទេសវៀតណាម ប៉ុន្តែដោយរបួសធ្ងន់ធ្ងរពេកជនរងគ្រោះក៏បានដាច់ខ្យល់ស្លាប់ពេលដឹកចូលដល់ទឹកដីប្រទេសវៀតណាម ហើយក៏ដឹកសពត្រឡប់មកកាន់លំនៅឋានវិញ ដើម្បីរៀបចំធ្វើបុណ្យតាមប្រពៃណី ។ ចំណែករថយន្ត និងម៉ូតូត្រូវបាននាំមករក្សាទុកនៅអធិការដ្ឋាននគរបាលក្រុងកែបរង់ចាំការដោះស្រាយតាមផ្លូវច្បាប់នៅពេលក្រោយ ៕
ចែករំលែកព័តមាននេះ